Thukhente 16 - Zo Bible

Samson le Delilah

¹ Samson, khatvei Gaza ah a haw le tua munah numei pahtat khat mu-in a luppi hi.

² Gaza-te kungah, “Tam munah Samson ang tung zo ta,” ci-in kigen hi. Tuaci’n amate in khuopi a imtawm vua, zan tungtawnin khuopi tunkotah ama a buhdap uhi. Zan tungtawnin sip dide-in a om vua, “Khuovah cieng dong ngah vai; tua zaw ciengin ama that vai,” ci-in a ngaisun uhi.

³ Ahi vangin zankim dong cieng beh Samsom lum hi. Zankim ciengin ama tho-in khuopi tunkot kotkhahte le a khuom nite tu-in a kotgolhte le adang teng zosie tawh bot zuonin a liengko-ah tuate puo a, Hebron mai-a muol vumah tuate a puoto hi.

⁴ Tua zaw ciengin Samson in Sorek kuomah a min Delilah a kici numei khat a ngai hi.

⁵ Tua nu kungah Philistia uliente pei-in, “Ama hing zol inlen, ama ia-cipin zothaw-in ka nuoinet thei nadingun bang in ama tua ci thahatsah ahei ci thu hing thei in; tuale ngun tang peh tul le zakhat ciet kang pie ding uhi,” a ci uhi.

⁶ Tuaci’n Delilah in Samson kungah, “Bang pen in nang ang hatsah a, mi khatpo in bangci leh hing zo thei-in khau tawh hing hencip thei ding ahei ci thu hepina tawh ei gen in,” a ci hi.”

⁷ Samson in tua nu kungah, “A gaw nai lo thalkhau a tha sagi tawh ei hen uleh ka hat nawn sih ding a, mi maimai khat ka bang ta ding hi,” a ci hi.

⁸ Tua ciengin Philistia uliente in tua nu kungah a gaw nai lo thalkhau tha sagi a peipi vua, tua nu in tuami khaute tawh ama a hen hi.

⁹ Tua laitahin innkhan sungah ama buh ding mite a om vua, tua nu in ama kungah, “Philistia-te in hing sim ve aw, Samson!” a ci hi. Ahi vangin ama in mei a suhkhah cienga a kitat zieu lel patkhaute bangin tua thalkhaute bottat zieu hi. Tuaci’n ama’ thahatna thusim kithei zo lo hi.

¹⁰ Tua ciengin Delilah in Samson kungah, “Kei nei simmaw bawl a, zuouthu nei gen hi; nang bang hing kici hen thei ding hepina tawh ei gen in,” a ci hi.

¹¹ Ama in tua nu kungah, “Khauhuol a tha a kizang nai lo tawh ei hen uleh ka hat nawn sih ding a, mi maimai khat ka bang ta ding hi,” a ci hi.

¹² Tuaci’n Delilah in khauhuol a thate la-in tuate tawh ama henin ama kungah, “Philistia-te in hing sim ve aw, Samson!” (Mite in ama innkhan sungah buhdap uhi) a ci hi. Hizongle vaukhau bawsan bangin ama in a khut henna khauhuolte a botsan zieu hi.

¹³ Tua ciengin Delilah in Samson kungah, “Tu dongin nei simmaw bawl a, zuouthu nei gen hi; nang bang hing kici hen thei ding ahei ci ei gen in,” a ci hi. Ama in tua nu kungah, “Ka luzanga ka samtel sagite siemphei tawh gantonin ciempeh tawh khenkip lacin ka hat nawn sih ding a, mi maimai khat ka bang ta ding hi,” a ci hi.

¹⁴ Tuaci’n ama a lup laitahin Delilah in a luzanga a samtel sagite la-in siemin gan a, ciempeh tawh khenkip hi. Tua ciengin ama kungah, “Philistia-te in hing sim ve aw, Samson!” a ci hi. Hinanle a kimutna panin khanglo-in a ciempeh, a siembu, le a siem a kaigawp hi.

¹⁵ Tua ciengin tua nu in ama kungah, “Na lungsim nei pieh vawt lopi bangci dan a, ‘Nang kang it hi,’ nei ci thei ahei? Tu-in thumvei vilvel kei nei simmaw bawl a, ang thahatsah bang ahei ci nei gen nuom sih hi,” a ci hi.

