Phatna-late 119 - Zo Bible

Pasien’ Thukham a Thupina

¹ Topa’ thukham zui-in kalsuon a, a gamtatna vua a genbang lote thupha nga ahi hi.

² Ama’ thupiehte zui-in lungsim tahpi tawh ama a suite thupha nga ahi a,

³ khielna zong bawl loin ama’ lampi a zuite thupha nga ahi hi.

⁴ Nangma’ thuhilte limtaha a kizui nadingin thu na pie zo hi.

⁵ Na thukipte ka zuina ah ka lampite suhkipin om taheh!

⁶ Tua ciengin na thupiehte zosie mit tuhna’n ka nei ziehin, ei kimaizumsah lo ding hi.

⁷ A dih na ngaina kipte ka sin ciengin keima in lungsim man tawh kang phat ding hi.

⁸ Na thukhamte ka zui ding hi; kei ei nuasie malmal sin.

⁹ Tangvalte in amau’ gamtatna a sientho nadingin bangci kep ding uh ahei? Na kammal banga zuina tawh siengthosah thei ding hi.

¹⁰ Ka lungsim zosie tawh nang kang sui hi; na thupiehte panin kei ei pielsah sin.

¹¹ Na tunga kang maw lo nadingin ka lungsim sungah na thu ka khol hi.

¹² Topa aw, thupha nga ta in; na thukhamte kei ei hil in.

¹³ Na kam pana ang pusuoh na ngaina kipte zosie ka nephu tawh ka pulah hi.

¹⁴ Hauna zosie a nga tawh kibangin na thukipte zui nuom ka sa hi.

¹⁵ Na thuhilnate lungngai-in na lampite mit tuhna’n ka nei ding hi.

¹⁶ Na thukham sungah nuom ka sa ding hi; na thu ka mangngil sih ding hi.

¹⁷ Nungta-in nangma’ thu ka zui thei nadingin na nasempa keima ei lawcingsah in.

¹⁸ Na thukham sung pan a lamdang nate ka mu thei nadingin ka mit ei honpieh in.

¹⁹ Kei pen tam leitungah pemta bangin ka teng hi; keima kung panin na thupiehte phuol sin.

²⁰ Na ngaina kipte a tawntungin ka lunggul ziehin ka hlagau a haisam hi.

²¹ Na thupiehte pana a vahmang, a kisamsie, a kiphasahte na phawhsie hi;

²² na thukipte zui ka hi ziehin ka kung panin amau’ ei nuisatna le ei simmawnate la dawh ta’n.

²³ Miliente in kei ei langpan nading thu a dap vaihawm vangun, na nasempa in na thupiehte a lung ngaingai ding hi.

²⁴ Na thukipte keima’ nopsahna ahi a, tuate ka thukuppite ahi uhi.

²⁵ Ka hlagau leivui lahah a kipawi hi; na thu om bangin ei hingsahkia in.

²⁶ Ka gamtatnate kang gen ciengin nangma in keima nei dawng hi; na thukhamte ei hil in.

²⁷ Na thuhilna dante ei telsah inlen, na bawl nalamdangte ka lung ngaingai ding hi.

²⁸ Dana ziehin ka hlagau a zungmang dawh ta hi; na thu om bangin keima ei thahatsah in.

²⁹ A man lo lampite tawh ei kigamlasah in; hepina tawh na thukham ei hil in.

³⁰ Thuman lampi ka tel zo hi; ka mai-ah na ngaina kipte ka koi hi.

³¹ Topa aw, na thukipte ka pom hi; kei ei maizumsah sin.

³² Ka theitelna na khansah ziehin na thupiehte bangin ka zui hi.

³³ Topa aw, na thukham lampite ei hil in. tua hi leh a tawpna dongin ka zui ding hi.

³⁴ Na thukhamte kemin ka lungsim zosie tawh ka zui thei nadingin thutelna ei pie in.

³⁵ Na thupieh lampite ah keima ei pui in, bangzieh ahei cile tuate ah nuom ka sa hi.

³⁶ Ka lungsim pen angsung khuolna lam hi loin, na thukip lamah ei heipieh in.

³⁷ Bangma lote ka etna panin ka mit ei heipieh in; na lampite ah hinna ei pie in.

³⁸ Ang zatah mite dinga na kamciem, na nasempa tungah hing kipsah in.

³⁹ Na ngaina kipte hoi ahi ziehin ka kung panin ka giin mama mindaina ei heimangpieh in.

