Rome-te 4 - Zo Bible

Abraham Tawh Gentena

¹ Tua ahile i pu uh Abraham in tahsa lam tawh a na nga phattuomna khu eite in bang i gen ding vuoi?

² Azieh pen gamtatna zieha Abraham dih kitangsah ahile ama in kisah thei nading thu pawlkhat nei hi, hinanle tua pen Pasien mai-ah ahi sih hi.

³ Lai Siengtho in bang a gen ei? “Abraham in Pasien um a, tua pen ama tungah dihna-in kisimpieh hi,” ci hi.

⁴ Nasem mi khat tunga a kipie a thaman pen letsongin kisimpieh loin sep thaman kici zaw hi.

⁵ Ahi vangin mi khat in na a sep lo vangin ama in migilote dih tangsah pa a muon leh, tua bang upna pen dihna-in kisimpieh hi.

⁶ Tua ma bangin sepna kihal lo, Pasien in midih hi, ci-a a sim mite’ hamphatna thu David in zong tam bangin gen hi:

⁷ “A tatkhielnate uh kimaisah a, a mawnate uh a kisinpieh mite mi hampha ahi uhi;

⁸ Topa in ama’ mawna a ciepte lo pa mi hampha ahi hi,” a ci hi.

⁹ Tua ahile tami hamphatna pen teptan mite tung beha kipie amah? Ahi sihle teptan lo mite tunga zong kipie ahei? Eite in, “Abraham upna pen dihna-in kisimpieh hi,” i ci uhi.

¹⁰ Tua ahile tua pen bang hun pana kisimpieh ahei? A teptan masang amah? Ahi sihle a teptan zaw ahei? A teptan zaw hi loin a teptan masang hizaw hi.

¹¹ Teptan ahi nai lo lai-in upna zieha a na neisa dihtanna ciemtena dinga ama in tua teptanna lim a na nga hizaw hi. A deina in ama pen a tep kitan lo thu um mi zosie le a upna uh dihna-a a kisimpieh mi zosie’ pupi a suo thei nading ahi hi.

¹² Tua ma bangin ama pen a tep kitante’ pupi beh hi loin, tep a kitan masanga i pa uh Abraham in a na nei a ettehuoi upna thu a zui mite adingin zong pupi a suo nading ahi hi.

Upna Tawh Thuciemna Tangtung

¹³ Bangzieh ahei cile ama in leitung luo dingin Abraham le a suonlehlahte tungah a kamciem pen thukham zuina zieh ahi sih a, upna zieha dihtatna tawh hizaw hi.

¹⁴ Thukham zuite beh gouluo ding hi poma leh upna pen bangma lo ahi ta ding a, thuciemna zong a mawhna a suoh ta ding hi.

¹⁵ Bangzieh ahei cile thukham in Pasien’ lungthahna piengsah hi; ahi vangin thukham a op lona munah tatkhielna zong om lo hi.

¹⁶ Tam thu ziehin tua kamciem pen hepina tunga kinga ahi thei nading le ama’ suonlehlahte zosie tungah thukip ahi thei nadingin, thukham zuite beh in nga loin Abraham’ upna banga a um mite in zong a nga thei nadingin upna bulphu-a kipie ahi hi. (Bangzieh ahei cile Abraham pen eite zosie’ pa ahi a,

¹⁷ “Minam tampite’ pa dingin kang bawl zo hi,” ci-in a kigiel ma bangin), ama in misite hingsahin a om nai lote a omsah pa ahi a up pa Pasien muna-ah eite zosie’ pa a suoh hi.

¹⁸ Ama kungah, “Na suon na hlahte tam bangin tam ding hi,” ci-a a kigen ma bangin, “Minam zosie’ pa,” ahi thei nading lametna om lopi-in ama in a muong kenkon hi.

¹⁹ Ama’ pumpi a si zo tawh a kibahna thu le (azieh pen ama kum zakhat bang pha ta hi) Sarah’ nau nei thei lona thute a ngaisut ciengin upna lamah a tha a kiem tuon sih hi.

²⁰ Pasien’ kamciemna tungtang thu-a muonlana in ama a hawisah zo sih a, a upna sungah thakhau semsemin Pasien’ min thangsah a,

²¹ Pasien in a kamciem ang tangtun zo tahtah ding hi, ci-in a um lenlon hi.

²² Tua ahi ziehin a upna pen, “Ama adingin dihna-in kisimpieh hi,” ci-in kigiel hi.

²³ Tu-in, “Ama adingin kisimpieh hi,” ci-a kigiel kammalte ama ading beha kigiel ahi sih a,

²⁴ eite ading zong ahi hi. Misite lah panin i Topa Jesu a thosah pa a um eite tungah tua upna pen dihna-a ei kisimpieh ding ahi hi.

²⁵ Eite’ khielna ziehin a si dingin ama kipie a, eite’ dihtan nadingin ama kithosah zo hi.