Zechariah 6 - Zo Bible

Mangmuna Gietna: Leeng Lite

¹ Tuale khatvei ka khuodah leh sumngo muol ni kikal panin leeng li ang pusuoh ka mu hi.

² A leeng amasa pen sakol sante in kai a, a nina sakol vomte,

³ a thumna sakol kangte, le a lina sakol pawlte in kai uhi.

⁴ Tua ciengin ei hopi vantungmi kungah, “Ka pu aw, tamte bang ahiei?” ka ci hi.

⁵ Vantungmi in keima kungah, “Tamte pen leitung buppi a uh Topa mai-ah a kilaa zaw cieng vua ang pusuoh vantung huipi lite ahi hi,” ei ci hi.

⁶ Sakol vomte’ kaih leeng in leilu lam gam manaw-in pei a, sakol kangte’ kaih leeng in nitumna lam gam zuonin pei-in, sakol pawlte’ kaih leeng in leitaw lam manaw-in a pei hi,” ei ci hi.

⁷ A thahat sakolte ang pei ciengun leitung a vil kawikawi ding uh a ngahla mama uhi. Tuale ama in, “Pei-in leitung va vil un,” a ci hi. Tuaci’n amate in leitung a vil uhi.

⁸ Tua ciengin ama in kei ei awhsan a, “En in, leilu lam gama peite in leilu lam gamah keima’ hlagau a tawlngasah uhi,” ei ci hi.

Kumpi Lukhu Singba Kikhusah

⁹ Topa’ thu ka tungah ang tung hi:

¹⁰ Babylon pana ang tung saltangte-Hedai, Tobijah, le Jedaiah-tung panin ngun le khamte khawm in; khum ni ma-in Zephaniah’ tapa Josiah’ inn ah pei in.

¹¹ Nang in ngun le khamte la-in kumpi lukhu khat bawl inlen, Jehozadak’ tapa siempu lien pa Joshua khusah in.

¹² Ama kungah tam bangin gen in: Vanglien Topa in tam bangin ci hi: Tami sungah a min Singba a kici mipa khat a om hi: azieh pen ama’ munah ba mengin Topa’ biehinnpi a lam ding hi.

¹³ Topa’ biehinnpi lam ding pa khu ama ahi hi; ama in kumpite’ nga zatahna nga ding a, a kumpi topha tungah to-in a uh ding hi. A kumpi topha gei-ah siempu khat om ding a, ama ni kikalah lungmuongin kitheitelna a om ding hi.

¹⁴ Tua kumpi lukhu pen Topa’ biehinnpi sungah phawna-in Heldai, Tobijah, Jedaiah, le Zephaniah’ tapa Josiah-te kep dingin ki-ap ding hi.

¹⁵ A gamla panin mite hing pei-in Topa’ biehinnpi a lam hu ding uhi; tuale Topa in note kunga keima ei sawl lam na thei ding uhi. Topa na Pasien uh’ thu na man nah po uleh tam thu ang pieng ding hi.