1 Corintios 12 - Zoque Copainalá New Testament

Wi'ni eyata'mbʌ tzi'ʌtʌjcuy šajpa te' Espiritu's

¹ Sunba'ʌs atzita'm wa'mis mustamu tiyʌta'mbʌ tzi'ʌtʌjcuy tʌ tzi'tamba te' Espíritu Santo's.

² Mustambamis que cuando ŋguiowatzʌquita'mbʌ'cmajmij nyajtuŋdocoyajumij, y ŋgo'ŋdambamis inʌc umata'mbʌ comichʌqui porque ñʌmawʌtʌjtamumij.

³ Te'cotoya nyajmustamba'ʌsmij que ya'iwʌ tzamdzamnapyapʌ Diojsis 'Yespiritupit ja'n musi ñʌmu: Diojsis wyi'naŋdʌjqui tocoyupʌte' te' Jesús. Y ya'iwʌ ja'n musi ñʌmu juca ja'n Espíritu Santopit: Jesús tʌte' Ngomi.

⁴ Pero ijtyaju wi'ni eyata'mbʌ tzi'ʌtʌjcuy, pero te' tumʌpʌ Espiritu'stʌte' tzi'tamba.

⁵ Y itque'tu wi'ni eyata'mbʌ yoscuy, pero te' tumʌpʌ Comi'stʌte' tzi'tamba.

⁶ Y itque'tu wi'ni eyata'mbʌ tzʌqui, pero te' tumʌpʌ Diojsiste' chʌcpa mumutiyʌ mumu pʌ'nojmo.

⁷ Yajquejpa te' Espiritu's tumduma'ŋbʌ'nis chi'ʌtʌjcuy wa'y ñʌwʌ'ajyaju mumuta'mbʌ pʌ'nis.

⁸ Tuma'ŋbʌn Diojsis yajtzamba mujsoquiuy te' Espiritupit, y eyapʌ pʌn yajtzamba nʌctʌ'yoquiuy te' mismopʌ Espiritupit.

⁹ Y eyapʌ yajwʌ'aŋja'mopya te' mismopʌ Espiritupit, y eyapʌ yajtzojcopya te' mismopʌ Espiritupit.

¹⁰ Y eyapʌ chi'pa Diojsis wa'y chʌjcu isaŋwʌ'ajcuy, y eyapʌ wa'y cha'maŋwa'oyu. Y eyapʌ wa'y myujsu juca oyepʌ o yatzita'mbʌ espíritu. Y eyapʌ wa'y chamu wi'ni eyata'mbʌ espiritupitpʌ otowe. Y eyapʌ wa'y chamgʌtʌjcu espiritupitpʌ otowe.

¹¹ Pero chi'pa te' mismopʌ Espíritu Santo's mumu yʌ'šejta'mbʌ tiyʌ, y wye'nbʌ'japya tumduma'ŋbʌn jutz šunbašej ñe'cʌ's.

Tumʌpʌ cuerpošejta'mbʌtʌyʌ' mumu

¹² Jujcha'nde' tʌ ŋgüerpo tumʌpʌtijte' y ijtu sone tiyʌta'm, y ñempe sone tiyʌta'm ijtu tʌ ŋgüerpo's, tumo'pyʌ cuerpote'. Te'šejtijque' te' Cristo's cuerpo.

¹³ Porque te' tumʌpʌ Espiritupit tumʌpʌ cuerpo'ajtamutʌ mumu, jujcha' nʌ'yʌ'oquiu'yojmošej, juca judío o juca griego, juca coyospapʌ o librepʌ. Y mumu tʌ jo'ʌytyamu te' tumʌpʌ Espíritu Santo's.

¹⁴ Te'šejtijque' tʌ ŋgüerpo ja'nde' tumʌpʌ tiyʌ, soneta'mbʌ tiyʌte'.

¹⁵ Juca inʌc nʌmba tʌ ne'ŋbac: Ne'ŋbacti'ʌjyʌ' y ja'nʌjyʌ' cʌ', te'cotoya ja'nʌjyʌ' cuerpo'sñe'. ¿Te'cotoya ja'nsʌ'ŋde' cuerpo'sñe'?

¹⁶ Y juca inʌc nʌmba tʌ ndatzʌc: Tatzʌcti'ʌjyʌ' y ja'nʌjyʌ' witʌm, te'cotoya ja'nʌjyʌ' cuerpo'sñe'. ¿Te'cotoya ja'nsʌ'ŋde' cuerpo'sñe'?