⁴⁰ En in, keima in na thuhilnate ka lunggul hi; Na thumanna sungah hinna ei pie in.

⁴¹ Topa aw, na kamciem bangin itna kip, na hutdamna kei tungah hing tungsah in.

⁴² Tua ciengin na thu muong ka hi ziehin ei zako mite ka dawn nading ka nei ding hi.

⁴³ Na ngaina kipte lamen ka hi ziehin, ka kam panin thutah kammalte la dawh malmal sin.

⁴⁴ A tawntungin tatsat loin na thukhamte ka zui ding hi.

⁴⁵ Na thuhilnate ka sui ziehin suohta tahin ka vah ding hi.

⁴⁶ Kumpite mai-ah zong nangma’ thukipte ka gen ding a, maizumna ka thuoh sih ding hi.

⁴⁷ Keima in tuate ka dei ziehin tua na thupiehte sungah keima’ nopsahna ka mu hi.

⁴⁸ Keima’ dei ahi na thupiehte ka zatah a, nangma’ thukhamte ka lung ngaingai ding hi.

⁴⁹ Keima nei lametsah ahi na nasempa tunga na kammal phawh in.

⁵⁰ Tam khu ka lunggim hun cienga ka kihenepna ahi a, tua na kamciem in keima hinna ei pie hi.

⁵¹ Mi kiphasahte in kei ei zako vua, hinanle na thukham panin kei ka piel sih hi.

⁵² Topa aw, hun lui lai-a kipanin nangma’ ngaina kipte ka ngaisut khah ciengin, ka lung a nuom hi.

⁵³ Na thukham a nuasie migilote ziehin ka sin a so hi.

⁵⁴ Ka opna inn popo ah na thukhamte la-in ka sa hi.

⁵⁵ Topa aw, zanin na min ka phawh a, na thukham ka zui hi.

⁵⁶ Na thuhilnate ka zui ziehin keima tungah tam thuphate ang tung hi.

⁵⁷ Topa keima’ satanh ahi hi; na thute zui ding ka kiciem hi.

⁵⁸ Ka lungsim zosie tawh na maipha kang ngen hi; na thuciem a omsa bangin keima ei hepi in.

⁵⁹ Na lampite ka ngaisut ciengin, na thukipte lamah kang kalsuon hi;

⁶⁰ na thupiehte zui ding ka kinaw a, ka kiheh sih hi.

⁶¹ Migilote’ thangkhau tawh ei kisie nanleh keima in na thukham ka mangngil sih hi.

⁶² A dih na ngaina kipte ziehin nang ang phat dingin zankim laitahin ka tho hi.

⁶³ Kei, nang ang zatah mite le nangma’ thuhilnate a zui mi zosiete’ kigoppi a guolpa uh ka hi hi.

⁶⁴ Topa aw, na itna kip tawh leitung a kidim hi; na thukhamte kei ei hil in.

⁶⁵ Topa aw, na thu om bangin na nasempa na limbawl hi.

⁶⁶ Na thupiehte um ka hi ziehin thu khentel siemna le thu theina ei hil in.

⁶⁷ Ei kigenthei bawl masangin kei lam ka piel a, ahi vangin tu-in nangma’ thu ka zui hi.

⁶⁸ Nang na hoi a, sil hoi na bawl hi. Na thukhamte kei ei hil in.

⁶⁹ Mi kiphasahte in kei zuouthu tawh ei mindaisah vua, hinanle ka lungsim zosie tawh na thuhilnate ka zui hi.

⁷⁰ A lungsim uh sathau bangin khalh a, ahi vangin keima in nangma’ thu nuom ka sa hi.

⁷¹ Na thukhamte ka sin thei nadingin ei kibawlsiet pen kei adingin hoi hi.

⁷² Na kam pana ang pusuoh na thukham khu kei adingin kham le ngun tul tampite sangin hoizaw hi.

⁷³ Nangma in khut tawh kei ei bawlin nei na zem hi; na thupiehte ka sin thei nadingin theitelna kei ei pie in.

⁷⁴ Na thu sungah lametna ka nei ziehin nangma ang zatahte in kei ei mu-in a lungdam ding uhi.

⁷⁵ Topa aw, na thukhennate man hi, ci-in ka thei a, tua na thumanna sungah nei gentheibawl hi.

⁷⁶ Na nasempa tunga na kamciem a om bangin nangma’ itna kip pen ka kihenepna hi taheh.

