Rome-te 10 - Zo Bible

¹ Sanggamte aw, amate dinga ka lunggulna le Pasien kunga ka thungetpiehna ahile amate hutdam-a a op thei nading uh ahi hi.

² Amate Pasien lamah a pawnthaw mama vua, hinanle theina dih a nei lo lamtah uh teci ka pang hi.

³ Bangzieh ahei cile amate in Pasien kung pana ang pei dihna a thei lo zieh ule amau’ dihna a kip thei nading a sui ziehun Pasien’ dihna thu a mang sih uhi.

⁴ Azieh pen thukham a tawpna Khris ahi a, tua khu a um mi vannuoi in dihna a nga thei nading ahi hi.

Mi Vannuoi ading Hutdamna

⁵ Thukham pana ang pei dihna tawh kisai-in Moses in, “Tam nate banga a gamta mi in tamte ziehin a hing ding hi,” ci-in a giel hi.

⁶ Ahi vangin upna pana ang pei dihna tawh kisai-in, “Na lungsim sungah, ‘Vantungah koi va kato ding ahei?’ ci sin.” (tua pen Khris lasuh ding ci na ahi hi )

⁷ Ahi sihle, ‘Taw nei lo leihawm thuhpi sungah koi kumsuh ding ahei?’ zong ci sin,” a ci hi. (Tua pen misite lah panin Khris lato ding ci na ahi hi).

⁸ Ahi vangin tua in bang gen ahei? Tua thu pen nang tawh a kinai a, na kam le na lungtang sungah a om hi,” a ci hi. (Tua pen ka gen uh upna thu ahi hi).

⁹ Bangzieh ahei cile Jesu pen Topa ahi hi, ci-in na kam tawh pulahin, na lungtang sungah Pasien in misite lah panin ama thosah zo hi, ci-a na up leh hutdamna na nga ding hi.

¹⁰ Azieh pen mi khat in a lungtang tawh a up ziehin dihna nga a, a kam tawh a pulah ziehin hutdamna nga hi.

¹¹ Lai Siengtho in, “Ama a um mi koima in maizumna thuoh lo ding hi,” ci hi.

¹² Bangzieh ahei cile Judah mi le Greek mi kikalah a kikhiehna a om sih hi. Tua Topa ma pen mi zosie’ Topa ahi a, ama’ min a lo mi zosie tungah phaltahin thupha a pie hi.

¹³ Bangzieh ahei cile, “Topa’ min a lo mi zosie in hutdamna a nga ding uhi,” a ci hi.

¹⁴ Ahi vangin amate in a up lo pa uh kungah thu bangci nget thei ding uh ahei? Amate in a thu a zah ngai lo pa uh bangci up thei ding uh ahei? Thugen mi om sih leh amate in bang a ci zah thei ding uh ahei?

¹⁵ Kisawl sih leh amate in bang a ci gen thei ding uh ahei? A kigielsa bangin, “Lungdamna thu a phuongzah mite’ keng bang za-in etlawm ahei!”

¹⁶ Hizongle a unpi-un lungdamna thu a um kim sih uhi. Azieh pen Isaiah in, “Topa aw, ka thugen uh koi in a um ahei?” a ci hi.

¹⁷ Tuaci’n zahna panin upna pieng a, Khris’ thu kihilna tungtawnin tua thu kiza hi.

¹⁸ Ahi vangin amate in a za sih uh amah? ci-in ka dong leh amate in a za zo tahtah ta uhi. Bangzieh ahei cile, “A aw un leitung zosie zel zo a, a kammalte un leimong dong ban zo hi,” a ci hi.

¹⁹ Israel-te in a tel sih uh amah? ci-in ka dong hi. A masa penin Moses in, “Minam ahi lote a eng dingin kang bawl ding a, a mawlawm minamte ziehin kang lungthahsah ding hi,” a ci hi.

²⁰ Tua ciengin Isaiah in hangtahin, “Ei sui lote in kei ei mu zo vua, ei kan lote kungah keima ma ka kilah zo hi,” a ci hi.

²¹ Ahi vangin Israel-te tawh kisai-in ama in, “Thu mang loin a letat mite adingin sunthapai-in ka ban ka zah hi,” ci-in a gen hi.