¹⁶ A tawpna-ah tua nu in nisimin a kutkut ciengin, sina dong dingin ama a lunggim hi.

¹⁷ Tuaci’n ama in tua nu kungah a thusim zosie gen a, “Ka lu tungah mulmetna a tukha ngai sih hi; azieh pen ka nu gil sung panin Pasien dinga nazir mi ka hi tabo hi. Ka sam ei kiheupieh leh ka hatna in ei nuasie ding hi; tua hile ka tha zawm pai-in midang maimai khat tawh ka kibang ta ding hi,” a ci hi.

¹⁸ Ama in a thusim zosie ei gen sieng ta hi, ci Delilah in a thei bepin ama in mi sawlin Philistia uliente hlansah a, “Tu-in hing kuonto ta un, bang ding ahei cile a thusim zosie ei gen sieng zo ta hi,” a ci hi. Tua ciengin tua nu kungah Philistia uliente a kuonto vua, a khut sung vuah sum a tawi uhi.

¹⁹ Tua nu in a phei tungah ama a kimusah hi; tuale ama nu in mi khat hlanin a luzanga om a samtel sagite a heusah hi. Ama a thakieh kipan pai a, a hatna in ama a nuasie ta hi.

²⁰ Tua ciengin tua nu in, “Philistia-te in hing sim ve aw, Samson!” a ci hi. A kimutna panin ama a khahlaw ciengin, “Nidanga bangin peikhie vangin kei le kei kithingin suohta na vang,” ci-in a ngaisun hi. Ahi vangin Topa in a nuasie zo lam ama in a thei sih hi.

²¹ Tuaci’n Philistia-te in ama manin a mit tegel a dawt thawppieh uhi. Amate in Gaza ah ama peipi suhin sumngo kol a bul uhi; tuale ama in thong sung angawina-ah an a gawi hi.

²² Ahi vangin a kiheu zaw ciengin a luzanga a samte khan ding a kipankia pai hi.

Samson’ Sina

²³ Tu-in amau’ pasien Dagon tungah kithoina thupi khat bawl dingin Philistia uliente kikhawmin a guol nuom uhi; bangzieh ahei cile amate in, “I pasien in i khut sungah i galpa Samson ei pie zo hi,” a ci uhi.

²⁴ Mite in ama a mu ciengun a pasien uh a phat uhi. Azieh pen amate in, “I pasien in eite khut sungah i galpa, i gam susie pa, tampitah ei that pa ei pie zo hi,” a ci uhi.

²⁵ A lungsim uh a nop ciengin, “Ei guolnuomsah dingin Samson va hlan ta un,” a ci uhi. Tuaci’n amate in thong sung panin Samson hlanin a guolnop nadingun a ki-apmaipi uhi. Amate in khuompi ni kikalah ama a dingsah uhi;

²⁶ tuale Samson in a khuta a kai pa kungah, “Ka kingap nadingin inndo khuompite ei thamsah in,” a ci hi.

²⁷ Tua laitahin a inn pen numei pasal tawh kidim hi; Samson a ki-apmai laitah a en Philistia ulien zosie le innkhum zangah numei le pasal mi tulthum bang a om uhi.

²⁸ Tua ciengin Samson in Topa hlanin ama in, ”Topa Pasien aw, tami khatvei beh kei ei phawh inlen keima’ mit tegel ei dawt thawppieh Philistia-te tungah khatvei beh phulahna tawh ka thuhkia thei nadingin tu beh lienin ei thahatsah in, Pasien aw,” a ci hi.

²⁹ Samson in inndo khuompi nite zamin a zietlam khutin khat, a veilam khutin khat tuoh tu-in ama gihna tawh tua khuomte-ah kingam hi.

³⁰ Tua ciengin Samson in, “Philistia-te tawh ei sitonsah in,” a ci hi. A tha nei zosie tawh tha la dingin ama a kisang hi; tuale uliente le a sunga om mi zosie tungah a innpi a cimsuh hi. Tuaci’n a hin sunga a mi tha sangin a sina-a a mi tha tamzaw hi.

³¹ Tua ciengin a sanggamte le a innkuonpi zosie kuonsuhin a luong la-in a puoto vua, Zorah le Eshtaol kikala om a pa Manoah’ hanah a vui uhi. Ama in kum sawmni sung Israel-te thu a khen hi.