1 Corintios 6 - Zoque Copainalá New Testament

Uy nañiwa'cʌtʌjtame ja'n wyʌ'aŋja'moyapyʌcʌsi

¹ Juca iwʌjutiwʌ mi'ojmota'mbʌ's sunba ñiwa'cʌyu te' 'yatzi, ¿ja'nsʌ'ŋ quiotza'ay wa'y ñiwa'cʌyu ja'n jyustota'mbʌ's wyi'naŋdʌjqui? ¿Ja'nsʌ'ŋ más oye wa'y ñiwa'cʌyu masanbʌ'nista'm wyi'naŋdʌjqui?

² ¿Ja'nja mustame que masanbʌ'nista'm maŋba quiʌme'chaju najsacopajcʌsita'mbʌ? Y juca mista'm maŋbamis ŋgʌme'tztamu najsacopajcʌsita'mbʌ, ¿ja'nja nʌctʌ'ytyame ne'cʌ wa'mis ŋgʌme'tztamu chicsta'mbʌ tiyʌ?

³ ¿Y ja'nja mustame que maŋbatʌ ŋgʌme'tzu angelesta'm? ¿Ja'nsʌ'ŋde' pyʌqui jeque wa'ytyʌ ŋgʌme'tztamu te' tiyʌta'm tʌs yʌtijpʌ itcu'yojmo?

⁴ Te'cotoya juca maŋbamis ŋgʌme'tzu tiyʌ'iwʌ te' yʌtijpʌ itcu'yojmo, ¿ŋgottambaja jeque wa'y quiʌme'tzoyaju te' ja'n jene myujsoyapyʌ pʌnda'm te' tu'mʌquiu'yojmo?

⁵ Ndzamba'ʌs yʌ'šej wa'yʌsmij ndzʌctza'ajtamu. ¿Ja'ndiyʌsʌ'ŋ mi'ojmota'm yajtya' tumʌc mujsopyapʌ wa'y mujsu quiʌme'tzoyu 'yatzi'ojmota'm?

⁶ ¿Oyesʌ'ŋ wa'y ñʌquijpu atzi's te' 'yatzi wa'coquiu'yojmo, y wa'y chʌjcu te'šej ja'n wyʌ'aŋja'moyapyʌ's wyi'naŋdʌjqui?

⁷ Wiyuŋšej njyoŋdocoytyambamij juca nañiwa'cʌtʌjtambamij ne'co'mo. ¿Tiyajca' ja'n mbʌ'mgopajcʌytyame ñchʌcjatʌjtamba'camij mal? ¿Tiyajca' ja'n mbʌ'mgopajcʌytyame ñinu'mʌtʌjtamba'camij?

⁸ Pero atzita'm mij, y ne'co'mo nachʌcjatʌjtambamij mal y nañijupʌtʌjtambamij.

⁹ ¿Ja'nja mustame que te' ja'n jyustota'mbʌ's ja'n maŋu pyʌjcʌchoŋyaju yajtiyʌ aŋgui'mbamʌy Dios? Uy aŋgoma'cʌytyame nwin, ja'n maŋu pyʌjcʌchoŋyaju yajtiyʌ te' ispʌquitzʌcpapʌ's, ni te' comichʌqui quiʌna'tzʌpyapʌ's, ni te' cʌtzʌjcʌ'opyapʌ's, ni te' yomoše'ajpapʌ's, ni te' jyaya'ŋdʌwʌji'ŋ jowitzʌcpapʌ's,

¹⁰ ni te' nu'myajpapʌ's, ni te' quiʌñʌñbapʌ's itʌpa'tcuy, ni te' no'tyajpapʌ's, ni te' otowewʌ'ajpapʌ's, ni te' ninu'moyajpapʌ's ja'n maŋu pyʌjcʌchoŋyaju yajtiyʌ aŋgui'mbamʌy Dios.

¹¹ Y metza tuca'y mi'ojmota'm te'šejta'mbʌ tiyʌmis ndzʌctamba inʌc wina, pero tʌ Ngomi Jesucristo's ñʌquiʌsi ŋguiotze'atʌjtamumij y myasa'najtamumij y njyustococottamwa'mij tʌta'm Diojsis 'Yespiritupit.

Wʌcocottamʌ Dios mista'm ŋgüerpopit

¹² Ʌj ja'nʌj yajwinduqui yajtiyʌcʌsi aŋgui'mgu'yis, pero ja'n mumutiyʌ pyʌqui wa'yʌs ndzʌjcu. Ʌj ja'nʌj yajwinduqui yajtiyʌcʌsi aŋgui'mgu'yis, pero ja'nʌj yajtiyʌ's maŋu aŋgui'mu.

¹³ Te' cu'tcuy tʌ ndzejcotoya, y tʌ ndzec cu'tcuquiotoya, pero myejtzji'ŋ maŋba yajyaju Diojsis. Pero tʌ ŋgüerpo ja'nde' ispʌquitzʌjcuquiotoya, sino que tʌ Ngomicotoya, y tʌ Ngomi's quiotzoŋjapya tʌ ŋgüerpo.

¹⁴ Yajwinsa'u Diojsis tʌ Ngomi, y te'šejtij tʌta'm maŋbatʌ yajwinsa'taŋgue'tu te' pyʌmipit.

¹⁵ ¿Ja'nja mustame que mista'm ŋgüerpo Cristo'ste'ñe'? ¿Nyajʌcʌ'japyasʌ'ŋʌs yʌ' cuerpo Cristo'sñe' wa'yʌs ndumʌtzʌjcu malejyomoji'ŋ? Ja'ne, nijutz.

¹⁶ ¿Ja'nja mustame que iwʌ tumʌtzʌcpa malejyomoji'ŋ, tumʌtzʌcpa cuerpo ñe'cʌji'ŋ? Porque ja'yʌyušej: Te' metzata'mbʌ inʌc tumʌ'ajyajpa.

¹⁷ Pero iwʌ tumʌtzʌcpa tʌ Ngomiji'ŋ, tumo'pyʌ espiritu'ajpa ñe'cʌji'ŋ.

¹⁸ Poychactamʌ te' ispʌquitzʌjcuy. Mumu eyata'mbʌ cowa chʌcpapʌ te' pʌ'nis ja'nde' contra ñe' cuerpo. Pero iwʌ ispʌquitzʌcpa contra te' ñe' cuerpo nʌ quiowapa'tu.

¹⁹ ¿O ja'nja mustame que mista'm ŋgüerpo Espíritu Santo's te' tyʌc, y que ijtu te' Espíritu Santo mi'ojmota'm? Yʌ' Espíritu ñchi'tamumij Diojsis. Ja'nde' mista'mne' ne' nwin.

²⁰ Porque wʌwʌ coyowapʌ tiyʌpitmijte' njyuyʌtʌjtamu. Oyecocottamʌ jeque Dios mista'm ŋgüerpopit y espiritupit, porque myejtzji'ŋyʌ' Diojsisñe'.