Phatna-late 143 - Zo Bible

Galte kung pan Suotah ding Ngetna

David’ laphuo

¹ Topa aw, ka thungetna ei za inlen, na muonhuoina sungah kang thumnate na bil ei daw in; na dihna sungah keima ei dawng in.

² Na nasempa kei tungah thu hing khen sin, azieh pen nangma mai-ah mihing a thuman koima om lo hi.

³ Azieh pen gal in kei ei delin, ka hinna tuoldenna-in nei a, hun sawtpi lai-a a site bangin khuomiel lahah ei tosah hi.

⁴ Tua ahi ziehin ka sunga ka hlagau a tha zawm gawp hi; ka sunga ka lungtang zong zau-in a citun hi.

⁵ Hun luite phawhkia-in, na silbawlte zosie ka ngaisun a, na khut tawh na sepsate ka lungngaingai hi.

⁶ Keima in na tungah ka khut kang zah hi; gam gawta in tui a du bangin ka hlagau in nang ang hlangai hi. Selah

⁷ Topa aw, kei ei dawng meng in; ka hlagau a cimaw ta hi. Keima kung panin na mai phuol sin, tua ahi sihle kei pen Leihawm sunga a pei mite ka bang ta ding hi.

⁸ Nang kang muon ziehin zingmawngin na itna kip ei zasah in. Nangma tungah ka hlagau kang lapto ziehin ka pei nading lampi ei hil in.

⁹ Topa aw, ka galte kung panin keima ei hun in. Nangma beel dingin na kungah kang tai hi.

¹⁰ Nang ka Pasien na hi ziehin na deilam ka sep thei nadingin keima ei hil in. A hoi nangma’ hlagau in lamphei-ah ei pui taheh.

¹¹ Topa aw, na min na khuolna-in ka hinna ei keppieh in. Buoina kawmkal panin na dihna sungah ei peipi in.

¹² Na nasempa ka hi ziehin ka galte le ka langte zosie nangma’ itna kip sungah sumang in.