Ruth 3 - Zo BibleAncilna-ah Ruth le Boaz 1 A innpinu Naomi in ama kungah, “Ka tanu aw, na nopsah nadingin sil muonhuoi khat kang suipieh ding kisam hi. 2 A nasem ngahnute tawh na nasepna i sanggampa Boaz tanah tu-in a om hi. En in, ama in tu zanin ancilna-ah mangbuham zoi-in a om hi. 3 Kisilin sathau kinu inlen na puon hoipente silin ancilna lamah peisuh in; ahi vangin a neh a dawn a man masangsie ama kungah na pei lam kitheisah sin. 4 Ama a lup ciengin a lupna encien in; tua ciengin, pei-in a keng lem inlen lum in; tuale ama in na bawl ding ang gen ding hi,” a ci hi. 5 Ama in a kungah, “Na gen zosie ka bawl ding hi,” a ci hi. 6 Tuaci’n ama ancilna-ah peisuhin a innpinu hil bang tehtehin a gamta hi. 7 Boaz in a neh a dawn zaw ciengin a lung nuom a, a lum dingin anphuol gei-ah a pei hi. 8 Zankim laitahin thakhatin khangloin a kihei leh a khawdop-ah numei khat na lum hi. 9 Ama in, “Nang koi na hiei?” a ci hi. Tua nu in dawng a, “Kei na nasemnu Ruth ka hi hi; na puon tawh na nasemnu ei hui in, azieh pen ka tanau kinaipi pen na hi hi,” a ci hi. 10 Ama in, “Topa in nang thupha hing pie taheh, ka ta nu aw; tam a nukhia pen na citahna in a cil lai-a sangin hoizaw peh hi; nang in a hau hitale a zawng hitale tangvalte’ nua po na zui sih hi,” a ci hi. 11 Tu-in ka tanu aw, zau sinlen na nget zosie kang seppieh ding hi. Azieh pen ka khuo-a mi zosie in numei kizen na hi lam a thei uhi,” a ci hi. 12 Hinanle tu-in na sanggam kinaipi pen khat ka hi khu a man vangin kei sanga na kinaipizaw adang sanggam khat omlai hi. 13 Tuzanin tanah om tadi inlen, zingmawng ciengin na tungah tanau kinaipi pente’ mawpuoh ang sep leh hoi hi; ama semsah in. Ama in nang tungah tanau kinai pente’ mawpuoh ang sep nuom sih leh, Topa a hing ahi ma bangin keima in nang tungah tanau kinaipi pente’ mawpuoh teng kang sem ding hi. Zingmawng dongin tam sungah lum in,” a ci hi. 14 Tuaci’n zingmawng dongin a khawdop-ah tua nu lum a, ahi vangin mi mel kimucien thei masangin ama a tho hi; azieh pen Boaz in, “Ancilna phuol-a nang pei lam koima in kitheisah sin,” a ci hi. 15 Tua ciengin ama in, “Na puon hing la inlen daw in,” a ci hi. Tuaci’n tua nu in daw a, ama in mangbuham law guh te-in a guonpieh hi; tua ciengin ama khuopi sungah a pei hi. 16 A innpinu kungah ama a tun ciengin na dong a, ”Ka tanu aw, bang nang ci ei?” a ci ciengin tua nu in zong ama’ tungah tuapa’ bawlna zosie gen a, 17 “Tam mangbuham law guh ei guon hi, azieh pen ama in, ‘Na innpinu kungah na khutguohin pei sin,’ ei ci hi,” a ci hi. 18 Naomi in, “Ka tanu aw, thu bang hing ci pien ding ci na thei masangin ngah tadi in, azieh pen ama ang mawh op sih ding a, tuni-in vai zosie ang siengsah na ding hi,” a ci hi. |
Zo Bible © Bible Society of Myanmar, 2018.
Bible Society of Myanmar