Rome-te 11 - Zo Bible

Israel-te Kinuolna Thutawpna Hilo

¹ Tua ahile Pasien in a mite a nuol ta amah? ci-in ka dong hi. Nuol poma lo hi! Keima ma zong Israel mi ka hi a, Abraham’ suon, Benjamin minam ka hi hi.

² Pasien in a thei kholsa mite a nuol ngai sih hi. Israel-te langkhatah Pasien kunga a thum Elijah thu, Lai Siengtho in bangci gen ci thei lo na hi uh amah?

³ Ama in, “Topa aw, amate in na kamsangte thatin na maitamte zong a susie gawp uhi; kei ngentang ka om ta bo a, amate in kei nangawn zong ei tha sawm lai uhi,” a ci hi.

⁴ Ahi vangin Pasien in ama bangin a dawngkia ei? “Keima adingin Baal mai-ah a khupdin ngai lo mi tul sagi ka koi zo hi,” ci hi.

⁵ Tua ma bangin tuhunin zong hepina tawh a kiteel mi themkhat om lai hi.

⁶ Ahi vangin tua teelna pen hepina zieh ahile, sepna bulphu-a teelna ahi nawn sih hi, tua bang hi sihle hepina pen hepina hi nawn lo ding hi.

⁷ Tua ahile bang ahi ta diei? Israel-te in a suisui pen a nga sih uhi. A teeltuom mite in nga a, ahi vangin adangte ahile a lung uh khau a,

⁸ a kigiel ma bangin, “Pasien in tuni dongin amate thadana lungsim, khuo a mu thei lo mittang le, khuo a za thei lo bilte a pie hi,” kici hi.

⁹ David in zong, “A sabuoite uh thang le piel suoh hinlen, amate adingin puana le thuhkiana suoh taheh;

¹⁰ amate in khuo a mu lo nadingun a mit uh miel hinlen, a ngum uh kul den taheh,” ci hi.

Gentile-te Kihutdamna

¹¹ Tuaci’n a pua nading dongun amate a kipalkha ta uh amah? ci-in ka dong hi. Tua bang hi lo hi! Ahi vangin amau’ puana ziehin Gentile-te tungah hutdamna thu a tun pen Israel-te’ thangsiet nadinga kibawl ahi bo hi.

¹² Tu-in amate puana pen leitung mite adingin hauna a suo a, amate guollelna zong Gentile-te adingin hauna suoh ahile, Khris sunga Jew mite zosie a kihuopkimna zong bangza tahin hauna suoh zawkan lai ding ahei!

¹³ No Gentile-te tunga thu ang gen ka hi hi. Gentile-te adinga sawltahpi ka hi ziehin ka nasepna a genpha ka hi a,

¹⁴ tua tawh ka mipite in ka etsah thei khah a, amate lahah mi pawlkhat ka hutdam thei khah leh ka ci na ahi hi.

¹⁵ Bangzieh ahei cile amate kinuolna pen leitung mite tawh kilemkiana ahile, amate kipomkiana zong khu sina panin hinna lobuong bang dang hi ding ahei!

¹⁶ Ga masa-a kipie bunel lomkhat a sientho nah po leh bunel lompi zong a siengtho pai ahi hi; a zungpi a sientho nah po leh a bate zong a siengthosa ahi hi.

¹⁷ Ahi vangin tua a bate pawlkhat kisattanin tua munah gamlah olive dawng ahi note pen tuate tungah ang kipe-in tua olive zung pana ang pei khanna tui a dawnton na hi uhi,

¹⁸ tua ahi ziehin a bate tungah kisiel kha sih un. Na kisiel uleh a zungpi a puo tahtah pen no na hi sih vua, a zungpi in no ang puoh ahi zawh lam phawh un.

¹⁹ Note in, “Kei ei kipe nadinga a bate kisattan ahi hi,” na ci ding uh ahi hi.

²⁰ Tua pen thuman ahi hi! Amate a kisattna pen a up lo zieh uh ahi a, ahi vangin note na hi uleh upna zieha amate munah a ding thei na hi bo uhi. Tua hi a, kisathei sih unlen zau zaw un.

²¹ Bangzieh ahei cile Pasien in a ba ahi ngaite bawn za lo ahile note zong ang za tuom kha sih ding hi.

²² Tua ciengin Pasien’ migitna le a khauna kithei un: Ama pen a puate tungah khau a, ahi vangin a migitna sunga na op suoh uleh note tungah ang migi ding hi; tua bang na hi sih uleh no zong ang kisattan ding hi.

²³ Israel-te nangawn zong uplana sunga a op suoh sih uleh kipekia veve ding hi, azieh pen Pasien in amate pekia thei nading thu a nei hi.

²⁴ Bangzieh ahei cile note bawn pienpi gamlah olive kung panin ang kisattanin pienpi tawh kilebula a kisuon olive kung tungah ang kipe sam ahile, olive kungah tami pienpi a bate kipekia zawkan lai lo ding amah?

Israel Zosie in Hutdamna Nga ding

²⁵ Sanggamte aw, no sangin ka pilzaw hi, na kici lo nadingun note in tam thuthuh na thei ding uh ka dei hi: Gentile-te a lut ding za ang lutkim masangsie Israel-te pawlkhat tungah lungkhauna a tung tadi phot ahi bo hi.

²⁶ Tua hi a, Israel-te zosie in hutdamna a nga ding uhi; Lai Siengtho sungah, “Zion panin Tanpa ang pei ding a, ama in Jacob panin Pasien zatah lona a hemkhie ding hi,” ci-in kigiel hi.

²⁷ “Amau’ mawnate ka lahmang ciengin, tami khu amate tawh ka thuciemna ahi hi,” a ci hi.

²⁸ Lungdamna thu tawh kisai-in na hamphat nadingun amate pen Pasien’ galte a suoh vua, ahi vangin teelna tawh kisai-in amate pen a pu a pate uh ziehin itte ahi veve uhi.

²⁹ Bang ding ahei cile Pasien’ letsongte le Pasien’ hlatna pen a kikhel thei ahi sih hi.

³⁰ Hun khat lai-in note in Pasien’ thu na mang sih vua, ahi vangin tu-in amau’ thuman lona ziehin hepina na nga ma bangun,

³¹ note tunga a kilah hepina ziehin amate in zong hepina a nga nadingun thumang loin a om tadi uhi.

³² Bangzieh ahei cile Pasien in mi zosie a hepi nadingin thumanlona-ah mi zosie a khumcip phot hi.

³³ Aw, Pasien’ hauna, pilna le theinate thuh talawm sam e izaw! A thukhennate kan zawh ding ahi sih a, a lampite zong thei zawh ding ahi sih hi.

³⁴ “Azieh pen koi in Topa’ lungsim thei a, a thudawhpi-in koi pang ngai ahei?

³⁵ “Ahi sihle letsong a thuhkia dingin koi in ama tungah letsong pie ngai ahei?

³⁶ Bangzieh ahei cile na zosie, ama kung pan, ama tungtawn le ama ading ahi hi. Ama in minthanna nga zingzing taheh. Amen.