1 Corintios 10 - Zoque Copainalá New Testament

Aŋnʌctza'mʌytyambatyʌ uytyʌ ŋgʌna'tzʌytyamu comichʌqui

¹ Sunba'ʌs wa'mis mustamu, atzita'm, que mumu tʌ ndatajta'm tu'ŋajyaju o'nacʌ'mʌ. Y mumupʌ's quiotʌtzjaquiaju te' mar.

² Y mumu tumʌtzʌquiaju Moisesji'ŋ te' o'napit y te' marpit nʌ'yʌ'oquiu'yojmošej.

³ Y myuma'ŋgʌ'y quiu'tyaju te' tumo'pyʌ cu'tcuy chi'yajupʌ Diojsis.

⁴ Y myuma'ŋgʌ'y 'yuquiaju tumo'pyʌ ujcuy chi'yajupʌ Diojsis, porque 'yuquiajpa inʌc te' ujcuy te' Diojsis chi'yajupʌ tza'ojmoc, te' quio'ŋyajpapʌ's inʌc. Y te' tza', Cristote'.

⁵ Jayajtzocopyaquia Dios wʌwʌta'mbʌ's, te'cotoya yejcʌne'quiaju ja'itʌnʌmʌmʌy.

⁶ Pero yʌ'šejta'mbʌ tiyʌ tujcu wa'ytyʌ njʌ'ctzʌ'ytyamu nwin, uytyʌ aŋsundamu'ŋmʌjcʌ yatzita'mbʌ tiyʌ, jujcha' ñe'cʌ'sta'm 'yaŋsuñaju.

⁷ Ni umis ŋgʌna'tzʌytyamu comichʌquita'm, jujcha' ñe'co'mota'mbʌ's chʌquiajušej. Yʌ'šej ja'yʌyu: Pocšaju te' pʌnda'm wa'y quiu'tyaju y 'yuquiaju, y tzu'cumyaju wa'y maŋu myʌjtzʌyaju.

⁸ Ni uytyʌ ispʌquitzʌctamu, jujcha' ñe'co'mota'm ispʌquitzʌquiaju, y ca'yaju tumʌpʌ jamo'oyj ips-co-tuca'y mil.

⁹ Ni uytyʌ ndzʌjquistamu Cristo, jujcha' ñe'co'mota'mbʌ's chʌjquišaju, y tza'nista'm yajca'yatʌju.

¹⁰ Ni uy cʌ'oto'ŋʌ'oytyame, jujcha' ñe'co'mota'mbʌ cʌ'oto'ŋʌ'oyaju, y yajca'yatʌju yajca'opyapʌ's.

¹¹ Y quiʌtʌcjayaju ñe'cʌta'm yʌ'šejta'mbʌ tiyʌ's wa'ytyʌ njʌ'ctzʌ'ytyamu nwin. Y ja'yʌyaju wa'ytyʌ aŋmaytyamu, porque tʌta'm co'yajcu'yojmotya'ndʌyʌ' ittamu.

¹² Te'cotoya iwʌ's quiomʌ'pya juca paqui ijtu choco'yojmo, yajcoquena cuenta uy quiowapa'te.

¹³ Ja'yoc'isʌtʌjtamʌmajmij más que ñempe'iwʌ pʌnšej. Pero justopʌte' Dios, y ja'nmij maŋu ñchi'oquia'ʌtʌjtamu wa'mij 'yoc'isʌtʌjtamu ja'nmis mbʌ'mgopajcʌytyame'cše'ŋoyj. Ñe'cʌ'smij maŋba ŋguiotzoŋdamu wa'mij mbyuttamu oye y wa'mis mujsu mbʌ'mgopajcʌytyamu te' oc'isoquiuy.

¹⁴ Te'cotoya tʌwʌy, poyjaytyamʌ comichʌquicʌna'tzʌ'oquiuy.

¹⁵ Oto'ŋʌytyamba'ʌsmij mujsoyajpapʌ pʌnšej. Nʌctʌ'ytyamʌ ne'cʌ tiyʌ'ʌste' ndzamba.

¹⁶ Nʌjaytyamu'candʌ Dios yʌscotoya, mbʌcpatʌ te' nicomasa'nʌyupʌ vaso, ¿y ja'nsʌ'ŋdʌ nicomasa'nʌytyame muma'ŋgʌ'y Cristo's te' ñʌ'pinbit? Y nwe'nbʌ'tamu'candʌ te' pan y ŋgu'ttamu'candʌ muma'ŋgʌ'y, ¿ja'nsʌ'ŋdʌ nicomasa'nʌytyame muma'ŋgʌ'y Cristo's te' ñe' cuerpopit?

¹⁷ Tumʌtij te' pan, y soneta'mbʌtʌyʌ', pero nwe'nbʌ'patʌ y mbʌcpatʌ tumʌpʌ pan, te'cotoya tumʌtzʌctambatʌ tumʌpʌ cuerpo'ojmo.

