Siampi Laibu 3 - Zo Bible

Thunuom Biehnate

¹ Na biehna pen thunuom biehna ahi a, bawnghon lah panin anu ahi sihle apa na tawi leh Topa mai-ah genbaang lo khat hi ding hi.

² Biehna ganhing lutungah na khut ngamin kikhopna buh tunkotah na go ding hi; Aaron’ suon siempute in maitam kimvelah gansi the ding uhi.

³ Thunuom biehna panin Topa tungah mei tawh biehna dingin a gilpi tuom a thaute le a sungkuote kima om a thaute zosie tawh;

⁴ a kawnga om a kal tegel le a kal tegel tunga om a thau, le a kal tegel tawh kilahtha ding ahi a sin tunga beh a tepkaite na pie ding hi.

⁵ Tua ciengin Aaron’ suonte in mei tunga om sing tunga meihal biehnate tawh maitam tungah tuate hal ding uhi. Tua khu Topa dinga a gimnamtui mei tawh kihal biehna ahi hi.

⁶ Topa tunga na tawi thunuom biehna khu tuu le keel honte lah panin anu ahi a, apa ahi zongin a genbaang lo khat hi ding hi.

⁷ Biehna dinga tuuno khat na tawi leh Topa mai-ah na peipi ding a,

⁸ gan lutungah na khut na ngam ding hi. Kikhopna buh mai-ah tua gan kigo ding a, Aaron’ suonte in maitam kimvelah a si the ding uhi.

⁹ Topa tungah meihal biehna dingin thunuom biehna panin a thaute, a ngumgu dong cienga ki-attan a meithau zosie le a gilpi tuom a thaute le a sungkuo kima om a thaute zosie tawh;

¹⁰ a kawnga om a kal gela a thaute tawh, a kal gel tawh kilahtha ding ahi a sin tunga beh a tepkai pie ding hi.

¹¹ Tua ciengin siempu pa in Topa tungah mei tawh kihal an tawh biehna dingin maitam-ah tua teng hal ding hi.

¹² Na biehna khu keel khat ahile Topa mai-ah tua keel na peipi ding a,

¹³ tuale a lutungah na khut na ngam ding hi; tua pen kikhopna buh mai-ah na go ding hi; tuale Aaron’ suonte in maitam kimvelah tua gansi the ding uhi.

¹⁴ Tua lah panin Topa tungah meihal biehna dingin a gilpi tuom a thaute le a sungkuote’ tunga om a thau zosie tawh;

¹⁵ a kawnga a kal gel le a thau tawh, a kal tegel tawh kilahtha ding ahi a sin tunga beh a tepkai na pie ding hi.

¹⁶ Tua ciengin siempu pa in a gimnamtui dingin mei tawh kihal an tawh biehna dingin maitam tungah tuate hal ding hi. A thau zosie Topa -a’ ahi hi.

¹⁷ Tua khu na khang tawntung vua na tenna uh mun zosie-ah a kip tawntung thukham hi ding hi: Note in a thau ahi sihle a si kici poma na ne vawt sih ding uhi.