Paikhiatna 37 - Zo Bible

Thuciemna Singkuong Bawlna

¹ Bezalel in gising tawh singkuong bawl hi; tua pen adung tong ni le khap, avai tong khat le khap, a sanna tong khat le khap ahi hi.

² Ama in kham citah tawh tua singkuong, a sung a puo zutin a kimvelah kham geihuol a bawl hi.

³ Ama in a ning lite adingin kham kuol li, a pang khatah kuol ni, a pang langkhat adingin kuol ni ma a bul hi.

⁴ Ama in gising singzawlte zong sui a, kham tawh tuate a zut hi.

⁵ Singkuong puoh nadingin singkuong panga a kuolte sungah a zawlte siet hi.

⁶ Ama in kham citah tawh hepina topha khat bawl hi; adung tong ni le khap, avai tong khat le khap ahi hi.

⁷ Ama in sehta tawh kikheng kham tawh Cherub ni bawl hi; hepina topha mong tuohah tuate gel a bawl hi.

⁸ Cherub khat mong khatah, Cherub khat a mong langkhatah om hi; a mong nite-ah hepina topha tawh sakhatin cherub-te a bawl hi.

⁹ Cherub-te in a hlate a tunglamah a zahto vua, a hlate utawh hepina topha liesuhin ama gel khatlekhat a kimaingat hi; cherub-te’ mai pen hepina topha lam kinga hi.

Ompina Anlum Sabuoi Bawlna

¹⁰ Ama in gising tawh sabuoi zong bawl a, adung tong ni, avai tong khat, a sanna tong khat le khap ahi hi.

¹¹ Kham citah tawh tua sabuoi zut a, a kimvelah kham tawh a geihuol khat a bawl hi.

¹² Ama in sabuoi kimvelah a vailam khutpeh cie a pha a zawlpeh khat bawl a, tua zawlpeh kimvelah kham geihuol khat a bawl hi.

¹³ Tua sabuoi adingin kham kuol li bawlin a ning li, a keng lite-ah a kuolte a gah hi.

¹⁴ Sabuoi zawn nading zawltangte a tu dingin a zawlpeh gei-ah a kuolte om hi.

¹⁵ Sabuoi zawn nadingin gising singzawlte bawl a, kham tawh tuate zut hi.

¹⁶ Ama in gimnamtui adingin sabuoi tunga vanzah ding kuongdaite, pakante, le dawnthei biehna sun nading kuongkumte, le thawlte kham citah tawh a bawl hi.

Meivah Tunna Bawlna

¹⁷ Ama in kham citah tawh meivah tunna khat zong a bawl hi. Meivah khuombul le a kungte sehta tawh kikheng ahi hi; a haite, a nunte le a papete tua meivah tunna tawh a kisamat ahi hi.

¹⁸ Tuale a pangte panin ba guh mengsawn a, pang khatah meivah tunna ba thum mengin, a pang lang khatah meivah tunna ba thum ma a meng hi;

¹⁹ ba khat ciet tungah a nun le a pape a om, almond ga tawh a kibang hai thum, le adang ba khat ciet tungah a nun le a pape a om, almond ga tawh a kibang hai thum ma kibawl hi. Tuaci’n ba guhte meivah tunna panin a mengsawn hi.

²⁰ A meivah tunna tung mama-ah a nunte le a papete tawh a om, almond ga tawh a kibang hai li om a,

²¹ meivah tunna panin ba guh a kopte’ bulah tua tawh sa khat ahi a nun khat om hi.

²² A nunte le a bate kisamat a, a unpi-in sehta tawh kikhengsa kham citah ahi hi.

²³ Meivah sagite le a taitete le a kuongte kham citah tawh kibawl ahi hi.

²⁴ Ama in meivah tunna le vanzahte zosie kham citah talent khat tawh a bawl hi.

Gimnamtui Maitam Bawlna

²⁵ Ama in gising tawh adung tong khat, avai tong khat a pha gimnamtui maitam bawl hi; tua maitam in a kikim ning li nei a, a sanna tong ni pha hi; a kite pen tua maitam tawh kisamat ahi hi.

²⁶ Ama in a tungzang, a kimvelah a pangte le a kite kham citah tawh a zut hi; tuale a kimvelah kham geihuol khat

²⁷ le a zawn nading ciengzawlte a tu dingin a pang tuoh a geihuol nei-ah kham kuol ni a bawl hi.

²⁸ Ama in gising tawh ciengzawlte sui-a, kham tawh tuate a zut hi.

Nu Sathau le Gimnamtui Bawlna

²⁹ Ama in gimnamtui bawlte’ bawl ma bangin nu sathau siengtho le a siengtho a namtui ahi gimnamtui zong a bawl hi.