Rome-te 1 - Zo Bible

Hopina

¹ Pasien’ lungdamna thu gen dinga ei kituomkoi, sawltahpi dinga ei kihlan, Jesu Khris’ nasem keima Paul in kang hopi uhi.

² Pasien in Lai Siengtho sungah a kamsangte tungtawnin a na ciemkholsa ahi a,

³ tua pen cilesa lamah David’ suon a Tapa tawh kisai lungdamna thu ahi hi.

⁴ Siengthona hlagau’ lamsangah misite lah panin vanglietna tawh a thawsahkiana ziehin Pasien’ tapa Topa Jesu Khris a hina thu a pholah hi.

⁵ Ama tungtawn le ama’ min ziehin Gentile-te zosie lahah upna le thumanna a op thei nadingin kote in hepina le sawltahpi za ka nga vua,

⁶ Jesu Khris a nei dinga a kihlan mite lahah note zong na kihal uhi.

⁷ Misiengthote ahi dinga kihlan Rome khuo-a om Pasien in a it mi zosie tungah: I Pa Pasien le Topa Jesu Khris tung panin hepina le lungmuonna note tungah ang tung taheh.

Lungdamko Thungetna

⁸ A masa-in leitung mun zosie-ah na upna uh kithang ahi ziehin note zosie ziehin Jesu Khris’ minin ka Pasien tungah nuomthu ka tut hi.

⁹ Bangzieh ahei cile tatsat loin ka thungetnate ah note kang phawden lamtah, ama tapa’ lungdamna thu hilin ka lungsim tahpi tawh ama’ na ka seppieh Pasien ka teci ahi hi.

¹⁰ Pasien’ deina a op leh lam khat popo panin na kung vuah a sawt loin kang haw thei teitei nadingin thu ka ngen hi.

¹¹ Bangzieh ahei cile note ang thakhausah ding Hlagau letsong pawlkhat kang hopsawn thei nadingin note kang mu ding ka lunggul mama hi.

¹² Tua ahi sihle note’ upna le keima’ upna khatlekhat tha i kipieh thei nading ahi hi.

¹³ Sanggam pasalte le sanggam numeite aw, Gentile dangte lahah ga ka law bangin, note lahah zong ga pawlkhat ka law thei nadingin (ahi vangin tu tanpha-in ei kikhahtan hi) na kung vua haw ding ka sawmsawm hi, ci nei theipi ding uh ka dei hi.

¹⁴ Greek-te le tuolniem mite tungah leibat ka nei bangin, mi pilte le mi mawte tungah zong ka nei hi.

¹⁵ Tua ahi ziehin Rome khuo-a om note kungah zong lungdamna thu hil ding ka lawp mama hi.

Lungdamna Thu’ Vanglietna

¹⁶ Bangzieh ahei cile keima in lungdamna thu ka maizumpi sih hi; tua thu pen a um zosie in hutdamna a nga nading Pasien’ vanglietna ahi hi. A masa-in Jew mite ading ahi a, Greek-te ading zong ahi hi.

¹⁷ “Midih pa in upna tawh a nungta ding hi,” ci-in a kigiel bangin lungdamna thu sungah upna tawh Pasien’ dihna ang kilang hi.

Pasien Mai-ah Gentile-te’ Mawna

¹⁸ Pasien um lote le migilote in a gitlona utawh thuman thutah a netcip ziehun vantung panin amate zosie tungah Pasien’ thangpaina ang kilang hi.

¹⁹ Azieh pen amate tungah Pasien in lah zo ta ahi ziehin, a thei ding vua kilawm nate amate tungah cientahin a kilang hi.

²⁰ Leitung a siemcil a kipan ama’ pienzie ahi a tawntung vanglietna le Pasien ahina thute a kimu thei lo vangin a piensah nate panin kitheitelin kimu zo ta ahi ziehin amate in paulap ding a nei sih uhi;

²¹ bangzieh ahei cile amate in Pasien thei sam napi ahina za-in Pasien a zatah sih vua, ama tungah nuomthu zong tut loin a lungsim vuah thu ginalo vive ngaisunin a mot lungsim uh a miel keikui hi.

²² Pil a kisah vangun mimaw ahi bo uhi;

²³ amate in a si thei mihing, vate, keng li nei ganhingte, le a bawhva ganhingte tawh a kisun limte po tawh a si thei lo Pasien’ vanglietna a khel uhi.

²⁴ Tua ahi ziehin a pumpi uh amate ma in a sietsah thei nadingun, Pasien in a lunggulna uh zui-in pahtatna sungah amate a pie dawh ta hi.

²⁵ Bangzieh ahei cile amate in zuouthu tawh Pasien’ thuman thutah a khel vua, kumtawna kipatawi ding ahi Siempupa sangin ama’ siemsate bie-in a na uh a sem zawsop uhi! Amen.

²⁶ Tam thu ziehin Pasien in amate zumhuoi huasanna sungah a pie dawh ta hi. A numeite un ngaina banga pasal tawh optonna pen ngaina ahi lo tawh a khel vua,

²⁷ tua ma bangin pasalte in zong a ngaina banga numeite tawh a optonnate uh nuasie-in pasal le pasal po a kilunggul vangut uhi. Zum mel nei loin pasal le pasal a omton vua, tuaci’n amate in a khielna utawh kituohin dan a thuoh ciet uhi.

²⁸ Pasien a thei nop lo ziehun a kilawm lo-a gamta dingin Pasien in amate lungsim hoi lo a guon hi.

²⁹ Gitlona namcin, sietna, duhopna, mudana, ki-enna, tuolthana, kihauna, kisolna, mi gensietna tawh a kidim vua,

³⁰ mi daisahte, Pasien mudate, a kihisahte, a kigolsahte, a kisielte, thusie suite, le nu le pa thu manglote,

³¹ mi mawlawmte, upna nei lote, itna nei lote, hepina nei lote ahi uhi.

³² Amate in tua banga gamtate a si dinga kilawm ahi hi, ci-in Pasien’ thukhenna thei napi, tua banga a gamtat paupau ban vuah tua banga a gamtate nangawn a thukimpi lai vaset uhi.