1 Corintios 15 - Zoque Copainalá New Testament

Chamu Pablo's que winsa'u Cristo

¹ Yʌtij atzita'm, maŋba'ʌsmij nyajamwʌtzʌctaŋgue'tu te' evangelio ndzamgopuŋjaytyamuše'ʌsmij wina. Yʌ'wʌte' te' mbʌjcʌchoŋdamupʌmis, y nʌmis nʌtu'ŋajojcʌtʌctaŋgue'tupʌ.

² Te'šejtijque' nʌmij ŋguiotzoctamu yʌ' evangeliopit juca nʌmis njamdamu ndzoco'yojmo te' tzame ndzamgopuŋjaytyamuše'ʌsmij, y juca jaquiomeque mis nwʌ'aŋjamdamʌ.

³ Porque wina ndzamgopuŋjaytyamu'ʌsmij tiyʌ ʌste' mbʌjcʌchoŋupʌ, y yʌ'šejte': Quioca'jayu te' Cristo's tʌta'm ŋgowa, chambašej Totojaye's,

⁴ y ñipyaju, y winsa'u tuca'y jamacʌsi, chambašej Totojaye's.

⁵ Y yajquenu wyin Cefas, y jʌsa'ca te' macwʌstʌjca'ytya'mbʌ.

⁶ Jʌsa'ca yajqueñajque'tu wyin tumʌ mone-co-mojsi'scʌtʌquita'mbʌ atzi te' tumʌ ijtyajumʌy. Y ijtyaju sone jaquia'yapʌtij, pero eyata'mbʌ ca'yajwa'a.

⁷ Jʌsa'ca yajquengue'tu wyin Jacobo, y jʌsa'ca mumu te' cʌ'wejta'm.

⁸ Y saŋjʌsa'ctya'a yajquengue'tu'ʌj ñe' wyin, y ʌj jujcha' yawa ijtupʌšej.

⁹ Porque ʌjyʌ' más cʌmaŋbʌ cʌ'wej, ni ja'nʌs merecetzʌqui wa'yʌj nʌjayaju cʌ'wej, porque nyacsnutzʌcjapya'ʌs inʌc Diojsis tyu'mʌquiuy.

¹⁰ Pero Diojsis yajya'moquiu'yisʌj tzʌjcu yʌti'ʌj ijtušej, y jaquiomeque'ʌj yajyamʌ. Pero ʌj masa'mʌj yojsu que ja'n mumu ñe'cʌta'm, pero ja'nde' ʌj sino que te' Diojsis yajya'moquiuy ʌji'ŋ ijtupʌ.

¹¹ Pero te'šejtʌj tzamgopu'ŋopya, juca ʌj o ñe'cʌta'm, y te'šejmis nwʌ'aŋjamdamu.

Maŋba wyinsa'yaju ca'yajupʌ

¹² Y como ndzamgopuŋbatʌs que Cristo winsa'u ca'yajupʌ'ojmoc, ¿jutza' jeque nʌmyajpa metza tuca'y mi'ojmota'mbʌ que ja'n wyinsa'yay te' ca'yajupʌ?

¹³ Porque juca ja'n wyinsa'yay ca'yajupʌ, ni te' Cristo jawyinsa'ʌ.

¹⁴ Juca Cristo jawyinsa'ʌ, comeque tʌs ndzamgopuŋba, y te'šejtijque' comeque mis nwʌ'aŋjamdaŋgue'tpa.

¹⁵ Y quiomʌ'yajpa juca sutzipittʌs ndzamgopuŋba Dios, porque ndzamgopuŋutʌs que yajwinsa'u Cristo Diojsis. Juca wiyuŋšej ja'n wyinsa'yay te' ca'yajupʌ ni ñe'cʌ jawyinsa'ʌ.

¹⁶ Porque juca ja'n wyinsa'yay ca'yajupʌ, ni te' Cristo jawyinsa'ʌ.

¹⁷ Y juca te' Cristo jawyinsa'ʌ, comeque mis nwʌ'aŋjamdamba, y jayajcotocoyjamaj mista'm ŋgowa.

¹⁸ Y juca te'šej, tocoyajuwa'nde' te' ca'yajupa'a ñempe wyʌ'aŋjamyaju Cristo.

¹⁹ Juca na' yʌtijpʌ itcu'yojmotijtʌ njo'ctamba Cristo, más pyʌcpa wa'ytyʌ maya'aŋ to'ya'ŋʌyaju que ja'n mumu pʌn.

²⁰ Pero wiyuŋšej winsa'u te' Cristo ca'yajupʌ'ojmoc. Ñe'cʌte' te' winbʌ winsa'upʌ.

²¹ Porque jujcha' tumʌpʌ pʌnbit ca'anitzʌquiaju, te'šejtijque' tumʌpʌ pʌnbit winsa'yajpa ca'yajupʌ.

²² Porque jujcha'nde' maŋba quia'pʌ'yaju mumu Ada'ŋis wyinboyata'm, te'šejtijque' maŋba yajwinsa'pʌ'yaju mumu Cristo's wyʌ'aŋja'moye.

