1 Corintios 16 - Zoque Copainalá New Testament

Pyʌcpa wa'y quiojtyaju tumin wʌ'aŋja'moyecotoyata'm

¹ Y yʌtij maŋba'ʌs ndzamu te' tumin-du'mʌquiuy masanbʌngotoyata'm. Sunba'ʌs wa'mis ndzʌctaŋgue'tu aŋgui'myajuše'ʌs Galacia-tu'mʌquiu'yojmota'm.

² Winbʌ jama semana'sñe' tumduma'ŋbʌn mi'ojmota'm piŋwe'ndamʌ ndumin ndʌjcaŋʌ wa'mis ŋgoquendamu jujche'ŋmij Diojsis nyajquejaytyamu. Y nu'cpa'camʌj uy pijche'c yajtu'mʌytyame.

³ Y te'ya'mʌj ijtu'c, maŋba'ʌs ŋgʌ'wejyaju te' ŋgopiŋdamupʌmis y ndzi'tamupʌmis carta, yʌ'ta'mbʌ's wa'y ñʌmaŋyaju te' Jerusale'ŋojmota'mbʌcotoya te' tumin te' mis nyajtu'mʌytyamupʌ.

⁴ Y juca oye wa'yʌj maŋgue'tu, maŋyajpa ʌji'ŋ.

Tiyʌta'm quipsu Pablo's wa'y chʌjcu

⁵ Tiju'ca'mʌj ŋgʌtʌjcu Macedonia, minba'ʌj mi'aŋʌta'm, porque maŋbapʌ'ʌjyʌ' ŋgʌtʌjcu Macedonia-najsojmo.

⁶ Y maŋba'ʌjya'o ndzʌ'yu miji'ŋda'm yajtya'ʌs wa'y ŋgʌtʌjcu pacac aŋsʌŋ, y muspamisʌj ŋgotzoŋdamu maŋbamʌ'yʌj.

⁷ Ja'ʌsmij suni minu saŋdu'nisnicʌtʌctamu, pero sunba'ʌj nya'yu miji'ŋda'm, juca šunba tʌ Ngomi's.

⁸ Pero maŋba'ʌj ijtu Efeso-cumgu'yojmo hasta que nu'cpa te' Pentecostes-jama.

⁹ Porque aŋwajwa'a ʌjcotoya oyepʌ tuŋ ja'nʌj comeque nyosemʌy, y wʌwʌ ijtyaju qui'nisoyajpapʌ.

¹⁰ Juca nu'cpa Timoteo, coquendamʌ cuenta wa'mis mbʌjcʌchoŋdamu ndʌwʌšej, porque ñe'cʌ's yosjaquie'tpa tʌ Ngomi jujcha' ʌs.

¹¹ Te'cotoya umis menoschʌctamu sino que sʌ'mnayu'c cotzoŋdamʌ wa'yʌj cʌ'minu, porque sunba'ʌs wa'y minu te' atziji'ŋda'm.

¹² Y nwa'cjo'yjawya'mʌs tʌte' atzi Apolos wa'mij ŋguiʌ'mindamu te' atziji'ŋda'm, pero nijutz jašunʌ myawʌ yʌtij. Maŋbamij ŋguiʌnu'cʌytyamu jujche'c aŋjojtuca'pa.

Ultimota'mbʌ dyujchi'oquiuy

¹³ Coquendamʌ cuenta, y paquic ittamʌ wʌ'aŋjamgu'yojmo. Jayajaya'c wittamʌ y más pʌmipʌctamʌ.

¹⁴ Tiyʌta'm mis ndzʌctamba, tzʌctamʌ sunʌtʌjcuyji'ŋ.

¹⁵ Atzita'm, mustambamis que wina wyʌ'aŋjamyaju te' Estefana's fyamilia's te' Acaya-najsojmo, y chi'oquia'yajwa'a wyin wa'y yojšaju masanbʌngotoyata'm.

¹⁶ Te'cotoya nwa'cjaytyamba'ʌsmij wa'mis mato'ŋoyjayajque'tu te'ta'mbʌ y mumu cotzo'ŋoyajpapʌ y yojšajpapʌ.

¹⁷ Nʌ'omba'ʌs que miñaju te' Estéfanas, te' Fortunato, y te' Acaico, porque ñe'cʌ'sta'm pyajtzaŋdajšaju ja'ndiyʌta'mʌ'cmij yʌy.

¹⁸ Yajtzi'ŋbʌ'jayaju ʌs ndzocoy y mista'mne'. Mʌja'ŋbʌjcʌchoŋdamʌ jeque yʌ'ta'mbʌ.

¹⁹ Ñdyujchi'tambamij Asia-najsojmota'mbʌ tu'mʌquiu'yis. Aŋba'temij ñdyujchi'ʌtʌjtamba tʌ Ngomipit te' Aquila's y Priscila's, y te' ñe' tyʌjcaŋʌ ijtupʌ tu'mʌquiu'yis.

²⁰ Ñdyujchi'ʌtʌjtambamij mumuta'mbʌ atzi's. Nadyujchi'ʌtʌjtamʌ ne'co'mo masanbʌ su'coquiupyit.

²¹ Ʌj Pablo, ne' ŋgʌ'pi'tʌsmij nja'yʌyjaytyaŋgue'tpa ʌsne' ñdyujchi'oquiuy.

²² Iwʌ's ja'n šuni tʌ Ngomi Jesucristo, tocoyuwa'nde' Diojsis wyi'naŋdʌjqui. Yajminʌ tʌta'm Ngomi.

²³ Sunba'ʌs wa'y ijtu mi'ojmota'm tʌ Ngomi Jesucristo's yajya'moquiuy.

²⁴ Sunjojcʌtʌctamba'ʌsmij tʌta'm Ngomi Jesucristopit. Amén.