Siampi Laibu 2 - Zo Bible

An tawh Biehnate

¹ Mi khatpo in Topa tungah an tawh biehna a lui leh a biehpiehna pen annel hi ding hi; biehna luipa in a biehpiehna tungah sathau buohin panamtui koi ding a,

² Aaron’ suon siempute kungah peipi ding hi. Ama in annel le sathau khutdim khat le panamtui zosie a lah zaw ciengin, siempu pa in melcina satanh dingin tua teng maitam tungah haltum ding hi. Tua khu Topa in namtui a sah mei tawh kihal biehna ahi hi.

³ Tuale an tawh biehna dinga kizangmawh teng pen Aaron le a tapate-’a hi ding hi. Tua khu Topa tunga kipie meihal biehna lah panin a siengtho pen khat ahi hi.

⁴ Meibunga ki-em an tawh biehna na lui ciengin tol saw lo sathau kinu mo, ahi sihle sathau kinu, tol sawlo mopheng hi ding hi.

⁵ Na biehpiehna pen khangbeel dai sunga kikang an tawh biehna ahile tol saw lo, sathau kisaw annel hi ding hi;

⁶ tua khu ehmal inlen a tungah sathau sung in; tua khu an tawh biehna ahi hi.

⁷ Na biehna pen mo kanna sia khangbel sunga kikang an tawh biehna ahile sathau tawh kihal annel hi ding hi.

⁸ Topa kungah khat zawzaw tawh kibawl an tawh biehna na peipi ding hi; siempu pa kungah a kipeipi ciengin ama in maitam-ah peipi ding hi.

⁹ Siempu pa in an tawh biehna lah panin melcina satanh teng ladawhin maitam tungah hal ding hi. Tua khu Topa tunga a namtui mei tawh kihal biehna ahi hi.

¹⁰ An tawh biehna dinga a kizangmawh teng pen Aaron le a tate-a’ hi ding hi; tua khu Topa tunga meihal biehna lah panin a siengtho pen khat ahi hi.

¹¹ Topa tunga na tawi an tawh biehna pen tol sawlo hi ding hi. Azieh pen Topa kungah tol ahi a, khuoizu ahi zongin meihal biehna-in na hal sih ding hi.

¹² Topa kungah anpal tawh biehna na tawi thei ding a, hizongle a gimnamtui dingin maitam tungah kipie lo ding hi.

¹³ An tawh biehna-ah Pasien tawh na kiciemna pen ci saw loin na om vawt sih ding a, na biehna zosie-ah ci na saw ding hi.

¹⁴ Topa tungah gamasa biehna na lui leh gamasa biehna adingin a vuitha pana kila a kigawtvui, mei tawh a kihanggawte na pie ding hi.

¹⁵ A tungah sathau sungin panamtui na buoh ding hi; tua khu an tawh biehna ahi hi.

¹⁶ Siempu pa in melcina satanh dingin a kigawtvui an pawlkhat le sathau le a panamtui zosie tawh a haltum ding hi; tua khu Topa tunga meihal biehna ahi hi.