Rome-te 7 - Zo Bible

Kinunna Tawh Tekahna

¹ Sanggamte aw, a hin sung teng beh thukham in mi khat tungah thu nei hi, ci na thei sih uh amah? Azieh pen thukham theite tunga thu gen ka hi hi.

² Tua ahi ciengin pasal nei numei khat, a pasal a hin laisie thukham in a pasal tawh a khitha hi; ahi vangin a pasal a si leh tua numei pen a pasal tawh kisai thukham panin a suohta hi.

³ Tua ma bangin a pasal hin sungin pasal dang a kinunpi leh ama pen angkawmnu kici ding hi. Ahi vangin a pasal a si leh tua thukham panin ama a suohta ahi a, midang khat a kinunpi leh zong ama pen angkawmnu ahi sih hi.

⁴ Tua ma bangin ka lawmte aw, Pasien ading ga na ga thei nading ule midang kici misite lah pana kithosah pa-a’ na hi thei nadingun, Khris pumpi ziehin thukham lamah a si na hi ta uhi.

⁵ Cilesa sungah i nuntah lai-un thukham in mawna bawlnopna lungsim thosah a, i pumpi nate sungah si nading ga i ga nadingin na a sem hi.

⁶ Ahi vangin tu-in a kigiel thukham lui khut nei-ah om loin Hlagau hinkhuo tha sungah i hin thei nadingin ei hencip thukham thu-ah i si zo ta vua, tua panin i suohta ta uhi.

I Sunga Om Mawna

⁷ Tua ahile bang gen ding i hei? Thukham khu mawna ahi amah? Hi laizang lo e! Ahi vangin thukham na om lo hi leh mawna kici a thei kha ding ka hi sih hi. Thukham in, “Na deigaw sih ding hi,” na ci lo hi leh deigawna bang ahei ci zong ka thei kha sih ding hi.

⁸ Ahi vangin mawna in thupieh sungah hun lem sui-in ka sungah deigawna namcin a piengsah hi. Thukham om loin mawna pen a si ahi hi.

⁹ Hun khat lai-in thukham om loin ka na hing a, ahi vangin thupieh ang tun ciengin mawna hing kia-in,

¹⁰ kei ka si a, hinna ding ei kamciem tua thupieh tehteh pen ma kei adingin sina ang lehi zaw ta hi.

¹¹ Azieh pen thupieh sungah mawna in hun lemtang sui-in ei sol a, tua tawh ei that hi.

¹² Tuaci’n thukham pen a siengtho hi a, thupieh zong siengtho-in dihin hoi hi.

¹³ Tua ahile sil hoite in kei tungah sina ang tun ahi amah? Tua bang hi laizang lo e! Mawna pen mawna tahtah ahi lam a kilah nadingin sil hoi tungtawnin mawna in keima sungah sina na a sem ahi hi. Thupieh tungtawnin mawna pen tezawh lo a siehuoi mama ahina thu kilang hi.

Sungtawng lam Buoina

¹⁴ Bangzieh ahei cile thukham pen hlagau lam thu ahi, ci i thei hi; ahi vangin kei ka hile cilesa tawh om mi ka hi a, mawna sungah sila banga ei kizua ka hi hi.

¹⁵ Ka gamtatna mama zong ka thei sih hi. Bangzieh ahei cile ka bawl nop teng ka bawl sih a, ka huot teng ka lebawl zawsop hi.

¹⁶ Tu-in ka bawl nop lo teng ma bawl veve ka hi leh kei pen thukham hoi hi, ci-a a thukimpi ka hi mawh ta hi.

¹⁷ Ahi vangin tua bang a bawl tahtah pen kei ka hi nawn sih a, ka sunga a teng mawna ahi zaw hi.

¹⁸ Azieh pen ka tahsa pumpi sungah sil hoi khat beh a ten lo lam ka thei hi. A pha bawl ding ka lunggul vangin ka bawl thei vawt sih hi.

¹⁹ Azieh pen ka bawl nuom sil hoi ka bawl sih a, ka bawl nuom lo gitlona ka lebawl hi.

²⁰ Tu-in ka bawl nuom lo pen bawl ka hi leh a bawl pen kei ka hi nawn sih a, ka sunga a teng mawna’ bawl ahi zaw hi.

²¹ Tuaci’n sil hoi ka bawl nop ciengin ka kungah sietna ang om hi, ci thu khat ka mukhie hi.

²² Bangzieh ahei cile ka sunglam mi in Pasien’ thukham sungah nuom sa a,

²³ ahi vangin ka pumpi nate sunga om thukham dang khat le ka lungsim thukham kido a, tua in ka pumpi nate sunga a teng mawna thukham sungah sala ei mat lam ka mu hi.

²⁴ Mi genthei lah ka hi mawh in! Tami sina pumpi panin koi in ei hunkhie ding ahei?

²⁵ I Topa Jesu Khris ziehin Pasien tungah lungdam ka ko hi! Tuaci’n ka lungsim tawh Pasien thukham’ sila ka hi a, ahi vangin ka tahsa tawh mawna thukham’ sila ka hi hi.