Piancilna 48 - Zo BibleJacob in Joseph’ Tate Thupha Pie ( Heb 11:21 ) 1 Tami zaw ciengin Joseph kungah, “Na pa a cina hi,” ci-in kigen hi. Tuaci’n ama in a tate ni, Manasseh le Ephraim a zawpi hi. 2 Jacob kungah, “Na tapa Joseph na kungah hing tung ta,” a kici ciengin ama in a tha sanin lupna tungah a to hi. 3 Jacob in Joseph kungah, “Canaan gam Luz khuo-a ka kungah Vanglien Pasien hing kilahin thupha ei pie a, 4 ama in keima kungah, “Nang kang ciphasah ding a, tampi-in kang khangsah ding hi; mi honpi khat kang suohsah ding a, nang zaw cienga na suonlehlahte in a nei zing dingin tam leitang ka pie ding hi,” ei ci hi. 5 Tua ahi ziehin Egypt gam nangma kung kang tun masanga Egypt gam sunga a suoh na tapa nite tu-in keima-a’ ahi hi; Reuben le Simeon-te ma bangin Ephraim le Manasseh zong keima-a’ hi ding hi. 6 Tuate zaw cienga a pieng ta le naute pen nangma-a’ hi ding hi. Amau’ gouluona tawh kisai-in a sanggamte’ minin amate kiciemte ding hi. 7 Azieh pen Paddan panin ka pei lai-in Canaan gam Ephrath khuo tun kuon, Canaan gam lamkalah ka da ka kaa nadingin Rachel in ei na sisan a, Ephrath (tua pen Bethlehem) peina lampi-ah ama ka vui hi,” a ci hi. 8 Jacob in Joseph’ tate a mu bepin, “Tam naupangte koi-a’ ahiei,” a ci hi. 9 Joseph in a pa kungah, “Pasien in tam sunga ei pieh ka tapate ahi hi,” a ci hi. Ama in, “Thupha ka pieh thei nadingin hepina tawh ka kungah hing peipi in,” a ci hi. 10 Tu-in Jacob a khangham ziehin ama in khuo a mu thei ta sih hi. Tuaci’n Joseph in ama kungah amate a peipi hi; tuale ama in amate tawpin a kawipom hi. 11 Israel in Joseph kungah, “Na maitang mu dingin ka kinem vawt sih hi; Pasien in tam sungah na tate zong ei musah hi,” a ci hi. 12 Tua ciengin Joseph in ama gel a pa’ khup panin ladawhin lei lam nga-in a kunsuh hi. 13 Joseph in Ephraim’ zietlam khut, Jacob’ veilam khutah, Manasseh’ veilam khut, Jacob’ zietlam khutah a nipi-in ama gel kai-in ama lam nehin a peipi hi. 14 Ahi vangin Jacob in a khut zahin a naupa Ephraim’ lu tungah ngam a, Manasseh a suoh masa pen ahi ziehin a khut kipaipe sahin a lu tungah a veilam khut ngam hi. 15 Ama in Joseph thupha pie a, “Ka pu ka pa Abraham le Isaac in ama’ mai-ah a na peina Pasien, tuni dong ka hinkhuo vannuoi-ah ka tuucingpa ahi Pasien, 16 sietna zosie panin ei tankhie vantungmi in naupangte thupha pie taheh; amate sungah keima’ min le ka pu ka pate ahi Abraham le Isaac’ minin kilo hinlen; amate mihonpi khatin leitungah pung ta uheh” a ci hi. 17 A pa in Ephraim’ lu tungah a zietlam khut a koi pen Joseph in a mu ciengin lung kim lo hi; tuaci’n ama in a pa’ khut la dawh a, Ephraim’ lu tung panin Manasseh’ lu tungah koipieh hi. 18 Joseph in a pa kungah, “Tua bang hi lo hi, ka pa aw! Tam pa a suoh masa zaw ahi ziehin na zietlam khut ama’ lu tungah koi in,” a ci hi. 19 Ahi vangin a pa in a niel a, “Thei ing, ka ta aw, ka thei hi; ama zong mi nam khat suohin a lien ding hi. Ahi vangin ama sangin a naupa a lienzaw ding a, ama’ suonlehlahte minam honpi khat suoh ding uhi,” a ci hi. 20 Tuaci’n khum ni-in ama in amate thupha pie a, Note’ min tawh Israel-te thupha kipie ding a, ‘Ephraim le Manasseh bangin Pasien in note hing bawl taheh,’ a ci ding uhi,” a ci hi. Tuaci’n ama in Manasseh mai-ah Ephraim a koi hi. 21 Tua ciengin Jacob in Joseph kungah, “Kei a si ding ka hi ta a, ahi vangin Pasien in nang hing ompi-in na pu na pate’ leitangah ang peipikia ding hi. 22 Tu-in ka namsau le ka thalpi tawh Amor’ mite khut tung pana ka na lah ahi tanh lah panin na sanggamte sangin tanh khat a tamzaw-in kang pie hi,” a ci hi. |
Zo Bible © Bible Society of Myanmar, 2018.
Bible Society of Myanmar