Piancilna 34 - Zo Bible

Dinah A Kibuonna

¹ Tu-in khum gam numeite kunga haw dingin Jacob tawh a nei Leah’ tanu Dinah a kuon hi.

² Khum gam ulien Hiv mi Hamor’ tapa Shechem in a mu ciengin, ama in tua nu manin pauhat thu tawh a luppi hi.

³ Ama in Jacob’ tanu Dinah a lunggul vatuh hi; ama in tua nu ngai-in awnem no tawh a hopi hi.

⁴ Tuaci’n Shechem in a pa Hamor kungah, “Tami numei nu ka zi dingin ei lahpieh in,” a ci hi.

⁵ Tu-in Shechem in a tanu Dinah a suhthaang lam Jacob in a za hi; ahi vangin a tate gamlahah ganhonte tawh a om uhi. Tuaci’n amate a tun masangsie-in Jacob ham loin a om hi.

⁶ Jacob hopi dingin ama kungah Shechem’ pa Hamor haw a,

⁷ khum hun tahin gamlah panin Jacob’ tapate a tung uhi. Amate in tam thu a zah ciengun a sin uh so-in a lungthah mama uhi, azieh pen Jacob’ tanu tawh a lupton ziehin ama in Israel sungah mot gamtatna tun hi, bangzieh ahei cile tua bang pen bawl dinga a kilawm vawt lo thu ahi hi.

⁸ Ahi vangin Hamor in amate a hopi a, “Ka tapa Shechem in na tanu uh a lunggul vangut hi; hepina tawh a zi dingin ama ei pie un.

⁹ Ko zi le ta-in ei zong un; na tanute ei pie unlen, ka tanute uzong la un.

¹⁰ Ko lahah nang teng ding vua, no adingin leitang ang kipie ding hi; a sungah tengin sum bawl unlen nei le lam zong khol un,” a ci hi.

¹¹ Shechem in zong a pa le a sanggamte kungah, “Na maipha ei musah unlen, ka kunga na gen popo uh kang pie ding hi.

¹² Mo man le letsong na dei bangun a tam thei zaza ei ngen un, nei nget bangbang uh kang pie ding hi; ka zi dingin numei nu ei pie ta popo un,” a ci hi.

¹³ Ama in a sanggamnu uh Dinah a suhthaangsa ahi ziehin Jacob’ tate in Shechem le a pa Hamor solna tawh a dawng uhi.

¹⁴ Amate in, “Tep tan lo mipa tunga ka sanggamnu uh ka pieh ding uh hi thei ka sa sih uhi. Tua bang pen ko adingin mindai huoi luo ding hi.

¹⁵ Tami thu khat tungtawn behin kang thukimpi ding uhi: Ko tawh na kibah nadingun no lahah pasal zosie a tep uh kitan ding hi.

¹⁶ Tua ciengin ka tanute uh kang pie ding vua, tuaci’n ko adingin na tanute ka la ding uhi. Tuale note lahah kote hing tengin mi khat i suoh ding uhi.

¹⁷ Ahi vangin ka thu ei mang loin tep na tan sih uleh ka tanu uh kai-in ka pei ding uhi,” a ci uhi.

¹⁸ Amau’ thusun in Hamor le Hamor’ tapa Shechem lungdamsah hi.

¹⁹ Tangvalpa in Jacob’ tanu a dei seng ziehin tami bawl ding pen a kiheh sih hi. A innkuonpi zosiete lahah ama a kipatawi pen ahi hi.

²⁰ Tuaci’n a khuopi vuah Hamor le a tapa Shechem pei-in a khuosung mite tawh a kiho vua,

²¹ “ Tam mite ei tungah thunuom mama uhi; gam sungah tengsahin summet bawlsah vai, azieh pen amate dingin gam zai mama hi; a tanute uh zi-in la vai-in, i tanute uzong amate pie vai.

²² Eite lahah a ten ding uh thukimin mi khat i suo thei nading tam thu khat beh a om hi. Amate tep a kitan ma bangun eite lahah pasal zosie tep kitan ding hi,” a ci uhi.

²³ Amau’ ganhonte, amau’ nei le lamte, le a ganhingte zosie uh eite -a’ ding hi lo amah? Amate tawh kithukim lel phot vai. Tua hile eite lahah amate ang teng ding uhi.

²⁴ Tuale khuopi tunkot pana a pusuoh mi zosie in Hamor le a tapa Shechem’ thugen a mang uhi; tuale khuopi tunkot pana a pusuoh pasal zosie tep a kitan uhi.

Dinah’ Sanggamte in Phula

²⁵ A ni thum ni-in amate in na a sah laitahun Jacob’ tapa nite, Dinah’ sanggam Simeon le Levi in a namsau uh tawi-in thei lo kalin khuopi a sim vua, pasal zosie a that uhi.

²⁶ Ama gel in namsau tawh Hamor le a tapa Shechem thatin Shechem inn sung panin Dinah kaiphitin a pei uhi.

²⁷ Jacob’ tapa dangte zong a pei vua, siluong tungah lam hla-in a sanggamnu uh kisuhthangna khuopi a bulu uhi.

²⁸ Amate in ganhonte le bawnghonte, laate, a khuopi sung ule a lo sung vua om popo a tomgam sieng uhi.

²⁹ A nei a lam zosie uh, a naupang zosie ule a zite, a inn sung vua om zosie manin gal vanlahin a puomang uhi.

³⁰ Tua ciengin Simeon le Levi kungah, “No tegel in tami gama a teng Canaan-te le Periz-te tungah nei gimsiesah vua, kei tungah lunggim nei guon uhi; ka mite lah halno khat ahi bo a, kei ei do dingin amate kisutuo-in ei simin ei bulu uleh kei le ka innkuonpite ei kisusie ding hi,” a ci hi.

³¹ Ahi vangin amate in, “Ka sanggamnu uh numei pahtat banga kibawl dingin a kilawm amah?” a ci uhi.