Thukhente 12 - Zo Bible

Minamte Kikal Kikamtamna

¹ Ephraim-te galhiem tawi dingin kihlan a, amate Zaphon galkai-in Jephthah kungah, “Ammon-te sim dingin galkai-in na kuontonpi dingin bang dingin ko ei ciel lo na hei? Na inn tawh kang buhal ding uhi!” a ci uhi.

² Jephthah in a kung vuah, “Keima le ka mite in ko nasie taha ei bawlsie Ammon-te tawh buoina ka nei laitahun kang ciel vangin amau’ khut sung panin nei hun tuon sih uhi.

³ Nei hut lo ding uh ka thei bepin ka hinna khamin Ammon-te do dingin ka na galkai a, Topa in ka khut sungah amate ei pie hi. Tua ahile bang zieha kei ei do dinga tuni-a hing kuonto na hi uh ahei?” a ci hi.

⁴ Tua ciengin Jephthah in Gilead mi zosie khawmin Ephraim-te tawh a kido uhi; tuale Gilead mite in Ephraim-te a zo uh hi, azieh pen, “Ephraim-te le Manasseh-te lungsim sungah no Gilead-te pen Ephraim-te pana a taimangte na hi uhi,” a ci ngai zieh uh ahi hi.

⁵ Tua ciengin Gilead-te in Ephraim-te a do vua, Jordan tanmunte a la uhi. A taimang Ephraim-te khatpo in, “Ei galkaisah in,” a ci sielin Gilead mite in a kungah, “Ephraim-te na hi amah?,” a ci uhi. Tuale ama in, “Hi sing,” a ci ciengin,

⁶ ama kungah, “Tua ahile Shibbolet ci vawi,” a ci uleh ama in a manin lo thei lo ahi ziehin, “Sibboleth,” ci hi. Tua ciengin ama manin Jordan tanmunte-ah a that uhi. Khum hunin Ephraim-te tul sawmli le tulni a si hi

⁷ Jephthah in Israel-te kum guh sung thu khen hi. Tua ciengin Gilead-te Jephthah si a, Gilead gam sunga ama khuo-ah kivui hi.

Ibzan, Elon, le Abdon

⁸ Ama zaw ciengin Bethlehem-a Ibzan in Israel-te thu khen hi.

⁹ Ama in tapa sawmthum nei hi. Ama’ be pulamte tawh a tanu sawmthumte kinungsah a, a pulam panin a tapate adingin numei sawmthum a la hi. Ama in Israel-te kum sagi sung thu khen hi.

¹⁰ Tua ciengin Ibzan si a, Bethlem khuo-ah ama kivui hi.

¹¹ Ama zaw ciengin Zebulun-te Elon in Israel-te kum sawm sung thu khen hi.

¹² Tua ciengin Zebulun-te Elon si a, Zebulun gam Aijalon ah ama kivui hi.

¹³ Ama zaw ciengin Pirathon-te Hillel’ tapa Abdon in Israel-te thu khen hi.

¹⁴ Ama in laa sawmsagi tunga a tuong thei tapa sawmli le tupa sawmthum nei hi; ama in kum giet sung Israel-te thu khen hi.

¹⁵ Tua ciengin Pirathon-te Hillel’ tapa Abdon si a, Amalek-te’ muoltung gam Ephraim-te leitanga om Pirathon ah ama kivui hi.