Phatna-late 3 - Zo Bible

Hamsatna Sungah Pasien Muonna

A tapa Absalom kung pana tai lai-a David’ laphuo.

¹ Topa aw, ka galte tam sam e! Kei ei langpang ding mi tam mama hi;

² mi tampite in keima kungah, “Nang adingin Pasien sungah huna om lo hi,” ei ci uhi. Selah

³ Ahi vangin Topa aw, nangma khu ka kimvela ka kidalna lum na hi a, ka vang le ka lu ei phongto pa na hi hi.

⁴ Topa tungah nahpi-in ka kiko a, ama in a muol siengtho panin keima ei dawng hi. Selah

⁵ Keima lumin ka kimu hi; Topa in ei kep ziehin ka khanglo kia hi.

⁶ Ka kimkotah keima ei langpang mi tul sawm tampite ka giing sih hi.

⁷ Topa aw tho in! Kei ei hunkhie in, ka Pasien aw! Bangzieh ahei cile nang in ka galte na pangbeh gawp a, migilote’ ha na sutawng hi.

⁸ Hutkhietna khu Topa-a’ ahi hi; na mite tungah na thupha tung taheh! Selah