⁷⁷ Nangma’ thukham in ka nopsahna ahi ziehin, ka hin thei nadingin kei tungah na lungsietna hing tungsah in.

⁷⁸ Mi kiphasahte in solna tawh ei lebawl ahi ziehin, amate maizumsah in. Kei ka hi leh na thuhilnate ka lungngaingai ding hi.

⁷⁹ Na thukipte a thei nadingun nangma ang zahtahte kei lamah hing kiheisah in.

⁸⁰ Maizumna ka thuoh lo nadingin nangma’ thukhamte ah ka lungsim paubang loin om taheh.

⁸¹ Na hutdamna lunggulin ka hlagau a vulnang hi; keima in na thu sungah kinepna ka nei hi.

⁸² Na kamciemte ka etetna-in ka mitte a kham ta hi; keima in, “Bang hun ciengin ei henem ding na hei? ci-in ka dong hi.

⁸³ Bang ding ahei cile kei pen meikhu lahah a om savun-um ka bang a, hizongle na thukhamte ka mangngil tuon sih hi.

⁸⁴ Na nasempa in bang tanvei thuoh lai ding ahei? Keima ei bawlsiete bang hun ciengin thukhen ding na hei?

⁸⁵ Mi kiphasahte in ka kieh nading dum a to uhi; amate in na thukham a mang sih uhi.

⁸⁶ Nangma’ thupiehte zosie a tawntungin kip hi; a thu om loin kei ei kibawlsie hi; keima ei hu in!

⁸⁷ Amate in leitungah keima ei that zo dihtah uhi; ahi vangin keima in na thuhilnate ka taisan tuon vawt sih hi.

⁸⁸ Nangma’ kam pana na thukipte ka zui thei nadingin na itna kip sungah keima nei hinkhawi lai hi.

⁸⁹ Topa a om zing a, vantungah na thu kip tahin kikoi hi.

⁹⁰ Na muonhuoina khang tawntungin kip hi; nangma in leitung na phut a, tua khu kiptahin a ding hi.

⁹¹ Nangma’ sena bangin tuni dongin tuate a kip uhi, bangzieh ahei cile na zosie nangma’ nasem ahi uhi.

⁹² Na thukham nuom a sa lo hi leng, ka hamsat hunin ka kisie zo ding hi.

⁹³ Keima in na thuhilnate ka mangngil ngai sih ding hi. Bangzieh ahei cile tuate tawh kei hinna nei pie hi.

⁹⁴ Kei nangma-a’ ka hi hi; na thuhilnate ka sui ziehin, keima ei hundam in.

⁹⁵ Kei ei susie dingin migilote in ei buhdap uhi, ahi vangin keima in na thukipte ka ngaisun hi.

⁹⁶ Kicinna vannuoi in ciengtan a nei lam ka mu zo a, ahi vangin na thupiehte ahile nahpi tahin a zai hi.

⁹⁷ Aw, bangza tahin na thukham it ka hei! Sun tungtawn a ka lungngaingai khu tuami ahi hi.

⁹⁸ Na thupieh in ka galte zosie sangin a pilzaw-in ei bawl hi, Bang ding ahei cile tua khu keima tawh a omton zing hi.

⁹⁹ Keima in ka siete zosie sangin thutelna ka neizaw hi, azieh pen na thukipte khu ka lungngaingaite ahi hi.

¹⁰⁰ Khanghamte sangin thu ka telzaw hi, azieh pen na thuhilnate ka zui hi.

¹⁰¹ Na thu ka zui thei nadingin sietna lampi zosie panin ka keng ka nuatuh hi.

¹⁰² Nangma in ei hil zo na hi ziehin na ngaina kipte panin ka piel sih hi.

¹⁰³ Na thute a hlum ta mama a, ka kamah khuoizu sangin hlumzaw hi.

¹⁰⁴ Na thuhilnate tung panin theitelna ka nga hi; tua ahi ziehin keima in a man lo lampi zosie ka muda hi.

¹⁰⁵ Na thu in ka keng adingin meivah ahi a, ka lampi-ah khuovah ahi hi.

¹⁰⁶ A thuman na ngaina kipte zui dingin ka kiciem a, ka kipsah zo hi.

¹⁰⁷ Nahpi tahin gimna ka thuoh hi; Topa aw, na thu a om bangin keima hinna ei pie in.

