Phatna-late 86 - Zo Bible

Galte Nanzawh nading Hungetna

David’ Thungetna.

¹ Topa aw, na bil ei ngat inlen, keima ei dawng in, bangzieh ahei cile kei zawngin ka cimaw hi.

² Keima’ hinna ei kem in, azieh pen na tungah kang ki-ap hi; nangma ang muong na nasempa ei hun in. Nangma ka Pasien na hi hi;

³ Topa aw, kei ei hepi in; azieh pen sunthapai-in na kungah keima kang kiko hi.

⁴ Na nasempa’ hlagau hing lungdamsah in, azieh pen nangma tungah ka hlagau kang lamto hi, Topa aw,

⁵ Azieh pen Topa aw, nang hoi-in mawna na maisah a, nang ang hlan mi zosie tungah a kicing itna kip na nei hi.

⁶ Topa aw, ka thungetna na bil ei ngat in; nangma tungah thumin kang kikona ei ngai in.

⁷ Keima ei dawng ding na hi ziehin, ka hahsat ni-in keima in nang kang hlan hi.

⁸ Topa aw, pasien-te lahah nang tawh a kibang koima om lo a, nangma’ sepsa tawh a kibang nasep khat zong om lo hi.

⁹ Topa aw, na bawlsa minam zosie ang pei-in na mai-ah ang kun ding vua, amate in nangma’ min ang phat ding uhi.

¹⁰ Azieh pen nang na lien a, na lamdangte na bawl hi; nang beh Pasien na hi hi.

¹¹ Topa aw, na thutah-ah ka kalsuon thei nadingin nangma’ lampi ei hil inlen, na min ka zatah thei nadingin, a kaakawm lo lungtang keima ei guon in.

¹² Topa ka Pasien aw, ka lungsim zosie tawh na tungah lungdam kang ko a, tuale keima in na min ka thangsah zing ding hi.

¹³ Bangzieh ahei cile keima nei itna kip lien mama a, Misikhuo thuhpite sung panin ka hlagau nei hunkhie hi.

¹⁴ Pasien aw, mi kihisahte, kei ei langpangin ang kipan hi; thu-helhawt pawlkhat in kei tha ei sawm vua, amate in nangma ang thudon sih uhi.

¹⁵ Ahi vangin Topa aw, nang a khuotuo thei le a hepi siem Pasien na hi a, lungthah bai vawt loin, nang itna kip le muonhuoina tawh na kidim hi.

¹⁶ Kei lamah hing kihei inlen, keima ei hepi in. Na nasempa thahatsah inlen, na nasem numei nu’ tapa hing hundam in.

¹⁷ Topa aw, nangma in kei ei hu-in ei henem zo na hi ziehin, kei ei mudate in tua thu mu-in a maizum nadingun, nei angvanna lim khat keima ei lah in.