1 Corintios 5 - Zoque Copainalá New Testament

Pyʌcpa wa'y quiʌme'chatʌju ispʌquitzʌquiajpapʌ

¹ Chamyajpa que wiyuŋšej ijtu ispʌquitzʌjcuy mi'ojmota'm. Yʌ'šejpʌ ispʌquitzʌjcuy wa'y iwʌjutiwʌ's ñʌ'itjayu tyata's yomo, ni ja'ndiyʌ te' cowatzʌquita'mbʌ'ojmo.

² Y mij ñdye'ngui'mdambamij wʌ'cmijte' njyʌytyamʌ. Más oye wa'mis nyajʌcʌ'tamu mista'm ŋgucmʌ te' yʌ'šej chʌjcupʌ's.

³ Wiyuŋšej ya'yʌj ijtu y ja'n tey miji'ŋda'm, pero ŋguipsoquiu'yojmo te'yʌj ijtu, y ŋgʌme'tzwa'mʌs yʌy te' te'šejpʌ tiyʌ chʌcpapʌ's ŋgomʌ'pya'ʌs nʌ'ʌs ŋguenu.

⁴ Ñdyu'mʌytyamu'camij mijta'm tʌ Ngomi Jesucristo's ñʌquiʌsi, te'yʌj ijtu ʌj ŋguipsoquiu'yojmo, y tey itque'tu tʌ Ngomi Jesucristo's pyʌmi.

⁵ Tzi'oquia'tamʌ Satanascʌsi te' te'šejpʌ tiyʌ chʌcpapʌ's wa'y yaju ñe' cuerpo pero wa'y quiotzojcu ñe' 'yespiritu te' jamo'oyj minba'ca tʌ Ngomi Jesús.

⁶ Ja'n 'yoye wa'mij ñdye'ngui'mdamu. Con tuma'ŋbʌn tzʌctoco'yopya, maŋba chʌctocopyʌ'yaju mumuta'mbʌ.

⁷ Yajʌcʌ'jaytyamʌ jeque te' pecapʌ levadura wa'mij jomepʌ mbyanwaye'ajtamu jujcha' ja'ndiyʌpʌ's lyevadura. Porque yajca'yajwa'a te' Cristo jujcha' tʌta'm ñchowambe pascua-jamacotoya.

⁸ Te'šej jeque ndzʌcta'mitʌy sʌŋ, ja'n pecapʌ levadurapit ni yatzi quipsoquiupyit ni yacha'cupyit, porque yʌ'ta'mbʌte' te' pecapʌ levadura. Ndzʌcta'mitʌy sʌŋ oye'ajcu'yojmo y wiyuŋbʌ tiyo'mo. Yʌ'ta'mbʌte' te' levaduratacapʌ pan.

⁹ Njayjaytyamu'ʌsmij totocʌsi u'yamij ñdyumʌtzʌctamu ispʌquitzʌquiajpapʌji'ŋ.

¹⁰ Pero ja'nde' wa'mis jana oto'ŋʌyajwa'nde' ispʌquitzʌquiajpapʌ yʌ' najsacopajcʌsi, ni te' rico'ajyajtyo'yupʌ, ni te' nu'myajpapʌ, ni te' comichʌqui cʌna'tzʌ'oyajpapʌ. Juca inʌc te'šej, ijtu inʌc pyena wa'mis ndzajcu yʌ' najsacopac.

¹¹ Pero yʌtij nʌ'ʌsmij njayjaytyamu que juca ijtu iwʌjutiwʌ ñʌjayajpapʌ atzi ispʌquitzʌcpa, o juca aŋsunba itʌpa'tcuy, o juca quiʌna'tzʌpya comichʌqui, o juca otowewʌ'ajpa, o juca no'tpa, o juca nu'mba, ni umij ñdyumʌcu'ttamu te'wʌji'ŋ.

¹² Porque ja'ʌs tiyʌcotoya maŋu ŋgʌme'chaju jatyʌjcʌyapʌmaj. ¿Ja'nsʌ'ŋ pyʌqui wa'mis ŋgʌme'tztamu mis te' tʌjcʌyajupa'a?

¹³ Porque maŋba quiʌme'chaju Diojsis te' jatyʌjcʌyapʌmaj. Yajʌcʌ'tamʌ jeque te' yatzipʌ mi'ojmota'm.