1 Corintios 13 - Zoque Copainalá New Testament

Wiyuŋšej su'nopyapʌ

¹ Juca ʌs ndzamba pʌ'nista'm y angelejsista'm 'yotowe, pero juca ja'nʌj su'noy, lata aŋjʌquiʌšejpʌtijte' ʌs ndzame, o jujcha' quijliŋbapʌ tʌ'ŋguyšej.

² Y juca muspa inʌjcʌj ndza'maŋwa'oyu, y juca nʌctʌ'pyʌ'pa inʌjcʌs mumu jayajqueyapʌ tiyʌ wina Diojsis, y mumu mujsoquiuy, y juca nʌ'itpʌ'pa inʌjcʌs mumupʌ wʌ'aŋja'moquiuy muspa'cše'ŋo'yʌs inʌc nyajtzu'cumyaju cotzʌc wa'y myaŋyaju emʌ, pero juca ja'nʌj su'noy, yajtiyʌ'ʌjte'.

³ Y juca nwe'nbʌ'pa'ʌs inʌc mumu ndiyʌta'mʌs ijtupʌ wa'yʌs mbʌ'nʌyaju pobre, y juca ndzi'oquia'pa'ʌs inʌc ŋgüerpo wa'y pyoŋbʌ'jayaju, pero juca ja'nʌj su'noy, yajtiyʌ'ʌs ja'n nʌwʌ'ay.

⁴ Pyʌ'mgopajcʌpya te' su'nopyapʌ's cuando eyapʌ's chʌcjapya toyʌ, y te' su'noquiuy oyepʌte'. Ja'n quiʌjowe te' su'nopyapʌ, ni ja'n myʌja'ŋdzʌqui wyin, ni ja'n tye'ngui'mi.

⁵ Sa'sa tʌŋʌŋñapya, y ja'n ñe'tij mye'tze, ni ja'n myawʌqui'šca'e, ni ja'n quipsi juca nʌ chʌcjayaju toya.

⁶ Ja'n ñʌ'ome ja'n jyustopʌ tiyʌ, sino ñʌ'omba wiyuŋšejpʌ tiyʌ.

⁷ Te' su'nopyapʌ's pyʌ'mgopajcʌpya mumu toyapʌjcu'yojmo, wyʌ'aŋjamba mumutiyʌ, jyo'cpa mumutiyʌ, y pyʌ'mgopajcʌpya mumutiyʌ.

⁸ Te' su'noquiuy yajujche'c ja'n yaye. Maŋba cha'maŋwa'aŋjejyaju, y jujche'ŋ Espiritupitpʌ otowe maŋba yaju, y te' mujsoquiuy maŋba yaju.

⁹ Porque wenetijtʌ mustamba, y wenetijtʌ ndza'maŋwajtamba.

¹⁰ Pero minba'cande' te' más cota'nupʌ, pijche'c maŋba yaju te' jaquiota'ñapʌ.

¹¹ Une'cma'ʌj, unešej inʌjcʌj otoŋba, unešej inʌjcʌj quipsopya, unešej inʌjcʌj cʌme'tzopya. Pero tzambujtu'camʌj ndzajcu'ʌs une'ajcu'yis chʌqui.

¹² Yʌtij ŋguendambatʌ jujcha' pi'tzo'mo ijtupʌ espejo'ojmošej, pero pijche'ca maŋbatʌ nawinʌque'nʌtʌjtamu. Yʌtij muspa'ʌs wenetij, pijche'ca maŋba'ʌs muspʌ'u mumu, jujcha' Diojsisʌj ispʌcpa.

¹³ Pero itjojcʌtʌcpa yʌ' tuca'ytya'mbʌ: Wʌ'aŋja'moquiuy, jo'coquiuy y su'noquiuy. Pero te' más mʌja'ŋbʌ ñe'co'mocta'm, te'wʌte' te' su'noquiuy.