Piancilna 27 - Zo Bible

Isaac in Jacob Thupha Pie

¹ Isaac vuoi-in a mit mangin khuo a mu thei nawn lo ciengin ama in a tapa tapen Esau hlan a, ama kungah, “Ka tapa aw,” a ci hi; ama in dawng a, “Kei tanah om ing,” a ci hi.”

² Ama in, “En in, kei ka vuoi ta hi; ka si ding hun ka thei sih hi.

³ Tua ziehin tu-in na hiemte ahi na thallawngte le na thal la inlen, gamlahah pei-in kei adingin sa va beng ta’n.

⁴ Tua ciengin ka si masangin thupha kang pieh thei nadingin ka du danin an tui mama hing huon inlen, ka neh dingin ka kungah hing peipi in,” a ci hi.

⁵ Isaac in a tapa Esau a hopi laitahin Rebekah in na ngaidap hi. Tuaci’n Essau in a pa a puoh ding sa beng a gam a kuon ciengin,

⁶ Rebekah in a tapa Jacob kungah, “Na sanggampa Esau kungah na pa thugen ka za a,

⁷ ‘Ka si masangin Topa mai-ah thupha kang pieh thei nadingin ka kungah gamsa ei puoh inlen, ka neh dingin an tui mama hing bawl in,’ a ci hi.

⁸ Tua ahi ziehin tu-in ka tapa aw, kang sawl bangin ei mang in.

⁹ Na pa du danin antui ka bawl thei nadingin keelhon lahah va pei inlen keelno a hoi ni hing peipi in.

¹⁰ A si masangin thupha ang pieh thei nadingin na pa neh dingin ama kungah tuate na puoh ding hi,” a ci hi.

¹¹ Ahi vangin Jacob in a nu Rebekah kungah, “En in, ka sanggampa Esau a mulpha ahi a, kei pen a cinel ka hi hi.

¹² Ka pa in kei ei tham kha thei ding a, koi thupha nga tah sangin ama simmaw tawh ka kibang ding a, kei le kei samsiet kitun ka suohzaw thei ding hi,” a ci hi.

¹³ A nu in ama kungah, “Ka tapa aw, keima tungah nang ang kisamsietna tu taheh; ka thu ei mang tapo inlen, va pei-in ka kungah keelnote ei puoh in,” a ci hi.

¹⁴ Tuaci’n ama pei-in tuate manin a nu kungah a peipi hi; tuale a nu in a pa dei danin an tui mama a bawl hi.

¹⁵ Tua ciengin Rebekah in a inn-a a kep, a tapa uzaw Esau’ puonhoi pente la-in a tapa nauzaw Jacob a silsah hi.

¹⁶ Tuale ama in a khut tung le a cinelna mun a ngawng tengah keelnote’ vun a silsah hi.

¹⁷ Tua ciengin ama nu in a bawlsa antuite le anlumte a tapa Jacob a pie hi.

¹⁸ Tuaci’n a pa kungah ama pei a, “Ka pa aw,” a ci hi; tuale ama in, “Tanah om ing; nang koi na hei, ka tapa aw?” a ci hi.

¹⁹ Jacob in a pa kungah, “Keima na tapa tapen Esau ka hi hi. Nei gen bangin ka bawl zo ta hi; tu-in to inlen kei thupha nei pieh thei nadingin ka sa matsa ne in,” a ci hi.

²⁰ Ahi vangin Isaac in a tapa kungah, “Ka tapa aw, bangci a nang hici mat zuai thei ahiei?” a ci hi. Ama in, “Topa na Pasien in kei ei lawcinsah zieh ahi hi,” ci-in a dawng hi.

²¹ Tua ciengin Isaac in Jacob kungah, “Ka tapa aw, ka ta Esau tahtah na hi amah, awle na hi sih ahei ci kang thei nadingin kang tham thei nadingin ka kung ei nai vawi,” a ci hi.

²² Tuaci’n a pa kungah Jacob peito-in ama a tham a, tuale ama in, “A aw lah Jacob’ aw a bang a, ahi vangin a khut lah Esau’ khut a bang vanuh in,” a ci hi.

²³ A sanggampa Esau’ khut bangin a khutte a mul a phat ziehin ama in a khencien thei sih hi; tuaci’n ama thupha a pie hi.

²⁴ Ama in, “Nang ka tapa Esau tahtah na hiei mah? a ci hi. Ama in, “Hi ma ing,” ci-in a dawng hi.

²⁵ Tua ciengin ama in, “Keima in na sa matsa ne-in thupha kang pieh thei nadingin ka kungah hing peipi in,” a ci hi. Tuaci’n a kungah a peipi a, ama in a ne hi; tuale ama in lenggazu zong ama kungah peipi-in ama in a dawn hi.

²⁶ Tua ciengin a pa Isaac in ama kungah, “Ka kung hing nai inlen ei nam in, ka tapa aw,” a ci hi.

