Rome-te 2 - Zo Bible

A dih Pasien’ Thukhenna

¹ Tua ahi ziehin midangte tunga thukhen note pen koikoi na hi zongun hamlap ding na nei sih uhi; bangzieh ahei cile midangte tunga thu na khen uh ciengin noma zong tua bang lien ma-a gamta veve na hi ziehun no le no kimawsah na hi uhi.

² Note in, “Tua banga a gamta mite tungah Pasien’ thukhenna pen thuman thutah tawh kituoh ahi hi, ci i thei uhi,” na ci uhi.

³ Koikoi hi nan locin tua banga gamtate tungah thu khen napi, no zong tua bang ma-a na gamtat veve uh ciengin Pasien’ thukhenna panin a suohta dingin na kingaisun uh amah?

⁴ Ahi sihle a kicing ama’ migitna, a thuohhatna le a lungduoinate simmaw na hi uh amah? Pasien’ migitna in kisiakiana lamah note ang pui ahi lam thei lo na hi uh amah?

⁵ Ahi vangin lungtang khau-in na kisia nop lo ziehun Pasien’ lungthahna le a thukhenna dihtah ang kilah ni hun ciengin na thuoh ding uh ahi lungthahna a kholkhol na hi uhi.

⁶ Bang ding ahei cile ama in mi zosie tungah amau’ gamtatna tawh kituohin a thuhkia ding hi:

⁷ A hoi gamtatna le lungduoina tawh minthanna, patawina le si thei lona a sui mite tungah kumtawn hinna a pie ding hi;

⁸ ama’ ang sung beh khuolin thuman thutah zui loin gitlona a zuite tungah a lungthahna le a lunghamna a tung ding hi.

⁹ Sietna a bawl mi zosie tungah lungkhamna le gimna tung ding a, a masa-in Jew mite tungah tungin Greek-te tungah zong tung ding hi,

¹⁰ ahi vangin a hoi a bawl mi zosie tungah vanglietna, patawina, le nopsahna tungin a masa-in Jew mite tungah tungin Greek-te tungah zong tung ding hi.

¹¹ Azieh pen Pasien in angvan tuom a nei sih hi.

¹² Thukham lo tawh a maw mite pen thukham lo ma tawh kisie ding a, thukham khut nei-a a maw mite zosie pen thukham ma in thu a khen ding hi.

¹³ Bangzieh ahei cile Pasien muna-ah thukham a zate a dih hi loin, thukham a zuite beh a dih hizaw hi.

¹⁴ Thukham nei lo Gentile-te in a pienpi uh lungsim bangin thukham in a kalh thute a sep uh ciengin amate in thukham a nei sih vangun, amate adingin tua thute thukham suoh veve hi.

¹⁵ A lungsim sung vuah thukham in a kalh thute kigiel hi, ci-in amate in a lah vua, amau’ kitheina lungsim in zong teci a pang hi. A kitukal a lungsimte un amate mawsah zelin maisah zel a,

¹⁶ keima’ lungdamna thu dung zui-in Jesu Khris tungtawnin Pasien in mi zosie’ phuolsel ngaisutnate a khen ni ciengin tam bangin a khen ding hi.

Judah Mite le Thukham

¹⁷ Ahi vangin nangma le nangma Jew mi khat ka hi hi, kici-in thukham tungah na kingah a, Pasien tawh na kizopna na kisielpi leh,

¹⁸ thukham na sinna ziehin ama’ deina thei-in a hoi pente a khen thei pa na hi a,

¹⁹ mittawte lamlah pa, khuomiel sunga om mite adinga khuovah,

²⁰ mimawte thu a hil pa, naupangte’ siepa, thukham zieha pilna le thuman thutah nei na hi tahtah leh,

²¹ nang, midangte a hilpa, nangma le nangma kihil phot lo ding na mah? Guhtat lo ding a genpa, nangma in zong gu hi lo na mah?

²² Angkawm sih un a ci pa, nangma in angkawm hi lo na mah? Milim a kidahpa, nangma in milim biehinnpi bulu hi lo na mah?

²³ Thukham a kisielpi pa, nangma in thukham palsatna tawh Pasien’ min daisah hi lo na mah?

²⁴ Bang ding ahei cile, “Note ziehin Gentile-te lahah Pasien’ min kigensie hi,” ci-in kigiel hi.

²⁵ Thukham na zui uleh tep tanna in phattuomna nei a, hinanle thukham na palsat uleh na tep tanna uh teptan lo ma a suoh hi.

²⁶ Tuaci’n teptan lote in thukham in a kalh thute a zui uleh a teptan lo uh pen teptan ma bangin kisimpieh lo ding amah?

²⁷ Tuaci’n tahsa tep tan sih nan ule thukham a zuite in, tep kitanin a kigiel thukhamte nei napi tua thukhamte a palsat note tungah thu hing khen ding uh hi lo amah?

²⁸ Bangzieh ahei cile mi khat pen a putham beh tawh Judah mi ahi sih a, tep tanna tahtah i ci zong tahsa le a putham beh ahi sih hi.

²⁹ Judah mi i cite pen a sung lama Judah mi ahite hizaw a, teptan tahtah i ci zong lai-a kigiel thukham zieh hi loin, hlagau lam tawh kisai-a lungsim teptanna ahi hi. Tua bang mi in midangte tung pan hi loin Pasien tung panin phatna a nga hi.