²³ Pero tumduma'ŋbʌn ñe' ñe'ŋacʌsi, wina winsa'u Cristo, y minba'ca ñe'cʌ, pijche'ca winsa'yajque'tpa ñe'ta'm.

²⁴ Y jʌsa'ca nu'cpa te' co'yajcuy cuando maŋba chi'oquiu'yaju Jesujsis te' aŋgui'mʌtʌjcuy Tyata Dioscʌsi, yajʌcʌ'pʌ'u'ca mumu cowi'nata'm, aŋgui'moye y pʌmi'ʌyajupʌ.

²⁵ Pero maŋba 'yaŋgui'moyu Jesús hasta que myaŋgopajcʌ'pya ñe'cʌ's mumu te' qui'nišajpapʌ's ñe'cʌ.

²⁶ Y te' ultimopʌ enemigo maŋba yajyajupʌ, te'wʌte' te' ca'aŋ.

²⁷ Diojsis quiojtu te' Jesús wa'y 'yaŋgui'moyu mumutiyʌcʌsi. Te' nʌmu'c: Myato'ŋoyjapya ñe'cʌ mumutiyʌ's, nʌctʌ'pyatʌ que ja'n 'yaŋgui'mi Jesujsis te' Dios, te' quiojtupʌ's mumutiyʌ wa'y myato'ŋoyjayaju Jesús.

²⁸ Pero myato'ŋoyjayajpa'ca mumutiyʌ's te' 'Yune Jesús, pijche'cande' te' 'Yune's maŋba myato'ŋoyjayu te' quiojtupʌ's mumutiyʌ ñe' 'yaŋgui'mguquiʌ'mʌ, wa'y 'yaŋgui'mu Diojsis mumutiyʌcʌsi y mumu'iwʌcʌsi.

²⁹ Juca ja'n te'šej, ¿tiyʌcotoya nʌ'yʌyajpa pʌnda'm te' ca'yajupʌ's ñʌquiʌsi, juca nijutz ja'n wyinsa'yay te' ca'yajupʌ? ¿Tiyajca' jeque nʌ'yʌyajpa ca'yajupʌ's ñʌquiʌsi?

³⁰ ¿Y tiyajca'sʌ'ŋdʌ macnaca itpa na'chaŋda'mbʌ tiyʌ'ojmo?

³¹ Y ndareatzamba'ʌs que tumdumʌ jama ca'a'ŋojmo'ʌs ŋguenba nwin. Yʌ'še'ʌj nʌmba, atzita'm, y nwʌcotzamdamba'ʌsmij tʌ Ngomi Jesucristopit.

³² Juca pʌnše'ʌj quipsopya, ¿tiya'mʌs nʌwʌ'ajpa juca nʌquipyaju'ʌs yatzi copʌnda'm Efeso'ojmo? Juca ja'nde' wyinsa'yay ca'yajupʌ, cu'tta'mitʌy y ucta'mitʌy ñempetʌ ŋga'tamʌ jomij wʌstʌcmʌy.

³³ Umij ya'iwʌ's 'yaŋgoma'cʌytyamu, juca tumʌtzʌctambatʌ yatzita'mbʌ ndʌwʌji'ŋ, chʌctocoyjayajpa tʌ oye'ajcuy.

³⁴ Coquendamʌ cuenta y tzactamʌ ŋgowa, porque ijtyaju mi'ojmota'm ja'n ñʌctʌ'yapyʌ's yajtiyʌ Diojsisñe'. Nʌjaytyamba'ʌsmij yʌ'šej wa'yʌsmij ndzʌctza'ajtamu.

Jutz maŋba wyinsa'yaju ca'yajupʌ

³⁵ Pero iwʌjutiwʌ nʌmba: ¿Jutza'sʌ'ŋ maŋba wyinsa'yaju ca'yajupʌ? ¿Jutzpʌ cuerpo'asʌ'ŋ maŋba ñʌmiñaju?

³⁶ Njowi. Nijpamis te' tʌmbu, pero maŋba wyinayaju te'wʌ wa'y wyo'mbujtu te' 'yay.

³⁷ Y te' mismopʌ tʌmbu nijpupʌmis ja'n maŋu wyo'mbujtu, sino que tʌmbutijque', juca te' trigo o eyaco tʌmbu.

³⁸ Pero Diojsis yajwo'mbutjapya tyunu šunušej. Y tumdumʌpʌ tʌmbu wo'mbutpa jutzpʌtʌ nijpu.

³⁹ Mumu sis ja'nde' tumʌco sis, pero wiyuŋšej tumʌco siste' te' pʌ'nista'mñe', y eyaco sis te' copʌ'nista'mñe', y eyaco sis te' coque'sta'mñe', y eyaco sis te' sitijtyajpapʌ'sñe'.

⁴⁰ Y ijtyaju cuerpo tzajpis quiowindzʌmbapʌ, y cuerpo najsis quiowindzʌmbapʌ. Pero wiyuŋšej eyapʌte' te' sa'sa'ajcuy te' tzajpis quiowindzʌmbapʌ'sñe', y eyapʌ te' najsis quiowindzʌmbapʌ'sñe'.

