Paikhiatna 7 - Zo Bible

¹ Topa in Moses kungah, “En in, keima in Pharaoh tungah Pasien bangin nang kang bawl zo a, na sanggampa Aaron pen na kamsangpa hi ding hi.

² Nang kang thupieh zosie na gen ding a, na sanggampa Aaron in ama’ leitang panin Israel-te a peisah nadingin Pharoah kungah a gen ding hi.

³ Ahi vangin Pharaoh’ lungtang ka khausah ding a, Egypt gamah ka limte le na lamdangte ka tamsah ding hi.

⁴ Pharaoh in na thu ang ngai lo ciengin keima in Egypt tungah ka khut ka nga ding a, thukhenna nasepna lienpite tawh ka mipi Israel-te a honhonin Egypt gam panin ka peipi ding hi.

⁵ Egypt-te lang khatah ka khut zahin amate sung panin keima in Israel-te ka peikhietpi ciengin Egypt-te in keima Topa ka hina ei thei ding uhi,” a ci hi.

⁶ Tua bangin Moses le Aaron-te in a bawl uhi; Topa’ thupieh bangin amate in a sem uhi.

⁷ Pharaoh tawh ama gel a kiho hunin Moses kum sawmgiet pha a, Aaron kum sawmgiet le kum thum pha hi.

A Lamdang Aaron’ Ciengkhut

⁸ Topa in Moses le Aaron kungah,

⁹ “Pharaoh in na kung vuah, ‘Na lamdang khat hing bawl un,’ ang ci ciengin nangma in Aaron kungah, ‘Na ciengkhut la inlen Pharaoh mai-ah sepsuh in, tua ciengkhut gul ang suoh ding hi,’ ci in,” a ci hi.

¹⁰ Tuaci’n Pharaoh kungah Moses le Aaron pei-in Topa thupieh bangin a bawl uhi; Aaron in Pharaoh le a uliente mai-ah a ciengkhut a sepsuh a, gul khat a suoh hi.

¹¹ Tua ciengin Pharaoh in mipilte le ai siemte hlan hi; Egypt mitphiel siemte in zong a siemna utawh tua bang lien ma-in a bawl thei uhi.

¹² A ciengkhut ciet uh a sepsuh vua, tuate gul vive a suoh hi; ahi vangin Aaron’ ciengkhut in amau-a’ a valtum hi.

¹³ Topa gensa bangin Pharaoh’ lungsim khauh lai a, ama in a thugen uh a ngai nuom sih hi.

Gimna Khatna: Tui Sisan Suoh

¹⁴ Tua ciengin Topa in Moses kungah, “Pharaoh’ lungtang khauh mama a, ama in mite peisah nuom lo hi.

¹⁵ Zingmawngin gunah Pharaoh a pei ciengin ama kungah pei in; ama tawh kimu dingin gun gei-ah ding inlen, gul a suoh ciengkhut pen ma na khut sungah tawi in.

¹⁶ Ama kungah, ‘Senel gamah keima ei bieh thei nadingun, “Ka mite peisah in, ci-in a gen dingin Hebrew-te’ Pasien, Topa in na kungah kei ei sawl hi,” ci-in gen in. Ahi vangin tu dongin ama’ thu na mang nai vaset sih hi.

¹⁷ Tua ahi ciengin Topa in, “Keima Topa ka hina tami tawh na thei ding hi,” ci hi. En in, ka khut sunga ciengkhut tawh Nile gun sunga tui ka sat ding a, tua tui sisan a suoh ding hi.

¹⁸ Gun sunga om ngate si-in, a gun mama uithan ding a, Egypt-te in Nile guntui a dawn thei sih ding uhi,’ ci in,” a ci hi.

¹⁹ Topa in Moses kungah, “Aaron kungah, ‘Na ciengkhut la inlen tuate sisan a suo thei nadingin Egypt tuite uh tung, a gunte uh tung, a tuilamte uh tung, a tui tawdawhte uh tung le a buol zosie uh tungah na khut zah in; tuale Egypt gamsung zosie-ah sisan om ding a, sing beel le suong beel sung teng nangawnah sisan om ding hi,’ ci-in,” a ci hi.

²⁰ Moses le Aaron in Topa’ thupieh bang ma-in a bawl uhi. Ama in Pharaoh le a uliente muna-ah tua ciengkhut vihto-in gun sunga om tua tui sat a, gun sunga tui zosie sisan a suoh hi.

²¹ Gun sunga ngate a si sieng hi. Tua guntui khu a ui ziehin Egypt-te in tui a dawn thei sih uhi. Egypt gam mun zosie-ah sisan a dim hi.

²² Hinanle mitphiel siem Egypt mite in a siemna utawh tua bang lien ma-in bawl thei uhi; tuaci’n Topa gensa bangin Pharaoh’ lungtang a khauh ngai bangin khauh a, a thu uh ngai lo hi.

²³ Pharaoh kihei-in a inn sungah lut a, a lungsim sung nangawnah tam thu ngaisutin a nei nawn sih hi.

²⁴ Amate in guntui a dawn thei lo ziehun Egypt-te zosie in Nile gun kimah dawn ding tui a to uhi.

²⁵ Topa in Nile gun a sat zaw ni sagi pha ta hi.