¹⁸ Quipstamʌ te' najsacopajcʌsipʌ Israel-pʌngʌsita'm, te' quiʌ'šajpapʌ's inʌc te' yajca'yajupʌ tzi'oquiuy te' alta'raŋi. ¿Ja'nsʌ'ŋde' nicomasa'nʌyatʌjupʌte' tyumʌcʌ'šajpa'ŋmʌjcʌ te' altarcʌsipʌ cu'tcuy?

¹⁹ ¿Tiya'mʌs jeque ndzamba? ¿Tiyʌ'iwʌsʌ'ŋde' te' comichʌqui? ¿O tiya'sʌ'ŋde' te' yajca'yajpapʌ tiyʌ comichʌqui's ñʌquiʌsi?

²⁰ Tiyʌ tzi'oquiuy yajca'yajpa te' ja'n ispʌquiapyʌ's Dios, yajca'yajpa demonio's ñʌquiʌsi y ja'n Diojsis ñʌquiʌsi. Y ja'ʌs suni wa'mij ñdyumʌcu'ttamu te' demonioji'ŋda'm.

²¹ Ja'nmij musi 'yuctamu tʌ Ngomi's vyaso'ojmo y demonio's vyaso'ojmo. Ja'nmij musi ŋguiu'ttamu tʌ Ngomi's myesa'ojmo y demonio's myesa'ojmo.

²² ¿Oyesʌ'ŋ wa'ytyʌ nyajcʌjoŋu tʌ Ngomi? ¿Masʌ'ŋdʌ pʌmi'ʌytyamu que ja'n ñe'cʌ?

Pyʌcpa wa'ytyʌ našunʌtʌjtamu

²³ Ʌj, ja'nʌj yajwinduqui yajtiyʌcʌsi aŋgui'mgu'yis, pero ja'n mumutiyʌ pyʌqui. Ʌj, ja'nʌj yajwinduqui yajtiyʌcʌsi aŋgui'mgu'yis, pero ja'n mumutiyʌ pyaquitzi'oy.

²⁴ Uy me'tzu ya'iwʌ's na' ñe' 'yoye'ajcuy, sino que eyapʌ'sñe' 'yoye'ajcuy.

²⁵ Muspamis ŋgʌ'stamu tiyʌta'm mya'ʌyajpapʌ sis-ma'a'ojmo, y uy yajtiyʌ cʌ'aŋwa'ctame te' ndzoco'yo'c quipsoquiupyit.

²⁶ Porque te' nas y tiyʌta'm ijtu te'wʌcʌsi tʌte' Ngomi'ste'ñe'.

²⁷ Y juca iwʌjutiwʌ ja'n wyʌ'aŋja'mopyʌ's 'yaŋbʌctambamij wa'mij ñʌcu'ttamu y sunbamij myaŋu, tiyʌta'm mij ŋguiotjaytyamba nwi'na'ŋoyj, cu'ttamʌ, y uy cʌ'aŋwa'ctame yajtiyʌ te' tzoco'yo'c quipsoquiupyit.

²⁸ Pero juca iwʌjutiwʌ'smij ñchamjapya: Yʌ'wʌ yajca'yajupʌyʌ' comichʌqui's ñʌquiʌsi, uy cu'ttame, porque te'wʌ'smij ñchamjayu, y porque muspa jyopi'tu choco'yo'c quipsoquiuy. Porque te' nas y tiyʌta'm ijtu te'wʌcʌsi tʌte' Ngomi'ste'ñe'.

²⁹ Ndzamba'ʌs ñe' choco'yo'c quipsoquiuy ja'n misne', sino que te'wʌ'sñe'. ¿Tiyajca'ʌj jeque minba cʌme'tzu te' ʌs ndzʌcpapʌ tiyʌ oyepʌ ndzoco'yo'c quipsoquiupyit te' eyapʌ pʌ'nis, ñe' choco'yo'c quipsoquiupyit?

³⁰ Juca nʌjapya'ʌs Dios yʌscotoya jujche'ŋ naca'ʌj cu'tpa, ¿tiyajca'mʌj yatzicotzamyajpa nʌmba'ŋmʌjcʌ'ʌj yʌscotoya?

³¹ Jujche'ŋ nacamij ŋguiu'ttamba, o 'yuctamba, o ndzʌctambamis eyapʌ tiyʌ, tzʌctamʌ mumu wa'y quieju Diojsis myʌja'ŋajcʌ'.

³² Uy yajpacwinductame judiota'm, ni te' griegota'm, ni te' Diojsis tyu'mʌquiuy.

³³ Ʌs ndzʌcme'tzpa'ʌs wa'yʌs nyajtzocopyajcu mumu pʌn mumu ʌs ndzʌcpapʌ tiyʌpit. Ja'ʌs me'tze ne' nwingotoya tiyʌ'iwʌ nʌwʌ'aju, sino que wa'y ñʌwʌ'ajyaju wʌwʌ pʌ'nis wa'y quiotzoquiaju.