Paikhiatna 4 - Zo Bible

A Lamdang Moses’ Vanglietna

¹ Tua ciengin Moses in, “Ahi vangin amate in kei ei tahsang loin ahi sihle ka thu ei ngai sih hinlen, ‘Nangma kungah Topa hing kilaa sih,’ ei ci mawh uleh bang ka law ta diei?” ci-in a dawng hi.

² Topa in ama kungah, “Na khut sunga khu bang ahiei?” a ci hi. Ama in, “Ciengkhut,” a ci hi.

³ Tuale ama in, “Tua khu tuolah sep vawi,” a ci hi. Tuaci’n ama in tua ciengkhut tuolah a sep leh gul khat a suoh hi; tuale ama kung panin Moses a nuakin hi.

⁴ Tua ciengin Topa in Moses kungah, “Na khut zah inlen tua gul a mei-ah man in,” a ci hi. Tuaci’n a khut zahin gulpi a man le ama’ khut sungah ciengkhut khat a suoh hi.

⁵ “Tuaci’n amate in a tahsan thei nadingun nangma kungah Topa, a Pasien uh ahi Abraham’ Pasien, Isaac’ Pasien le Jacob’ Pasien ang kilangzo hi,” a ci hi.

⁶ Topa in ama kungah, “Na puontuol kawmah na khut koi in,” khatvei a cikia hi. Ama in a puontuol kawmah a khut a koi hi; ama in a khut a lah ciengin a khut phah gawp a, vua bangin a ngo hi.

⁷ Tua ciengin Pasien in, “Na puontuol kawmah na khut koikia vawi,” a ci hi. Tuaci’n ama in a puontuol kawmah a khut koikia-in a khut a lakia leh a tahsa ngai ma bangin a omkia hi.

⁸ “Amate in nang ang tahsan sih vua, ahi sihle lim masa pen a thudon sih phiel ule zong lim nukhia pen tahsang kha thei ding uhi.

⁹ Tami lim ni tegel nangawn tahsang loin ang thudon sih uleh Nile gun panin tui halkhat la-in lei gawta lahah na sung ding hi; tuale Nile gun pana na lah ding tui pen lei gawta tungah sisan a suoh ding hi,” a ci hi.

¹⁰ Ahi vangin Moses in Topa kungah, “Ka Topa aw, tu masie ahi a, na sila pa nei hopi tu mama nangawnin ahi zongin kei mi dangnal ka hi ngai vawt sih hi; a muon ham vahuot le a lei awhpi ka hi bo hi,” a ci hi.

¹¹ Tua ciengin Topa in ama kungah, “Mihingte kam koi pieh ahiei? Koi in amate hamsah thei lo, ahi sihle bil bingsah, khuo musah, ahi sihle mit tawsah ahei? Topa, ahi keima’ bawl hi lo amah?

¹² Tu-in kuon inlen na kam tawh kang om ding a, na thugen ding kang hil ding hi,” a ci hi.

¹³ Hinanle ama in, “Ka Topa aw, hing thum ing, midang khat sawl zaw in,” a ci hi.

¹⁴ Tua ciengin Moses tungah Topa a sin so a, ama in, “Levi mi na sanggampa Aaron om hi lo amah? Ama in hoitahin thu a gen thei lam ka thei hi; tu nangawnin nang ang dawn dingin ama ang pei a, nangma ang mu ciengin a lung a nuom ding hi.

¹⁵ Nang in ama hopi-in a kam sungah thu na muom ding hi; nangma’ kam le ama’ kam tawh keima kang om ding a, na sep na bawl ding uh kang hil ding hi.

¹⁶ Ama in mite tungah nang adingin thu a gen ding hi; ama pen nang adingin na kamin ang pang ding a, nang zong ama adingin a Pasien bangin na pang ding hi.

¹⁷ Na khut sungah tami ciengkhut tawi inlen, tua tawh limte na bawl ding hi,” a ci hi.

Egypt-ah Moses Kilekia

¹⁸ A sungpa Jethro kungah Moses peikia-in a kungah, “Hing thum ing, Egypt gama ka unaute a hing lai uh amah, a en dingin amate kungah ei hawsah in,” a ci hi. Tuale Jethro in Moses kungah, “Lungnuom tahin pei in,” a ci hi.

¹⁹ Midian gam sungah Topa in Moses kungah, “Egypt gamah peikia in; azieh pen nangma ang tha sawm mi zosie si sieng zo hi,” a ci hi.

²⁰ Tuaci’n Moses in a zi le a tapate a la a, laa tung khatah amate tuongsahin Egypt gamah a peikia uhi; tuale Moses in a khut sungah Pasien’ ciengkhut a tawi hi.

²¹ Topa in Moses kungah, “Egypt gamah na peikia ciengin Pharaoh mai-ah na sep thei dinga kang piehsa na lamdang zosie na bawl ding thei gige in; ahi vangin keima in a lungtang ka khausah ding a, tuaci’n mite a peisah sih ding hi.

²² Tua ciengin nangma in Pharaoh kungah, ‘Topa in tam bangin ci hi: Israel ka tapa a tapen ahi hi.

²³ Keima nang kungah, “Ama in kei ei bieh thei nadingin ka tapa peisah in,” kang ci hi. Ahi vangin nang in ama a pei ding na phal sih hi; tu-in keima in na tapa a tapen pa ka that ding hi,’ vaci ta’n,” a ci hi.

²⁴ Lamkal mun khatah amate a zan gie vua, Topa in Moses na dawnin ama tha ding a na hanciem hi.

²⁵ Ahi vangin Zipporah in suonghiem khat la-in a tapa’ tep tanpieh a, tua tawh Moses’ keng thamin, “A mantahin nang pen kei tungah sisan tawh ka mopa na hi hi!” a ci hi.

²⁶ Tuaci’n ama guohin a omsah hi. Tua ciengin ama in, “Teptanna hangin sisan tawh ka mopa na hi hi,” a ci hi.

²⁷ Topa in Aaron kungah, “Moses dawn dingin gamlahah pei in,” a ci hi. Tuaci’n ama a pei hi; tuale ama in Pasien’ muolah ama mu-in a nam hi.

²⁸ Topa in ama a sawlna thu zosie le a bawl dinga a sawl limte zosie Moses in Aaron kungah a gen hi.

²⁹ Tua ciengin Moses le Aaron pei-in Israel upate a unpi-in a kaikhawm uhi.

³⁰ Aaron in Moses kungah Topa gensa thu zosie a unpi-in a gen a, mite muna-ah limte a bawl hi.

³¹ Mite in a um uhi; Topa in Israel-te a thudon lam za-in, a gentheina uh a mu lam a thei ciengun amate kunin Pasien a bie uhi.