Phatna-late 103 - Zo Bible

Pasien’ Hoina Zieha Lungdamkona

David’ laphuo.

¹ Ka hlagau aw, Topa phat in, ka sunga om zosiete aw, ama’ min siengtho phat un.

² Ka hlagau aw, Topa phat inlen, ama’ zieha phattuomnate mangngil sin.

³ Ama in na khielna zosie maisahin, na natna zosie damsah a,

⁴ ama in Leihawm panin na hinna tankhie a, itna le khuotuona ang khusah hi.

⁵ Muvanlai bangin na khangno lai hun ang thasuo theikia nadingin, na khan sung tungtawnin hoina tawh nangma ang lungkimsah hi.

⁶ A kibawlsie mite adingin Topa in thumanin na a sem hi.

⁷ Ama in a lampite Moses tung le a sepnate Israel mite tungah theisah hi.

⁸ Topa pen mi khuotuo siem le mi hepi siem pa ahi a, lungthah bai loin, a kiningcing itna kip a nei pa ahi hi.

⁹ Ama in mi a mawsah den sih ding a, zong a lungthah den sih ding hi.

¹⁰ Eite’ mawna tawh kituohin ama in eite tungah ei bawl sih a, eite’ khielnate tawh kituohin ama in eite ei thuhkia lo hi.

¹¹ Azieh pen leitung panin vantungte a san ma bangin, ama a zatah mite tungah ama’ itna kip lien mama hi;

¹² nitumna panin nisuona a gamlat ma bangin, ama in i khielnate uh i kung panun gamlapi-ah a hem dawh hi.

¹³ Pa in tate a khuotuo bangin, Topa in ama a zatah mite a khuotuo hi.

¹⁴ A zieh pen ama in eite ei kipiensah dan a thei a, ama in eite leivui i hi lam uzong a phawh hi.

¹⁵ Mihingte adingin ahile a hinkhuo uh lopa bang ahi hi; amate pen gamlah pape tawh kibang ahi lel bo hi;

¹⁶ bang zieh ahei cile hui in ama semin mangthai a, khumi mun in ama a thei kha nawn sih hi.

¹⁷ Hizongle ama a zatahte tungah a tawntung pan a tawntung dongin Topa’ itna kip om ngitnget a, ama’ thumanna zong

¹⁸ a thuciemna a zuite le ama’ thupiehte zui ding a phawh mite tungah a tu a ta khang dongin a kip peisuoh hi.

¹⁹ Topa in vantung ah ama’ topha phut zo a, ama’ kumpi gam in mun vannuoi a uh hi.

²⁰ No, ama’ vantung mite aw, Topa phat un, ama’ sawlna bang a sem no a thahat mite aw, ama’ gensa thu mang un.

²¹ Ama’ dei lam a bawl, a nasemte, ama’ mihon zosie aw, Topa phat un.

²² Ama’ uhna mun zosie-a om ama’ bawlsa zosie aw, Topa phat un. Ka hlagau aw, Topa phat in.