¹⁰⁸ Topa aw, ka phatna biehnate ei sang inlen, na ngaina kipte ei hil in.

¹⁰⁹ Ka khut sungah ka hinna humin ka kem zing a, hizongle nangma’ thukham ka mangngil tuon sih hi.

¹¹⁰ Migilote in thang ei sie nan ule, na thuhilnate panin ka piel tuon sih hi.

¹¹¹ Nangma’ thukipte khu tawntung ka gouluo ding ahi a, tuate keima’ lungdamna ahi hi.

¹¹² Na thukhamte a tawp donga a zui zing dingin ka lungsim ka khensat hi.

¹¹³ Keima in a lungkaa mite ka muda a, ahi vangin na thukham ka it hi.

¹¹⁴ Nang pen ka kibuhna mun le ka kidalna lum na hi hi; na thu sungah lametna ka nei hi.

¹¹⁵ No, sietna a bawl mite aw, Pasien’ thupiehte ka zui thei nadingin keima kung panin peidawh ta un.

¹¹⁶ Keima ka hin thei nadingin na kamciem a omsa bangin ei panpi inlen, keima’ lametna-ah ei maizumsah sin.

¹¹⁷ Keima ka bih nading le na thukhamte ka thusim den nadingin keima ei tudet in.

¹¹⁸ Nangma in thukhamte panin a lampiel mite na hosie hi; bangzieh ahei cile amau’ khelpilnate a mawhna ahi hi.

¹¹⁹ Nang in leitunga migilote zosie sia-eh bangin na ngaisun hi; tua ahi ziehin keima in na thukipte ka it hi.

¹²⁰ Kang giin ziehin ka citun a, na thukhennate zong ka giing hi.

¹²¹ Thutang le thuman tawh ka gamta zo hi; kei ei bawlsiete kungah ei nuasie sin.

¹²² Na nasempa a nopsah nadingin nangma hing kikham inlen, Pasien thei lo mite in kei ei gawtsah sin.

¹²³ Nangma’ hutdamna le a man na kamciem ang tangtun ding ka etna-in ka mitte a gim ta hi.

¹²⁴ Nangma’ itna kip tawh kituohin na nasempa tungah ei bawl inlen, na thukhamte ei hil in.

¹²⁵ Keima na nasempa ka hi hi; na thukipte ka thei nadingin theitelna ei guon in.

¹²⁶ Topa aw, na thukham kipalsat zo ahi ziehin na sepkhiet hun ahi ta hi.

¹²⁷ A mantahin kham le kham citahte sangin nangma’ thupiehte ka itzaw hi.

¹²⁸ Na thuhilnate zosie tawh kituohin a mantahin ka kalsuon a, a man lo lampi popo ka muda hi.

¹²⁹ Na thukipte a lamdang hi; tua ahi ziehin ka hlagau in tuate a zui hi.

¹³⁰ Na thute telgenna in khuo a vahsah hi; thu thei lote tungah theitelna guon hi.

¹³¹ Na thupiehte ka lunggul ziehin ka kam kahin ka haisam hi.

¹³² Nangma’ min a itte tunga na bawl ngai bangin kei lamah hing kihei-in keima ei hepi in.

¹³³ Nei kamciemsa bangin ei kalsuonsah inlen, keima tungah khielna in thu hing vaihawmsah sin.

¹³⁴ Keima in nangma’ thuhilnate ka zui thei nadingin mihingte’ ei bawlsietna panin keima eitan dawh in.

¹³⁵ Na nasempa tungah na maipha hing tangsah inlen, na thukhamte ei hil in.

¹³⁶ Na thukham a kizui lo ziehin ka hlitui hawh luon bangin a luong hi.

¹³⁷ Topa aw, nang na dih a, na thukhennate a man hi.

¹³⁸ Na koisa na thukipte man a, a unpi-in muontah hi.

¹³⁹ Ka galte in na thute a mangngil tah ziehun ka deiluotna in kei ei katum hi.

¹⁴⁰ Na kamciem kicien mama a, na nasempa in a dei mama hi.

¹⁴¹ Kei ka neu a, ei kisimmaw hi, ahi vangin na thuhilnate ka mangngil sih hi.

¹⁴² Na thumanna khu tawntung thumanna ahi hi; na thukhamte zong thuman ahi hi.

¹⁴³ Buoina le lungkhamna keima tungah ang tung a, ahi vangin na thupiehte ahile keima’ lungkimna ahi hi.

