Zechariah 4 - Zo Bible

Mangmuna Ngana: Meivah Tunna le Olive Kungte

¹ Kei ei hopi vantungmi ang kilekia a, mi khat a kimutna pana a kiphawn bangin ei phong hi.

² Ama in keima kungah, “Bang na mu ei?” ei ci hi. Tuale keima in, “A tunga hai khat a nei, kham tawh a kibawl meivah tunna khat ka mu hi; tuami tungah meivah sagi om a, a dawnah kam sagi ciet a nei meivah sagi a om hi.

³ Tuami gei-ah olive kung ni om a, khat pen hai ziet lamah, adang khat pen hai vei lamah a om hi,” ka ci hi.

⁴ Keima ei hopi vantungmi kungah, “Ka pu aw, tamte bang ahiei?” ka ci hi.

⁵ Tua ciengin keima ei hopi vantungmi in, “Tamte na thei sih amah?” ci-in ei dawng hi. Keima in, “Thei sing, ka pu aw,” ka ci hi.

⁶ Ama in keima kungah, “Tami pen Zerubbabel kunga a tung Topa’ kammal ahi hi: Thagumhatna hang hi lo, vanglietna hang zong hi lo, keima’ hlagau hang beh tawh ahi hi, Vanglien Topa in ci hi.

⁷ Muol golpi aw, nang bang na hei? Zerubbabel mai-ah zangtam na suoh ding hi; mite in, ‘Hepina, ama tungah hepina!’ ci-in a awh kawmin ama in inntung khupna suong puokhie ding hi,’ ci-in,” ei ci hi.

⁸ Tua banah keima kungah Topa’ thu ang tung a,

⁹ “Zerubbabel’ khut in tam inn khuombul phut zo hi.; ama’ khut tawh a zo sieng ding hi. Tua ciengin Vanglien Topa in na kung vua keima ei sawl ahi lam note in na thei ding uhi.

¹⁰ Bangzieh ahei cile thuneu’ bawl ni a simmaw mi poma a lungdam ding vua, Zerubbabel khut sunga a om tena suongkhai a mu ding uhi. “Tami sagite pen leitung buppi a encih Topa’ mittangte ahi hi,” a ci hi.

¹¹ Tua ciengin ama kungah, “Meivah tunna ziet lam le vei lama a om tami olive kungte bang ahiei?” ka ci hi.

¹² Tuale a ni veina ama kungah, “Kham penglawng ni tegel tawh sathau kisunna tami olive singba ni tegel bang ahiei?” ka ci hi.

¹³ Ama in kei kungah, “Tamte bang ahei ci na thei sih amah?” ei ci hi. Keima in, “Thei sing, ka pu aw,” ka ci hi.

¹⁴ Tua ciengin ama in, “Tam tegel pen leitung buppi a uh Topa kunga a ding sathau a kinusa mi nite ahi uhi,” ei ci hi.