Piancilna 4 - Zo Bible

Cain in Abel That

¹ Tu-in mipa in a zi Eve luppi a, ama gai-in Cain nei a, “Topa panpina tawh mi khat ka nga zo hi,” a ci hi.

² Tua ciengin ama in a naupa Abel neikia hi. Tu-in Abel pen tuucingpa ahi a, Cain pen lo hlopa ahi hi.

³ A hun a cin ciengin Cain in Topa kungah lei pana a pieng singga biehna peipi a,

⁴ Abel in zong a tuuhonte lahah tacilte le a thau tuituoh pente peipi hi. Topa in Abel le ama’ biehna thusimpieh a,

⁵ ahi vangin Cain le ama’ biehna a thusimpieh sih hi. Tuaci’n Cain lungthah mama a, a mai a tuop hi.

⁶ Topa in Cain kungah, “Bang dingin lungthahin bang dingin mai tuop na hei?

⁷ A hoi bawl lacin ang kisanpieh lo ding amah? A hoi na bawl sih leh, mawna in kotbiengah ang buh khinkhian hi; ama lunggul pen nang na hi a, ahi vangin tua pen na zaw lo a poimaw ahi hi,” a ci hi.

⁸ Cain in a sanggampa Abel kungah, “Lo va kuon ta vai,” ci hi. Lo a tun ciengun Cain a sanggampa Abel tawh kihau-in ama a that hi.

⁹ Tua ciengin Topa in Cain kungah, “Na sanggampa Abel hei-a om ahiei?” a ci hi. Ama in, “Ka thei sih hi; ka sanggampa kem pa ka hi laizang amah?” a ci hi.

¹⁰ Tuale Topa in, “Bang teng pi khat bawl zo na hi tai? Ngai vawi; leisiet panin na sanggampa’ sisan kei kungah ang kiko hi!

¹¹ Tu-in na khut pana a luongkhie na sanggampa’ sisan hup dinga a kamkah leitang tungah nang samsiet thuoh na hi ta hi.

¹² Leitang na hlaw ciengin nang adingin lei panin an a pieng nawn sih ding hi; nang pen leitungah a galtai, a vahvai na hi ding hi,” a ci hi.

¹³ Cain in Topa kungah, “Kei dan ei kipiehna pen kei thuoh zawh ding za sangin nasie zaw me izaw!

¹⁴ Tuni-in leitang panin kei nei notmang ta a, na maitang panin kei ka kiphuol ding hi; kei a galtai le leitungah a vahvaih ding ka hi ta a, kei ei mu poma in ei that ding hi,” a ci hi.

¹⁵ Tua ciengin Topa in ama kungah, “Tua bang hi lo ding hi! Mi khatpo in Cain a tha leh a za sagi-in phulahna thuoh ding hi,” a ci hi. Ama a tuohkha mi koima in ama a tha lo nadingin, Topa in Cain tungah melcina khat a koi hi.

¹⁶ Tua ciengin Topa kung panin Cain pei dawhin Eden um nisuona lam Nod gamah a teng hi.

Leitung Khuosahzie Kipatna

¹⁷ Cain in a zi luppi a, ama gai-in Enoch nei hi. Tuale ama in khuo sat a, tua khuopi pen a tapa Enoch’ min tapin Enoch a hisah hi.

¹⁸ Enoch’ sung panin Irad suoh a, Irad pen Mehujael’ pa ahi hi. Mehujael pen Methushael’ pa ahi a, Methushael pen Lamech’ pa ahi hi.

¹⁹ Lamech in zi ni nei a, a khat’ min Adah ahi a, adang khat’ min Zillah ahi hi.

²⁰ Adah in tapa Jabal nei a, ama pen puonbuh sunga teng, gankhawite pienna pupi ahi hi.

²¹ A sanggampa’ min Jubal ahi a, lyre le theile tumte zosie’ pienna pupi ahi hi.

²² Zillah in Tubal-cain nei a, sumngo le sia vanzah nam zosie a bawlpa ahi hi. Tubal-cain’ sanggamnu pen Naamah ahi hi.

²³ Lamech in a zite kungah, “Adah le Zillah aw, ka aw ngai un. Lamech’ zite aw, ka thugen ngai un: Kei ei liemsah mi khat ahi, kei ei sat tangval khat keima in ka that ta hi.

²⁴ Cain tung bawn-a a za sagi-a phu kila ahile, a tahtahin Lamech a thatte a za sawmsagi le sagi vei-in phu kila ding hi,” a ci hi.

Seth’ Suonlehlahte

²⁵ Adam in a zi luppi leuleu a, tua nu in tapa khat nei-in a min Seth phuo hi. Azieh pen tua nu in, “Cain in Abel a tha ziehin Pasien in Abel tangin kei adingin tapa adang khat ei pie zo hi,” a ci hi.

²⁶ Seth in zong tapa khat nei a, a min Enosh a hisah hi. Khum hunin mite in Topa’ min a lo pan ta uhi.