Piancilna 16 - Zo Bible

Ishmael Suona

¹ Tu-in Abram’ zi Sarai in ta nei lo hi. Ama in Hagar min nei Egypt-te sila numei khat a nei hi.

² Sarai in Abram kungah, “Topa in ka ta nei ding ei khahtan lam na thei hi; pei inlen ka sila numei nu va luppi ta’n; ama sung pana ta nei ding ka hi kha ding hi,” a ci hi. Tuale Abram in Sarai’ thugen a mang hi.

³ Tuaci’n Canaan gamah Abram kum sawm a ten zaw ciengin Abram’ zi Sarai in Egypt mi a sila numei Hagar la-in a pasal Abram kungah a zi-in a pie hi.

⁴ Ama in Hagar luppi-in tua nu a gai hi; tuale a gai lam a kithei ciengin a pinu simmaw bawl hi.

⁵ Tua ciengin Sarai in Abram kungah, “Kei tunga a manlo-a ei kibawlna pen nang tungah tung taheh! Na kawi dingin ka sila numei kang pie a, ama in a gai lam a kithei bepin kei ei simmaw bawl hi. Topa in nang le kei kikalah thu khen taheh!” a ci hi.

⁶ Ahi vangin Abram in Sarai kungah, “Na thuneina sungah na sila numei a om hi; na dei bangin ama tungah bawl in,” a ci hi. Tua ciengin Sarai in tua nu a huotbawl pai a, ama kung panin a taimang hi.

⁷ Topa’ vantungmi in senel gam ciatui gei khatah tua nu a mu hi. Tua pen Shur zotna lampi gei-a ciatui ahi hi.

⁸ Tuale ama in, “Sarai’ sila numei Hagar aw, nang hei pana hing pei a, hei lam zuon ding na hiei?” a ci hi. Ama in, “Ka pinu Sarai kung pana a taimang ka hi hi,” a ci hi.

⁹ Topa’ vantungmi in ama kungah, “Na pinu kungah peikia inlen ama tungah ki-ap in,” a ci hi.

¹⁰ Topa’ vantungmi in ama kungah, “Na suonlehlahte nahpitahin ka pungsah ding a, amate kisim zo lo ding hi,” zong a cibe lai hi.

¹¹ Tuale Topa’ vantungmi in ama kungah, “Tu-in nang in nau na pai zo a, tapa khat na nei ding hi; Topa in na gentheina hing thudon zo ahi ziehin, ama’ min pen Ishmael na phuoh ding hi.

¹² Ama pen mihing lahah a gelsuoh laa bang ding a, ama’ khut in mi zosie langpangin, mi zosie’ khut in zong ama a langpang ding hi; a sanggamte zosie galbawlin a nungta ding hi,” a ci hi.

¹³ Tuaci’n ama a hopi Topa pen, “Nang, El-roi na hi hi,” ci-in a min phuo hi; azieh pen tua nu in, “Keima in Pasien ka mu zo tahtah ta a, tuale ama ka mu zaw-in kei a hing lai ka hi amah?” a ci hi.

¹⁴ Tua ahi ziehin tua tuikhuh pen a min Beer-lahai-roi kici hi; tua khu Kadesh le Bered kikalah a om hi.

¹⁵ Abram in Hagar tawh tapa khat a nei hi. Abram in Hagar tawh a nei a tapa pen a min Ishmael phuo hi.

¹⁶ Hagar in ama adingin Ishmael a nei hunin Abram kum sawmgiet le guh a pha hi.