¹⁷ Juca inʌc mumu tʌ ŋgüerpo witʌ'majpʌ'pa, ¿juta'sʌ'ŋ inʌc itpa tʌ ŋgowi? Y juca mumu cowiwo'ajpa tʌ ŋgüerpo, ¿juta'sʌ'ŋ inʌc itpa tʌ ŋguinʌ?

¹⁸ Pero quiojtu Diojsis tumdumʌpʌ tiyʌ tʌ ŋgüerpo'sñe' tʌ ŋgüerpo'ojmo jutz šunu ñe'cʌ's.

¹⁹ Juca tumʌpʌ tiyʌ inʌc mumu tʌ ŋgüerpo's tyiyʌjanatiyʌ, ¿itpasʌ'ŋ cuerpo?

²⁰ Pero wiyuŋšej sone tiyʌta'm ijtyaju, pero tumʌtij tʌte' ŋgüerpo.

²¹ Ja'n musi ñʌjayu tʌ nwitʌ'mis tʌ ŋgʌ': Ja'ʌsmij nyajyose. Te'šejtij ja'n musi ñʌjayu tʌ ŋgopajquis tʌ ne'ŋbac: Ja'ʌsmij nyajyose.

²² Pero hasta te' ŋgomʌ'pyapʌtʌ ja'n yojšapyʌ tiyʌ tʌ ŋgüerpo'sñe', yojšajpapʌte'.

²³ Y te' ŋgomʌ'pyapʌtʌ que ja'n jene ša'sata'mbʌ tiyʌ tʌ ŋgüerpo'sñe', yʌ'ta'mbʌ tʌ más sa'sa nyajmequia'tamba. Y te' ja'ndʌ nyajquejyapyʌ, te'ta'mbʌtʌ más oye nyajmequia'tamba.

²⁴ Porque tʌ ŋgüerpo's más sa'sata'mbʌ tiyʌ ja'n yajtiyʌ šuñay, porque Diojsiste' chʌcjayu tʌ ŋgüerpo, y 'yaŋsunicojtu te' más tiquijanatiquita'mbʌ

²⁵ wa'y ñayosjayatʌju ñe'co'mo, y te'šej tumdumʌpʌ tiyʌ's tyumʌ'ajcu'yoyj wa'y ñaquiotzoŋyatʌju.

²⁶ Juca tumʌpʌ tiyʌ toyapʌcpa, myuma'ŋgʌ'y toyapʌquiajpa ñe'cʌji'ŋ. Juca tumʌpʌ oma'oma itpa, myuma'ŋgʌ'y oma'oma ijtyajpa ñe'cʌji'ŋ.

²⁷ Pues mijta'mde' te' Cristo's cuerpo, y tumduma'ŋbʌn te' cuerpo's tyiyʌ'iwʌ.

²⁸ Y quiojtu Diojsis te' tu'mʌquiu'yojmo winbʌ cʌ'wejta'm, y myetzo'mo tza'maŋwa'oyajpapʌ, tyuca'yojmo aŋma'yoyajpapʌ. Quiotque'tu chʌquiajpapʌ's isaŋwʌ'ajcuy, y ijtyajupʌ's tzi'ʌtʌjcuy wa'y yajtzojcoyaju, y cotzo'ŋoyajpapʌ, y aŋgui'moyajpapʌ, y chamyajpapʌ's wi'ni eyata'mbʌ espiritupitpʌ otowe.

²⁹ ¿Mumusʌ'ŋ cʌ'wejta'm? ¿Mumusʌ'ŋ tza'maŋwa'oyeta'm? ¿Mumusʌ'ŋ aŋma'yoyeta'm? ¿Mumusʌ'ŋ chʌquiajpa isaŋwʌ'ajcuy?

³⁰ ¿Mumusʌ'ŋ ijtyaju chi'ʌtʌjcuy wa'y yajtzojcoyaju? ¿Mumusʌ'ŋ chamyajpa wi'ni eyata'mbʌ espiritupitpʌ otowe? ¿Mumusʌ'ŋ muspa chamgʌtʌquiaju espiritupitpʌ otowe?

³¹ Cʌñʌñdyamʌ jeque ndumʌtzocoy te' más oyeta'mbʌ tzi'ʌtʌjcuy. Pero maŋba'ʌsmij nyajquendamu te' más oyepʌ tuŋ.