Phatna-late 118 - Zo Bible

Guolzawna La

¹ Topa tungah lungdam ko un, azieh pen ama hoi hi; ama’ itna kip tawntung hi!

² Israel-te in, “Ama’ itna kip tawntung hi,” ci ta uheh.

³ Aaron innkuonte in, “Ama’ itna kip tawntung hi,” ci ta uheh.

⁴ Topa a zatah mite in, “Ama’ itna kip tawntung hi,” ci ta uheh.

⁵ Ka lungkhamna panin Topa ka hlan hi; Topa in ei dawngin, mun tanzau-ah ei koi hi.

⁶ Ka gei-ah Topa ang om a, kei ka zau sih hi. Mihingte in kei bang ei law zo ding ahei?

⁷ Keima ei panpi dingin kei lamah Topa a om hi; keima in ei muda mite guolzawna tawh ka en ding hi.

⁸ Mi i muon sangin Topa bel ding hoizaw hi.

⁹ Uliente i muon sangin Topa bel ding hoizaw hi.

¹⁰ Minam zosie in ei imtawm uhi; Topa’ min tawh amate ka vatmai hi!

¹¹ Amate in ei kimkot vua, ka kimvelah ei imtawm uhi; keima in Topa’ min tawh amate ka vatmai hi!

¹² Amate in khuoi bangin kei ei imtawm uhi; amate ahi uleh lingkung kuong bang uhi; keima in Topa’ min tawh amate ka vatmai hi.

¹³ Ka pua nadingin nahpitahin ei kisawn a, ahi vangin Topa in keima ei panpi hi.

¹⁴ Topa pen ka hatna le ka vanglietna ahi hi; ama pen keima ei kihutdamna a suoh hi.

¹⁵ Midihte’ puonbuh sungah guolzawna la kisa hi;

¹⁶ “Topa’ zietlam khut kilamto hi; Topa’ zietlam khut in hangtahin na sem hi,” kici hi.

¹⁷ Kei si loin ka hingzaw ding a, Topa’ nasepte ka gengen ding hi.

¹⁸ Topa in nasie tahin kei thu ei hil zo a, hinanle ama in sina cieng ei thuohsah sam lo hi.

¹⁹ Topa tungah lungdam ko-in ka lut thei nadingin, thumanna kotpite kei ei hon in.

²⁰ Tami Topa’ kotpi ahi hi; tua panin midihte a lut ding uhi.

²¹ Nangma in kei ei dawngin, ka hutdamna na hi ziehin nangma tungah ka lungdam hi.

²² Innlamte in a nuolsa suongpi pen innkiu suongpi a suoh zo hi.

²³ Tami Topa’ nasep ahi hi; tam pen eite’ mitah lamdang hi.

²⁴ Tuni pen Topa’ bawlsa ni ahi hi; tami ni-ah nuomin kipah va vui.

²⁵ Topa aw, kote ei hun in, nangma tungah kang thum uhi!

²⁶ Topa’ min tawh ang pei pa in thupha nga taheh. Kote in Topa’ inn panin thupha kang pie uhi.

²⁷ Topa pen Pasien ahi a, ama in eite khuovah ei pie zo hi. Singnate tawi-in maitam sakite dongah guol nuomin kizawt un.

²⁸ Nang ka Pasien na hi a, na tungah lungdam kang ko ding hi; nang ka Pasien na hi a, nangma kang phat ding hi.

²⁹ Topa tungah lungdam ko un, azieh pen ama hoi a, ama’ itna kip tawntung hi.