²⁷ Tuaci’n ama in nai phei-in ama a nam hi; tuale ama in a puon gim dihin ama thupha pie a, “Ah, ka tapa gimnam khu Topa’ thupha a piehsa gamlah gimnam tawh kibang hi.

²⁸ Pasien in na tungah van daitui, leitang hoi le an le lenggazu a kiningcingin hing pie taheh.

²⁹ Mite in na na semin, na mai-ah minamte kun uheh. Na sangamte tungah a topa hi inlen, na mai-ah na nu’ tapate kun uheh. Nang ang samsie poma samsiet hi hinlen, nang thupha ang pie poma thupha nga hi taheh!” a ci hi.

Esau’ Taan Thupha

³⁰ Isaac in Jacob thupha a pieh zaw, a pa Isaac kung panin Jacob a pei zaw diemin a gamvana panin Esau a tung hi.

³¹ Ama in zong an tuituoh huonin a pa kungah a peipi hi. Ama in a pa kungah, “Kei thupha nei pieh thei nadingin ka pa thoto inlen na tapa’ sa matsa ne in,” a ci hi.

³² A pa Isaac in ama kungah, “Nang koi na hiei?” a ci hi. Ama in, “Kei na tapa tapen Esau ka hi hi,” a ci hi.

³³ Tua bepin Isaac nahpitahin ling a, “Tua ahile ka kunga a gamsa matsa ei puohpa koi hi mawh ahei? Nang hing pei masangin tua teng a unpi-in ka ne zo a, ama thupha ka pie zo ta hi. Hi hi, ama thupha nga ding ahi mawh ta khula!” a ci hi.

³⁴ Esau in a pa thugen a zah bepin nahpitah le nasie tahin kapin a pa kungah, “Kei thupha ei pie bo ven, kei zong, izaw ka pa!” a ci hi.

³⁵ Ahi vangin ama in, “Na naupa zuouthu tawh ang pei-in na thupha la siengzo hi,” a ci hi.

³⁶ Esau in, “Ama’ min Jacob a kivaw khu man ngel hi lo amah? Azieh pen ama in ni vei ei sol zo hi. Ama in ka innluoza ei lahpieh hi; tuale en in, tu-in ka thupha ei lahpieh leuleu hi,” a ci hi. Tua ciengin ama in, “Kei adingin thupha khat beh na hen ta sih amah?” a ci hi.

³⁷ Isaac in Esau dawng a, “Ama pen na topa dingin ka bawl zo ta hi. A na sem dingin a sanggam zosie ka pie zo a, an le lenggazu tawh ama ka va zo hi. Tua ahi ciengin nang adingin bang kang bawlpieh thei nawn ding ahei, ka tapa aw?” a ci hi.

³⁸ Esau in a pa kungah, “Ka pa aw, thupha khat beh na nei ta sih amah? Kei thupa ei pie in, kei zong, ka pa aw!” a ci hi. Tuale Esau nahpitahin kap hi.

³⁹ Tua ciengin a pa Isaac in a dawng hi: En in, na tenna mun khu leitang hoi panin a kigamla ding a, van daitui tawh zong a kigamla ding hi.

⁴⁰ Na namsau tawh na nungta ding a, nang in na sanggampa’ na na sem ding hi. Hizongle ama na ledo ciengin, na ngawng panin a hahkol na kuoitan ding hi,” a ci hi.

Esau’ Thangpaina Panin Jacob Suohta

⁴¹ A pa in Jacob thupha a pieh zo tah ziehin tu-in Esau in Jacob muda a, tuale Esau in, “Ka pa ading kaa le mau hun ang nai ta hi; tua ciengin ka naupa Jacob ka that ding hi,” ci-in ama le ama a kiho hi.

⁴² Hizongle Rebekah kungah a tapa tapen ahi Esau’ thugen teng kigen hi; tuaci’n ama in a tapa nauzaw Jacob hlansahin ama kungah, “Na upa Esau in nang hing tha sawmin ama le ama kihenem hi.

⁴³ Tua ahi ziehin ka tapa aw, tu-in ka thu ei mang in; Haran-a ka naupa Laban kungah mallangtahin va tai-in,

⁴⁴ na tunga na sanggampa thangpaina a ven masangsie ama tawh bakhat sung va omton inlen,

⁴⁵ na sanggampa a thangpaina ang ven a, a tunga na bawlna teng a mangngil zaw dong cieng va om ta’n. Tua ciengin mi sawlin khum mun panin kang lasah ding hi. Nikhat thu-in na nipi gelin bang dingin hing tan ding ka hei?” a ci hi.

⁴⁶ Tua ciengin Rebekah in Isaac kungah, “Hit numeite ziehin ka hinkhuo ka cimtah ta hi. Jacob in tam gama numeite lah panin tam bang Hit numeite hing kinunpi mawh leh kei adingin ka hinkhuo bang matlap om ding ahei,” a ci hi.