Phatna-late 26 - Zo Bible

Thutanna ding Thumna le Thumanna ding Tangkona

David’ laphuo.

¹ Topa aw, ka dihna ei talang in, azieh pen citah tahin ka kalsuon a, lungkaa loin Topa ka muong hi.

² Topa aw, ei ze-et inlen ei sin in. Ka lungtang le ka lungsim ei sittel in.

³ Azieh pen ka masangah na itna kip om a, nangma tungah muonhuoi tahin ka gamta hi.

⁴ Kimanna a nei lote tawh toton loin, thusim neite tawh ka kithuo sih hi;

⁵ sietna bawl mihonte ka muda a, migilote tawh ka toton sih hi.

⁶ Topa aw, maw nei lona ka lahna-in ka khut ka sil a, na maitam kimvelah pei-in,

⁷ lungdamkona la a gingin ka sa a, a silbawl lamdangte ka gen hi.

⁸ Topa aw, na tenna innpi le nangma’ minthanna a opna mun ka ngai hi.

⁹ Ka hinna khu maw neite, sisan suohsahte le

¹⁰ a zietlam khuta guhgol kidimte tawh ei phiettha vawt sin.

¹¹ Ahi vangin kei ka hi leh, citahna tawh ka kalsuon hi; ei tankhie inlen, hepi in.

¹² Leizangtam tungah ka ding hi; keima in mihon tampite lahah Topa ka phat ding hi.