Paikhiatna 26 - Zo Bible

Biehbuh

¹ Tua tham loin a kop-a kihiaton vau hoi tawh a kigan a dum, a dupsan le a ausan dalna puon sawm le a dum, a dupsan le a ausan khaute tawh biehbuh na bawl ding hi; khutsiemte in a bawl cherub-te tawh tuate na bawl ding hi.

² Dalna puon pen adung tong sawmni le giet ciet hi ding a, avai tong li ciet hi ding hi; dalna puon zosie a unpi-in kikim ciet ding hi.

³ Dalna puon ngate khatlekhat kikhuituo ding hi; adang dalna puon ngate zong khatlekhat kikhuituo ding hi.

⁴ A kikhuituo a masa dalna puon a geita pen’ puonmong gei guolah vaudum tawh a bilvangte na bawl ding hi; tua bang ma-in a kikhuituo a nina dalna puon a geita pen’ puonmong gei guolah a bilvangte na bawl ding hi.

⁵ Dalna puon khat tungah bilvang sawmnga bawlin, a kikhuituo a nina dalna puon mongah bilvang sawmnga ma na bawl ding hi; a bilvangte khatlekhat kimaingat ding hi.

⁶ Biehbuh buppikhat a suo thei nadingin kham kilna sawmnga bawlin, tua kilnate tawh dalna puonte khatlekhat na kimatsah ding hi.

⁷ Biehbuh tunga om puonbuh a tung khu nadingin kelmul tawh a kigan dalna puonte zong na bawl ding hi; dalna puon sawm le khat na bawl ding hi.

⁸ Tua dalna puon adung tong sawm thum ciet hi ding a, avai tong li ciet hi ding hi; tua dalna puon sawm le khatte kikim ciet ding hi.

⁹ Dalna puon ngate ama le ama na kikhuituosah ding a, dalna puon guhte zong khuituo-in a guhna puon pen puonbuh mai-ah na hlip ding hi.

¹⁰ A kikhuituo dalna puon a geita pen’ mongah bilvang sawmnga na bawl ding a, a kikhuituo a nina dalna puon geita pen mongah bilvang sawmnga ma na bawl ding hi.

¹¹ Puonbuh buppikhat a suo thei nadingin sumngo kilna sawmnga na bawl ding a, a bilvangte sungah a kilna teng hengin puonbuh na kimatsah ding hi.

¹² Puonbuh puon dalna puon a valkhie, puon alang val pen biehbuh nua lamah kaisuh ding hi.

¹³ Puonbuh puon adung lam, pang khatah tong khat le alang, a pang lang khatah tong khat le alang val pen biehbuh tungkhu dingin tam lampang le khum lampangte-ah kaisuh ding hi.

¹⁴ A sana kibum tuutang’ vun le kelvun hoite tawh puonbuh khuna na bawl ding hi.

Khuompehte

¹⁵ Biehbuh adingin a poto ding gising khuompehte na sui ding hi.

¹⁶ Khuompeh khat adung tong sawm hi ding a, avai tong khat le khap ta hi ding hi.

¹⁷ Khuompehte a kibulton thei nadingin khuompeh khatah a zang ni ta om ding hi; biehbuh khuompeh zosie adingin tamte na bawl ding hi.

¹⁸ Biehbuh’ khuompehte tam bangin na sui ding hi: Leitaw lampang adingin khuompeh sawmni na sui ding hi;

¹⁹ khuompeh sawmnite zungah ngun tawh kibawl a tunna sawm li na bawl ding a, a zang nite adingin a masa khuompeh zungah a tunna ni, le a bana khuompeh khat zungah a zang nite adingin a tunna ni ma hi ding hi;

²⁰ biehbuh a pang nina lam, leilu lampanga a om khuompeh sawmnite le

²¹ ngun tawh a kibawl a tunna sawmli adingin khuompeh khatah a tunna ni, adang khuompeh khat bulah a tunna ni ma hi ding hi;

²² nitumna lam kinga biehbuh nualam adingin khuompeh guh na sui ding hi.

²³ Biehbuh nualam a ningte adingin khuompeh ni na sui ding hi;

²⁴ tuate pen a nei lamah kikah ding a, hizongle a kuol masa-ah a dawn kimat ding hi; a ni tuohin tua bang hi ding a, tua tegel in a ning ni piengsah ding hi.

²⁵ Ngun tawh a kibawl a tunna sawm le guh adingin khuompeh giet hi ding hi; khuompeh khatah a tunna ni ta om ding hi.

²⁶ Gising kotgolte na sui ding a, biehbuh pang khat a khuompeh adingin kotgol nga,

²⁷ le biehbuh pang lang khat khuompehte adingin kotgol nga, nitumna lam kinga biehbuh sialam panga khuompehte adingin kotgol nga hi ding hi.

²⁸ Kotgol a laita khuompeh laikim dong a banto pen mong khat panin mong khat dongin pei suoh ding hi.

²⁹ Khuompehte kham tawh na zut ding a, kotgolte a tu dingin a kuolte kham tawh na bawl ding hi; kotgolte kham tawh na zut ding hi.

³⁰ Tua ciengin muol tunga ang kilahsa gelna bangbangin biehbuh na lam ding hi.

Dalna Puon

³¹ A dum, a dupsan, a ausan, le a kop-a kihiaton vau hoi tawh a kigan dalna puon khat na bawl ding hi; tua puonte pen cherub-te tawh khutsiem taha kigan hi ding hi.

³² Ngun tawh a kibawl a tunna lite tunga a om, kham vankhaina nei, kham tawh kizut gising khuompi lite tungah tuate na khai ding hi.

³³ A kilnate-ah dalna puon khaisuhin, dalna puon sung tua munah thuciemna singkuong na koi ding hi; dalna puon in note dingin a siengtho pen mun le a siengtho mun khen ding hi.

³⁴ Hepina topha pen a siengtho pen mun, thuciemna singkuong tungah na koi ding hi.

³⁵ Dalna puon pulamah sabuoi na koi ding a, sabuoi tawh a kimaingat biehbuh leitaw lam pangah meivah khuom na koi ding hi; leilu lampangah sabuoi na koi ding hi.

³⁶ Puonbuh kotkha dalna puonkhai dingin a dum, a sandup, a ausan, le a kop-a kihiaton vau hoi tawh a kigan, hieu tawh kikhui-in hoi taha kizem khat na bawl ding hi.

³⁷ Kotkhah puonkhai adingin gising khuompi nga bawlin kham tawh na zut ding hi; a vankhainate pen kham hi-in, tuate adingin sumngo tawh a kibawl a tunna nga na bawl ding hi.