Zechariah 7 - Zo Bible

A Kineitawm Antanna Kimawsah

¹ Kumpi Darius in a uh a kum lina, Chislev a kici a hla kuo na, a ni li ni-in, Zechariah tungah Topa’ thu tung hi.

² Tu-in Bethel mite in Sharezer le Regem-melech, a mite utawh Topa’ tungah a thum dingin a sawl vua,

³ Vanglien Topa’ inn sunga siempute le kamsangte kungah, “Kum tampi sung ka bawlsa bangin a hla ngana sung kapin antang lai ding ka hi uh amah?” ci-in a dongsah hi.

⁴ Tua ciengin ka kungah Topa’ thu ang tung hi:

⁵ Gam sung mi zosie le siempute kungah tam bangin gen in: Tam kum sawm sagi sung a hla ngana le a hla sagina sungin an tangin na kaa uh ciengin tua khu kei adinga antang na hi uh amah?

⁶ Note in na neh na dawn uh ciengin noma dinga an ne tui dawn hi lo na hi uh amah?

⁷ Jerusalem ah mite tengin a kimvela khuote tawh a nopsah lai le Negeb le Shephelah ah mite a ten lai-in kamsangte tungtawnin Topa thugente tam thute ma hi lo amah?

Pasien’ Kalhte Nielna Zieha Dan Thuohna

⁸ Zechariah tungah Topa’ thu tungin tam bangin ci hi:

⁹ Vanglien Topa in tam bangin gen hi: A manin thukhen unlen khatlekhat tungah migitna le hepina kilah un.

¹⁰ Meigong, taga, pemta, ahi sihle mizawngte gawt sih un; na lungsim sung vuah khatlekhat kisietsah nading gel sih un.

¹¹ Hizongle amate in ngai nuom loin lungkhau tahin a liengko uh a heisan vua, a zah lo nadingun a bil a hum uhi.

¹² Thukham le Vanglien Topa in kamsang masate tungtawnin ama’ hlagau tawh a gen thute a zah lo nadingun amate in a lungsim a khausah uhi.

¹³ Keima in amate ka hlat ciengin a zah lo uh bang lienin amate in keima ei hlat ciengun ken zong ka za sih ding hi, Vanglien Topa in ci hi.

¹⁴ Tuale keima in a thei ngai nai vawt lo uh minamte lahah amate pumpei tawh ka thezah ding hi. Tua bangin a nuasie uh leitang gamkhing suoh a, tuaci’n gam nuom kimlai koima’ suhva tova nawn lona gamdai a suohsah uhi.