Paikhiatna 38 - Zo Bible

Meihal Biehna Ding Maitam Bawlna

¹ Ama in adung tong nga, avai tong nga a pha maitam khat gising tawh a bawl hi; tua pen a ning li kikim hi a, a sanna tong tong thum pha hi.

² Tua maitam’ ning lite tungah a kite bawl hi; a kite maitam tawh kicimat a, sumngo tawh tuate zut hi.

³ Ama in vut khol nading beelte, kawbiate, kuongte, siakate, le vutluona pehte bawl a, maitam vanzahte zosie sumngo tawh bawl hi;

⁴ Maitam adingin a zawl nei-ah maitam kimcieng a bansuh, len banga kiphan, sumngo sia-len khat a bawl hi.

⁵ Ama in a zawlte tu dingin sumngo sialen ninglite tungah a kuol li a sung hi;

⁶ ama in maitam adingin gising zawlte bawlin tuate sumngo tawh a zut hi.

⁷ A puoh nadingin maitam pangte-a om a kuolte sungah a zawlte heng hi; ama in singpehte tawh maitam a lai hawmsah hi.

⁸ Ama in kikhopna puonbuh tunkotah na sem numeite’ hlimlangte panin sumngo tawh kisilna kuong le a tunna a bawl hi.

Biehbuh Tuol Bawlna

⁹ Ama in buhtuol a bawl a, leitaw lampang buhtuol puon kikhaite pen a kop-a kihiaton vau hoite tawh a kigan puon tawh kibawl a, tong zakhat a sau hi;

¹⁰ a khuompi sawm ni le a tunna sawmni te pen sumngo tawh kibawl a, ahi vangin khuompi tunga vankhainate le a ganate pen ngun ahi hi.

¹¹ Leilu lampang a kikhaisuh dalna puon tong zakhat pha hi; a khuompi sawmni le a tunna sawmni te sumngo tawh kibawl ahi hi, ahi vangin khuompi tunga vankhainate le a ganate ngun ahi hi.

¹² Nitumna lampang a kikhaisuh dalna puon tong sawmnga hi a, khuompi sawm hi-in, a tunna sawm ma ahi hi; khuompi-a vankhainate le a ganate ngun ahi hi.

¹³ A mailam, nisuona lam manaw zong tong sawmnga ma ahi hi.

¹⁴ Kotpi pang khat a kikhaisuh dalna puon tong sawm le nga ahi a, khuompi thum le a tunna thumte tawh ahi hi.

¹⁵ A pang langkhat ading zong tu bang ma ahi hi; buhtuol lutna kotkhah a pang langkhat cietah a kikhaisuh dalna puon pen tong sawm le nga hi a, khuompi thum le a tunna thum tawh ahi hi.

¹⁶ Buhtuol kimvela puon kikhaisuhte zosie pen a kop-a kihiaton vau hoite tawh a kigan puonte ahi hi.

¹⁷ Khuompi adingin a tunna sumngo hi a, ahi vangin a vankhainate le a ganate ngun ahi hi. Khuom luzum tuomnate’ kizutna khu ngun ahi a, buhtuol khuompi zosie ngun gaana tawh kigah hi.

¹⁸ Buhtuol lutna puonkhai pen a dum, a dupsan, a ausan, a kop-a kihiaton vau hoite tawh a kigan puonte ahi a, hieu tawh kikhui-in kizem hi. Buhtuol-a kikhaisuhte tawh kizui-in tong sawmni sau-in, a vailam tong nga sau hi.

¹⁹ Khuompi li le a tunna lite sumngo tawh kibawl a, a vankhainate ngun hi-in, khuom luzum tuomnate le a gaanate’ kizutna khu ngun ma ahi hi.

²⁰ Biehbuh le buhtuol kimvel adingin khetphim zosie sumngo tawh kibawl ahi hi.

Biehbuh Vanzahte

²¹ Tam teng pen siempu Aaron’ tapa Ithamar makaina nei-ah Levi-te’ sep ding biehbuh ahi thuciemna biehbuh ciemtena sazien ahi hi.

²² Topa in Moses a thupieh zosie Judah minam Hur’ tapa, Uri’ tapa Bezalel in a sem hi.

²³ Ama tawh a semton pen Dan minam, Ahisamach’ tapa Oholiab kici pa ahi a, ama pen suongkhuoh a siem, a etlawm sil suhtuo siem, a dum, a dupsan, a ausan vaute le hoitaha kigan puon hoite a zep siem mi khat ahi hi.

²⁴ Nasep nadinga kizang kham zosie, biehbuh lamna-a kizang, le a kipie khamte, biehinn shekel-in talent sawmni le kuo le shekel za sagi sawmthum pha hi.

²⁵ Mi simna sunga kihal mihonte kung panin a kinga ngunte, biehna shekel-in talent zakhat le shekel tulkhat za sagi sawm sagi le nga a hi hi.

²⁶ Mi khat in beka khat ta (biehinn shekel-in shekel lang) pie a, a pie mi, kum sawmni panin a tungsie mi simna-a kisim poma tul zaguh le tulthum le zanga le sawmnga pha hi.

²⁷ Ngun talent zakhat pen biehbuh khuom tunnate le dalna puon khuom tunnate dinga kisung ding ahi hi. A tunna zakhat ading talent zakhat ahi a, a tunna khat ciengin talent khat ahi hi.

²⁸ Shekel tulkhat zasagi sawmsagi le nga lah panin khuompite tungah vankhaina-in bawl a, a khuom luzum tuomnate zutin tuate adingin a gaana a bawl hi.

²⁹ A kipie sumngo pen talent sawmsagi le shekel tulni le zali ahi hi;

³⁰ tua tawh ama in kikhopna puonbuh lutna tunkotte adingin khuom tunnate, sumngo maitam, sumngo sialen le maitam vanzah zosie,

³¹ buhtuol kimvela khuom tunnate, buhtuol lutna tunkot’ khuom tunna te, biehbuh’ khetphim zosie le buhtuol kimvela khetphim zosie a bawl hi.