Phatna-late 142 - Zo Bible

Mi Bawlsiete pan Suotah ding Ngetna

Suonghawm sunga a omlai-a David’ Phuo Maskil khat. Thungetna khat.

¹ Topa tungah ka aw tawh ka kiko hi; Topa tungah ka aw tawh thumna ka nei hi.

² Keima in ama mai-ah ka lungkim lona teng ka sung hi; keima in ama mai-ah ka buoina teng ka gen hi.

³ Ka hlagau basamin a op ciengin nangma in ka lampi na thei hi. Amate in ka peina lampi-ah keima thang ei siedap uhi.

⁴ Ka zietlam ka en a, ka mu hi, ei phawh kha koima om lo hi; ka kibuh nading mun a om ta sih hi; koima in kei ei don lo hi.

⁵ Topa aw, nang tungah kang kiko hi; keima in, “Nang ka kibuhna na hi a, a hinglai mite’ leitangah keima’ tanh na hi hi,” kang ci hi.

⁶ Kang kikona ei ngaipieh in, azieh pen a niem mama-in kei ei kikoi hi. Kei ei bawlsiete kung panin ei hundam in, azieh pen kei adingin amate a hat seng uhi.

⁷ Keima in nangma’ min tawh lungdam kang ko thei nadingin, thong sung panin ei la dawh in. Nangma in nei limbawl ding ziehin midihte in ei kimkot ding uhi.