1 Corintios 3 - Zoque Copainalá New Testament

Diojsis quioyosata'm

¹ Ʌs, atzita'm, jamyusʌ'ʌsmij ndzamjaytyamʌ jujcha' myato'ŋoyjayajpapʌ's te' Espíritu, sino que jujcha' myato'ŋoyjapyapʌ's ñe' wyi'nis šu'noquiuy o jujcha' jowi-une Cristo'ojmota'mbʌ.

² Lechepi'tʌsmij mbʌ'nʌytyamu y ja'n paquipʌ cu'tcupyit, porque ja'nmis inʌc musi ŋgu'ttamu. Ni hasta yʌtij ja'nmis mustame,

³ porque sunjaytyambamajmis nwi'nis šu'noquiuy. Nguiʌjoŋdambamajmij y ŋguipotoŋdambamajmij, y we'nbʌ'tambamaj mis ŋguipsoquiuy. ¿Ja'nsʌ'ŋde' mista'm nwi'nis šu'noquiuy nʌ sunjaytyamu y ñempejutzpʌ pʌnšej nʌ nwyittamu?

⁴ Porque juca iwʌjutiwʌ nʌmba: Ʌs wiyuŋšej ŋgo'ŋba'ʌs Pablo, y eyapʌ nʌmba: Ʌs ŋgo'ŋba'ʌs Apolos, ¿ja'nsʌ'ŋde' ne' nwi'nis šu'noquiupyit?

⁵ ¿Tiya'sʌ'ŋde' Pablo? y ¿tiya'sʌ'ŋde' Apolos? Coyosata'mdijte', y ñe'ta'm chamepit nwyʌ'aŋja'moytyamumij chi'yatʌjušej nwʌ'aŋjamʌtʌjcuy tumduma'ŋbʌn tʌ Ngomi's.

⁶ Ʌs nijpu'ʌs, y Apolojsis šejcu, pero Diojsis yajmʌja'u.

⁷ Te'wʌcotoya ja'n myʌja'ŋ ni te' ñijpapʌ's ni te' šecpapʌ's, pero te' yajmʌja'papʌ's mʌja'ŋbʌte', y te'wʌ te' Dios.

⁸ Te' ñijpapʌ's y te' šecpapʌ's tumʌpʌ tiyʌcotoya yojšajpa, y tumduma'ŋbʌ'nis maŋba pyʌjcʌchoŋu quioyowa tiyʌcʌsi yojsu.

⁹ Tʌj tumʌ'ajcu'yoyjtyʌj yospa Diosji'ŋ. Mijta'm Diojsismijte' ñipita'm, y Diojsismijte' ñdyʌcta'm.

¹⁰ Diojsisʌj tzi'upʌ yajya'moquiupyit ŋgotjayu'ʌs te' tzo'tzcuy jujcha' muspapʌ's chʌjcu tʌc, pero eyapʌ's yajtu'ŋajpa cʌsmʌc. Yajcoquena cuenta jutz yajtu'ŋajpa tumduma'ŋbʌ'nis.

¹¹ Ya'iwʌ'sa ja'n musi quiojtu eyapʌ tzo'tzcuy sino te' Jesucristo te' quiojtyajupa'a.

¹² Pero yʌ'šejpʌ tzo'tzcuquiʌsi muspatʌ nyajtu'ŋaju oropit, platapit, suñita'mbʌ tza'pit, cupyit, socpit o mu'cpit.

¹³ Y maŋba quieju tumduma'ŋbʌ'nis yojsaŋ, porque te' minbapʌ jamo'oyj maŋba quieju. Y jucʌtʌjquis maŋba yajquejayu tumduma'ŋbʌ'nis yojsaŋ tyiya'ʌtij, porque te' jucʌtʌjcojmo maŋba quiʌtʌjcu.

¹⁴ Juca iwʌ's yojsa'ŋis tyonba, te' yajtu'ŋajupʌ's maŋba pyʌjcʌchoŋu quioyowa.

¹⁵ Y juca iwʌ's yojsaŋ poŋbʌ'pa, ñe' te' tyocoquiuy, pero ñe'cʌ maŋba quiotzojcu jujcha' jucʌtʌjcojmoc cotzojcupʌ.

¹⁶ ¿Ja'nja mustame que Diojsismijte' ñdyʌcta'm y que te' Diojsis 'Yespiritu itpa mi'ojmota'm?

¹⁷ Iwʌ's yajtocopya Diojsis tyʌc, te'wʌ maŋba yajtocoyu Diojsis, porque masanbʌte' te' Diojsis tyʌc, y mijta'mde'.

¹⁸ Ya'iwʌ's uy 'yaŋgoma'cʌyu ñe' wyin. Juca iwʌjutiwʌ mi'ojmota'm quiomʌ'pya que mujsopyapʌte' yʌ' tiempo'ojmo, yajcomʌ'yʌ que jowimaj wa'y pya'tu mujsoquiuy.

¹⁹ Porque yʌ' najsacopajcʌsita'mbʌ's myujsoquiuy co'sawa'cuytye' Diojsis wyi'naŋdʌjqui. Porque yʌ'šej ja'yʌyu: Yajowya'pa Diojsis te' mujsoyeta'm ñe'ta'm myaña'cu'yojmo.

²⁰ Y emʌ nʌmgue'tpa: Myuspa tʌ Ngomi's que comeque te' mujsoye'sta'm quipsoquiuy.

²¹ Te'cotoya uy ya'iwʌ's myʌja'ŋgomʌ'yu wyin pyʌndʌwʌcʌsi, porque mumutiyʌ te' mista'mne'.

²² Juca Pablo, juca Apolos, juca Cefas, juca najsacopac, juca te' quenguy, juca te' ca'aŋ, juca yʌtijta'mbʌ tiyʌ o juca minbapʌmaj, mumutiyʌ te' mista'mne.

²³ Y mijta'm Cristo'sñe', y Cristo Diojsisñe'.