Zechariah 2 - Zo Bible

Mangmuna Thumna: Tena Khautawi Mi Khat

¹ Ka ento leh a khut sungah tena khau a tawi mi khat ka mu hi.

² Tua ciengin keima in, “Hei-a pei ding na hei?” ci-in ka dong hi. Ama in, “Jerusalem khuopi adung avai bangtan a pha ei ci-a ka thei nadinga a te ding ka hi hi,” ci-in ei dawng hi.

³ Tua ciengin ei hopi vantungmi pen a malam nawtin pei a, tuale vantung midang khat ma in a malam nawtin na dawntuo hi,

⁴ tuale ama kungah, “Tai inlen tua tangvalpa kungah, “A sungah mihonpite le gangingte tampi a op ziehin kulpi a nei lo khuotate bangin Jerusalem ah mi kiteng ta ding hi.

⁵ Bangzieh ahei cile ama kimvelah meikuong kulpi-in ka om ding a, a sungah ama’ minthanna ka hi ding hi, Topa in ci hi,” a ci hi.

A Kikal Hun-awng: Saltangte Tunga Thumna

⁶ Khaile! khaile! Leilu lam gam panin taimang in, Topa in ci hi; azieh pen keima in van ningli-a huipi leng bangin gamdangah note kang thezah sieng ta hi, Topa in ci hi.

⁷ Khaile! No Babylon tanu tawh a tengtonte aw, na suohtah nadingun Zion ah tai un.

⁸ Bangzieh ahei cile Vanglien Topa in (a minthanna in kei ei sawl zaw ciengin) note ang bulu minamte tawh kisai-in tam bangin gen hi: A mantahin no ang khoikha pa in keima’ mit nauta a khoikha ahi hi.

⁹ Tu-in en un, keima in amate langkhatah ka khut ka lamto ding a, amate pen a silate uh’ tomgam van a suoh ding uhi. Tua ciengin Vanglien Topa in kei ei sawl lam note in na thei ding uhi.

¹⁰ Jerusalem tanu aw, kipahin la sa in! Azieh pen en in, keima hing pei-in na lah vuah kang teng ding hi, Topa in ci hi.

¹¹ Khum ni ciengin minam tampite in Topa a pawlpi ding vua, amate pen keima’ mi ahi ding uhi; na lah vuah kang teng ding a, Vanglien Topa in keima ei sawl lam note in na thei ding uhi.

¹² Topa in gam siengtho sungah ama’ tanh dingin Judah gam luo ding a, Jerusalem a teelkia ding hi.

¹³ Mi zosie aw, Topa mai-ah sip dide un; azieh pen a tenna mun siengtho panin ama ding khie zo hi.