¹⁴⁴ Na thukipte a tawntungin a man hi; keima ka hin thei nadingin theitelna ei pie in.

¹⁴⁵ Ka lungsim zosie tawh kang kiko hi; ei dawng in Topa aw! Na thukhamte ka zui ding hi.

¹⁴⁶ Nangma kungah kang kiko hi; na thukipte ka zui thei nadingin keima ei hun in.

¹⁴⁷ Phalvah masangin ka tho a, huna ngenin kang kiko hi; na thu ah ka lametna ka koi hi.

¹⁴⁸ Na kamciemte ka lungngai thei nadingin, zan vilte hun masangin ka mit a hahhah hi.

¹⁴⁹ Na itna kip sungah keima’ aw za inlen, nangma’ thutang sungah ka hinna ei kem in, Topa aw.

¹⁵⁰ Gitlona ngimna tawh kei ei bawlsiete in kei ei neh uhi; na thukham tawh amate a kigamla mama uhi.

¹⁵¹ Hinanle Topa aw, nangma na nai om a, na thupiehte zosie zong ahi tahtah vive ahi hi.

¹⁵² Tuate a tawntunga a kip dingin na phukip ahi lam, nangma’ thukipte panin sawtveipi-in ka thei hi.

¹⁵³ Na thukham ka mangngil lo ziehin keima ei hunkhie in.

¹⁵⁴ Ka thu ei panpi inlen, keima ei tankhie in. Nangma’ kamciem tawh kizui-in hinna ei pie in.

¹⁵⁵ Amate in na thukhamte a sui lo ziehun, migilote kung panin hutdamna a gamla om hi.

¹⁵⁶ Topa aw, na khuotuona lien hi; na thutanna tawh kituohin ka hinna kei nei pie hi.

¹⁵⁷ Keima ei bawlsie ka galte tampi om a, hinanle na thukipte panin kei ka piel tuon sih hi.

¹⁵⁸ Amate in na thupieh a zui lo ziehun, kidahna tawh Pasien nei lote ka en hi.

¹⁵⁹ Na thuhilnate bangza tahin dei ka hei ci ngaisun in. Nangma’ itna kip tawh kituohin nangma in ka hinna nei keppieh hi.

¹⁶⁰ Na thugente a unpi-in thuman ahi a, a man na ngaina kipte zosie a tawntungin kip peisuoh hi.

¹⁶¹ Uliente in a thu om lopi-in ei bawlsie uhi. Ahi vangin ka lungsim in na thute a giing hi.

¹⁶² Van kinuasie tampi nga pa bangin nangma’ thu sungah ka kipah hi.

¹⁶³ Zuouthu muda-in ka huo a, hinanle na thukhamte ka it hi.

¹⁶⁴ A dih na ngaina kipte ziehin ni khatin sagivei nangma kang phat hi.

¹⁶⁵ Nangma’ thukham a itte in lungnopna lienpi a nei uhi; amate bangma in a puasah zo sih ding hi.

¹⁶⁶ Topa aw, na hutdamna ka lamen a, na thupiehte ka sem hi.

¹⁶⁷ Ka hlagau in na thukipte a zui hi; keima in tuate ka nah it mama hi.

¹⁶⁸ Keima in na thuhilnate le na thupiehte ka zui hi, azieh pen ka lampi zosie na masangah a om hi.

¹⁶⁹ Topa aw, kang kikona na mai-ah hing tung hinlen, nangma’ thu omsa tawh kizui-in theitelna kei ei guon in.

¹⁷⁰ Keima’ ang thumna na mai-ah hing tung hinlen, na kamciem omsa tawh kizui-in kei ei hunkhie in.

¹⁷¹ Na thukhamte nei hil ziehin ka nephu pan phatna ka luongsah ding hi.

¹⁷² Na thupiehte zosie man ahi ziehin ka leii in na kamciemna la-in a sa ding hi.

¹⁷³ Na thuhilnate ka teel zo tah ziehin keima ei hu dingin na khutte kithawisa-in omsah in.

¹⁷⁴ Topa aw, na hutdamna ngahla-in ka om a, na thukhamte ka kipahna ahi hi.

¹⁷⁵ Nangma kang phat thei nadingin keima ei hingsah inlen, na ngaina kipte in kei ei husah in.

¹⁷⁶ Tuu mang bangin lam ka piel zo ta hi; na thupiehte ka mangngil lo ziehin na nasempa ei sui in.