⁴¹ Eyapʌ te' chi'muŋgʌ' jama'sñe', y eyapʌ te' chi'muŋgʌ' te' poya'sñe', y eyapʌ te' chi'muŋgʌ' te' matza'sta'mñe'. Y tumdumʌpʌ matza'sta'mñe' eyata'mdij chi'muŋgʌ'.

⁴² Te'šejtijque' wa'y wyinsa'yaju te' ca'yajupʌ. Ñipyajpa putzpʌ'papʌ cuerpo, y maŋba wyinsa'u ja'na pyutzpʌ'ipʌ.

⁴³ Ñipyatʌjpa ja'n myʌja'ŋbʌ cuerpo, y maŋba wyinsa'u mʌja'ŋbʌ. Ñipyatʌjpa mochipʌ, y maŋba wyinsa'u pʌmi'ʌyupʌ.

⁴⁴ Ñipyatʌjpa te' sispʌ cuerpo, y maŋba wyinsa'u espiritupʌ. Ijtu sispʌ cuerpo y ijtu espiritupʌ cuerpo.

⁴⁵ Y yʌ'šej ja'yʌquie'tu: Te' winbʌ pʌn Adán, quenbapʌ pʌnde' inʌc. Y te' ultimopʌ Adán, espiritute' šajpapʌ's iscuy-quenguy.

⁴⁶ Pero te' espiritupʌ ja'nde' wina, sino que te' sispʌ, y jʌsa'ca, te' espiritupʌ.

⁴⁷ Te' winbʌ pʌn nascʌsipʌ, y naspʌte'. Y te' myetzo'mopʌ, tʌta'mde' Ngomi, te' minupʌ tzajpojmoc.

⁴⁸ Ijtušej te' naspʌ pʌn, te'šejtijque' nascʌsi ijtyajupʌ. Y ijtušej te' minupʌ tzajpojmoc, te'šejtijque' te' wyʌ'aŋjambapʌ's ñe'cʌ.

⁴⁹ Jujcha'nde' te' naspʌ tujcupʌ pʌnšejtʌ quendamba, te'šejtijtʌ maŋba ŋguendaŋgue'tu te' tzajpojmoc minupʌšej.

⁵⁰ Ndzamjaytyamba'ʌsmij jeque, atzita'm, que tʌ naspʌ cuerpo's ja'n maŋu pyʌjcʌchoŋu yajtiyʌ aŋgui'mbamʌy Dios, ni te' putzpʌ'papʌ's ja'n maŋu ijtu pyarte te' ja'n pyutzpʌ'ipo'mo.

⁵¹ Y yʌtij maŋba'ʌsmij ndzamjaytyamu tumʌ tiyʌ jayajqueyapʌ Diojsis wina: Wiyuŋšej ja'ndʌ mumu maŋu ŋga'tamu, pero mumu tʌ maŋba cacpʌ'tamu,

⁵² pero jʌnʌjtij quenmecša'ŋoyj maŋba'ca yajwejyaju te' co'yajcu'yojmopʌ mu'cuy. Maŋba yajwejyaju te' mu'cuy y maŋba wyinsa'yaju te' ca'yajupʌ wa'y jana pyutzpʌ'yaju, y tʌta'm maŋbatʌ cacpʌ'tamu.

⁵³ Porque ijtupʌte' pyena wa'y quiacpʌ'u yʌ' putzpʌ'papʌ tʌ ŋgüerpo ja'n pyutzpʌ'ipʌ cuerpopit, y wa'y quiacpʌ'u yʌ' ca'papʌ cuerpo ja'n quia'epʌ cuerpopit.

⁵⁴ Y cacpʌ'u'ca yʌ' putzpʌ'papʌ cuerpo ja'n pyutzpʌ'ipʌ cuerpopit, y cacpʌ'u'ca yʌ' ca'papʌ cuerpo ja'n quia'epʌ cuerpopit, pijche'c maŋba tyujcu te' ja'yʌyušej: Jyaspejpʌ'u Cristo's te' ca'aŋ ñʌwʌ'aju'c.

⁵⁵ ¿Juta' ijtu te' ca'a'ŋis pyʌmi wa'ytyʌ yajtoyapʌctamu? ¿Juta' ijtu te' ca'a'ŋis pyʌmi wa'ytyʌ yajtzʌ'yu?

⁵⁶ Te' ca'a'ŋis muspatʌ yajtoyapʌjcu te' tʌ ŋgowapit, y te' cowa's ijtu pyʌmi te' aŋgui'mgupyit.

⁵⁷ Pero nʌjapyatʌ Dios yʌscotoya, porque ñe'cʌ'stʌ yajnʌwʌ'ajtamba tʌta'm Ngomi Jesucristopit.

⁵⁸ Te'cotoya uy tzactame te' Tuŋ, ʌs sunbapʌ atzita'm, pero paquic ittamʌ, y tzʌcjojcʌtʌcjaytyamʌ tʌ Ngomi's yoscuy. Mustamba'mis que ja'nmis comeque nyosjaytyame tʌ Ngomi.