Zechariah 1 - Zo Bible

A Kisiakia dingin Israel Kihanthawn

¹ Darius in kumpi a sep a kum nina, a hla giet hla-in, Iddo’ tapa Berechiah, a tapa kamsang Zechariah tungah Topa’ thu a tung hi:

² Na pu na pate uh tungah Topa a lungthah mama hi.

³ Tua ahi ziehin amate kungah tam bangin gen in, Vanglien Topa in ci hi: Vanglien Topa in a genna-ah, keima kungah hing kilekia un, tua hile kei zong na kung vuah kang kilekia ding hi, Vanglien Topa in ci hi.

⁴ Nidanga kamsangte in, “Na gitlona lampite ule na gitlo gamtatnate uh panin kilekia un,” ci-a a genna uh na pu na pate bang sih un. Ahi vangin amate in ka thugen za loin thusim lo uhi, Topa in ci hi.

⁵ Na pu na pate uh hei-a om uh ahei? Tua kamsangte a hing zing uh amah?

⁶ Ahi vangin keima in ka nasem kamsangte tunga ka thupieh ahi, ka kammalte le ka thukhamte in na pu na pate uh’ hun lap hi lo amah? Tuaci’n amate kisiakia-in, “Topa in bawl dinga a gelsa bangin i gamtat dan ule i silbawl utawh kituohin eite tunga ang bawl ahi hi,” a ci uhi.

Mangmuna Khatna: Sakol Tunga Tuongte

⁷ Darius in kumpi a sep a kum nina, a hla sawm le khatna, Shebat hla a ni sawmni le li ni-in Iddo’ tapa Berechiah, a tapa kamsang Zechariah tungah Topa’ thu a tung hi; tuale Zechariah in,

⁸ zan lai-in sakol san khat tunga a tuong pasal khat ka mu hi! Guom thuhpi sunga om mui singkungte lahah ama a ding hi; tuale ama nua lamah sakol a san, a buong, le a kangte a om hi.

⁹ Tua ciengin keima in, “Ka pu aw, tam teng bang ahei?” ka ci hi. Kei ei hopi vantungmi in kei kungah, “Amate bang ahei ci kang lah ding hi,” ei ci hi.

¹⁰ Tuaci’n mui singkung lahah a ding mipa in, “Amate pen leitung a vil kawikawi dinga Topa in a sawl mite ahi uhi,” ci-in ei dawng hi.

¹¹ Tua ciengin mui singkung lahah a ding Topa’ vantungmi tawh amate a holim vua, “Leitung ka vil zo ta vua, en in, leitung buppi nuomtahin toi om uhi,” a ci uhi.

¹² Tua ciengin Topa’ vantungmi in, “Vanglien Topa aw, tam kum sawm sagi sung na lungthahna ziehin Jerusalem le Judah khuopite tungah bang tanvei hepi loin om ding na hei?” a ci hi.

¹³ Tua ciengin Topa in kamsiem le henepna tawh ka kihopi vantungmi a dawng hi.

¹⁴ Tuaci’n ka kiholimpi vantungmi in ka kungah, tami thu tam bangin phuongzah in: Vanglien Topa in tam bangin ci hi; Jerusalem le Zion adingin ka laina mama hi.

¹⁵ Tuale a nuom op hit hiet minam tungah ka lung a thah mama hi; bangzieh ahei cile ka lungthahna tawmkhat beh ahi lai-in amate in gimna a nasiesah semsem uhi.

¹⁶ Tua ahi ziehin Topa in tam bangin gen hi, kei Jerusalem ah lainatna tawh ka kilekia zo hi; tua sungah ka inn kilam ding a, Jerusalem tungah tena khau kihlung ding hi, Vanglien Topa in ci hi.

¹⁷ Phuongzah lai in: Vanglien Topa in tam bangin ci hi: Nopsahna tawh ka khuopite a kidimlet ding uhi; Topa in Zion henemkia ding a, Jerusalem a teelkia ding hi.

Mangmuna Nina: Kite le a Khengte

¹⁸ Ka khuodah leh saki li ka mu hi.

¹⁹ Ka kihopi vantungmi kungah, “Tamte bang ahiei?” ci-in ka dong hi. Tuale ama in, “Tamte pen a kithethangsa ahi Judah, Israel, le Jerusalem sakite ahi uhi,” ci-in ei dawng hi.

²⁰ Tua ciengin Topa in siakheng mi li ei lah hi.

²¹ Tuale keima in, “Amate bang bawl ding uh ahei?” ci-in ka dong hi. Ama in, “Koima in a lu a phawh thei lo nadinga Judah a thethang sakite ahi hi; hizongle tamte ahi uleh amate a zausah ding, Judah a thethang ding le a kite uh Judah gam langkhatah a sangkhan minamte’ kite a sattan dinga ang pei uh ahi hi,” ci-in ei dawng hi.