Thukhente 3 - Zo Bible

Gam Sunga A Omlai Minamte

¹ Tam teng pen Canaan gamah galsimna a thei kha nai lo Israel-te ze-et nadinga Topa in a hen minamte ahi uhi.

² (Israel khang sawnsawnte in galsimna a thei nading, nidangin galsimna a thei ngai lote tungah galsim zie a hil nading beh ahi hi.) :

³ Philistia gamuh mi ngate, Canaan-te zosie, Sidon-te, le Baal-hermon Muol panin Lebo-hamath lutna cieng dong Lebanon Muol tunga teng Hiv-te ahi hi.

⁴ Ama in Moses tungtawnin amau’ pu le pate tunga a thupiehsa ahi Topa’ thupiehnate, Israel-te in a mang uh amah ci a kithei nadingin tua teng pen Israel-te ki-zelahna ahi hi.

⁵ Tuaci’n Canaan-te, Hit-te, Amor-te, Periz-te, Hiv-te, le Jebus-te’ lahah Israel-te a teng uhi;

⁶ amate in a tanute uh zi-in la-in amau’ tanute a tapate uh’ zi dingin a pie uhi. Amate in a pasien-te uh a bie uhi.

Othniel

⁷ Topa muna-ah Israel-te a siet gamtat vua, Topa a Pasien uh mangngilin Baal-te le Asherah milimte a bie uhi.

⁸ Tua ahi ziehin Israel-te tungah Topa a sin so a, ama in Aram-naharaim kumpipa Khushan-rishathaim tungah amate a zua hi. Israel-te in kum giet sung Kushan-rishathaim’ na a sem uhi.

⁹ Hinanle Topa tungah Israel-te a kiko ciengun Israel-te’ tanpa dingin Topa in Caleb’ naupa Kenaz’ tapa Othniel a khangsah hi.

¹⁰ Ama tungah Topa’ hlagau tung a, ama in Israel-te thu a khen hi; galsim dingin ama kuon a, tuale Topa in a khut sungah Aram kumpipa Kushan-rishathaim pie a, ama in Kushan-rishathaim a zo hi.

¹¹ Tuaci’n a gam in kum sawmli sung tawlngahna a nei hi. Tua ciengin Kenaz’ tapa Othniel a si hi.

Ehud

¹² Topa muna-ah Israel-te a siet gamtat kia uhi; tuaci’n Israel-te do dingin Topa in Moab kumpipa Eglon a thahatsah hi, bangzieh ahei cile Topa muna-ah amate a siet gamtat uhi.

¹³ Ammon-te le Amalek-te tawh kipawlin ama kuonin Israel a zo hi; tuale amate in lutu khuopi a la uhi.

¹⁴ Tuaci’n Israel-te in Moab kumpi Eglon’ na kum sawm le giet sung a sem uhi.

¹⁵ Ahi vangin Topa tungah Israel-te a kiko ciengun Topa in amate hunkhie dingin Benjamin-te, Gera’ tapa, a veilawng pa, Ehud a khangsah hi. Israel-te in Moab kumpipa Eglon tungah ama tungtawnin sieh le kaih a puoh uhi.

¹⁶ Ehud in ama dingin a langni-a a hiem, tong khat a sau namsau khat bawl hi; ama in a puonnei a zietlam phei tungah tua namsau a khi hi.

¹⁷ Tua ciengin ama in Moab kumpipa Eglon tungah sieh le kaih a pie hi. Eglon pen a thau mama khat ahi hi.

¹⁸ Ehud in sieh le kaih a pieh zaw ciengin sieh le kaih a puohte a lampi vuah a peisah hi.

¹⁹ Ahi vangin Gilgal kunga suong kikheng milimte opna panin ama kilekia a, “Kumpipa aw, nang adingin thusim gen ding khat ka nei hi,” a ci hi. Tuaci’n kumpipa in, “Na dai vuo!” a ci-a, ama a cing zosie a kung panin a pusuoh uhi.

²⁰ Innkhumzang a innkhan vot sungah ama tanga a to laitahin ama kungah Ehud pei-in, “Pasien kung panin nang tungah gen ding thu khat ka nei hi,” a ci hi. Tuaci’n ama a tona panin a dingto hi.

²¹ Tua ciengin Ehud in a zietlam phei-a om namsau a veilam khut tawh manin Eglon’ gilpi a dawt hi;

²² a namsau banah a nambul tumsuh a, a gil panin a namsau dawh lo ahi ziehin a thau in a namsau tuommangin a eeh a lawt hi.

²³ Tua ciengin talaap-ah Ehud pusuohin ama tunga innkhumzang innkhan kotte khahin tuate a kil hi.

²⁴ Ama a peizaw ciengin nasemte a pei uhi. Innkhumzang inndei kotkhah kikil a mu ciengun amate in, “Ama inndei vot sunga awng haw hi va,” ci-in a ngaisun uhi.

²⁵ Tuaci’n a ci nading uh thei lo za dongin a ngah vua, a innkhumzang kotte a hon tuon nai lo ciengin tawhtang la-in a hong uleh a pupa uh a sisa-in tuong tunga a lum a mu uhi.

²⁶ Amate a kiheh kalun Ehud suohta-in suong milimte kalsan a, Seirah-ah tai-in a suohta hi.

²⁷ Ama a tun ciengin Ephraim muoltung gamah pengkul tum hi; tuale muoltung gam panin ama tawh Israel-te peisuhin a lutang dingun ama a koi uhi.

²⁸ Ama in a kung vuah, “Ka nua ei zui un; bangzieh ahei cile Topa in na khut sung vuah na galte uh ahi Moab-te ang pie zo hi,” a ci hi. Tuaci’n amate in a nua zuisuh vua, Moab peina Jordan tanmunte la-in koima’ galkai ding a phal sih uhi.

²⁹ Khum hunin a thahat, a siem Moab-te zosie tul sawm bang a that uhi; a suohta koima a om sih hi.

³⁰ Tuaci’n khum ni-in Israel-te’ khut sungah Moab-te in guol lel uhi. Khum gam in kum sawmgiet sung tawlngah hun a nei hi.

Shamgar

³¹ Ama zaw ciengin ciengzum khat tawh Philistia-te mi zaguh a that pa Anath’ tapa Shamgar a khang hi. Ama in zong Israel-te a hunkhie hi.