Paikhiatna 2 - Zo Bible

Moses’ Suona le A Khangno Hun

¹ Tu-in Levi’ suonte khat pei-in Levi numei khat zi-in a la hi.

² Tua numei gai-in tapa khat a nei hi; ama in a deihuoi nausenno khat ahi hi, ci-a a mu ciengin tua nausen hla thum sung a phuol hi.

³ Ama in nausen a phuol zawh nawn lo ciengin pumpeng tawh kiphan law khat bawlin suong meihol nai le singnai tawh a zut hi; tua nu in law sungah nausen sielin gun gei-a pumpeng nawng lahah a koi hi.

⁴ Ama bang ang kilaw ei ci a thei nadingin a gamla mun khatah a sanggamnu a ding hi.

⁵ A kisil dingin Pharaoh’ tanu gunah a peisuh a, a nasemte gun gei-ah a vah uhi. Pharaoh’ tanu in pumpeng lahah law khat mu a, tua law a la dingin a nasem nu khat a sawl hi.

⁶ Ama in tua law a hon ciengin nausen mu hi. Tua nausen a kap hi. Ama in nausen a khuotuo a, “Tam pen Hebrew tate lahah khat hi ding hi,” a ci hi.

⁷ Tua ciengin a sanggamnu in Pharaoh’ tanu kungah, “ Kei va pei-in Hebrew numeite lahah naucing ding mi khat kang suipieh diei mah?” a ci hi.

⁸ Pharaoh’ tanu in ama kungah, “Hoi hi, va sui ta’n,” a ci hi. Tuaci’n ama kuonin a nausen’ nu hlan hi.

⁹ Pharaoh’ tanu in ama kungah, “Tami nausen la inlen kei adingin ei keppieh in, na thaman kang pie ding hi,” a ci hi. Tuaci’n tua numei in nausen la-in a kem hi.

¹⁰ Tua nausen a gol ciengin ama in Pharaoh’ tanu kungah a peipi a, tuaci’n ama’ ta dingin a la hi. Ama in tua nausen’ min Moses hisah hi. Azieh pen ama in, “Tui sung panin ama ka kaikhie hi,” a ci hi.

Midian ah Moses Tai

¹¹ Ni khat, Moses a gol zaw ciengin a mite kungah pei-in a thona-aana a septe uh a mu hi. Egypt mi khat in a sanggam Hebrew mi khat a sat ama in mu hi.

¹² Ama khuodah kawikawi a, mi koima mu lo ahi ziehin tua Egypt mipa thatin senel lahah a phuol hi.

¹³ A zing ni-a ang peikia ciengin ama in a kihau Hebrew mi ni a mu hi; a khielpa kungah, “Bang dinga na guolpa na vuoh ahiei?” a ci hi.

¹⁴ Ama in dawng a, “Ko tungah vaihawm thukhen dingin nang koi pen’ ang se ahiei? Egypt mipa na tha bangin kei ei tha sawm na hi amah?” a ci hi. Tua bepin Moses in, “Ka silbawl ei kithei hi ta,” ci-in ngaisunin a zau hi.

¹⁵ Pharaoh in tua thu a zah ciengin Moses tha dingin a sui hi. Ahi vangin Pharaoh kung panin Moses a taimang hi. Midian gamah tengin tuikhuh gei khatah a to hi.

¹⁶ Midian siempu pa in tanu sagi nei hi. Tui tawi dingin a pei vua, a pa uh’ ganhingte dawn dingin a tui-um te a dim uhi.

¹⁷ Ahi vangin tuucing pawlkhat pei-in amate a notmang uhi. Moses ding to-in amate a hu a, a tuuhonte uh tui a piehpieh hi.

¹⁸ A pa Reuel kungah a tun ciengun, “A bangci-a tuni-a hing hici tun bai na hi vuoi?” a ci hi.

¹⁹ Amate in, “Egypt mipa khat in tuucingte khut sung panin ei hunkhie a, ko adingin tui nangawn ei tawipiehin tuuhonte zongtui ei piehpieh hi,” a ci uhi.

²⁰ Ama in a tanute kungah, “Ama hei sungah a om ei? Bang dinga tua mipa nang nuasie uh ahiei? An nehpi dingin va hlan ta un,” ci-in a sawl hi.

²¹ Tua mipa tawh opton ding Moses thukim a, tua pa in a tanu Zipporah tawh Moses a kinungsah hi.

²² Tua nu in tapa khat nei a, a min Gershom a phuo hi. Azieh pen ama in, “Kei gamdanga teng pemta ka hi ta hi,” a ci hi.

²³ Hun sawtpi zaw ciengin Egypt kumpipa a si hi. A saltanna ziehun Israel-te kapin mau-in kiko uhi. A saltanna panun huna ngenin a kikona uh Pasien kung a tung hi.

²⁴ Pasien in a tauna uh za a, Abraham, Isaac, le Jacob tawh a thuciemna a phawh hi.

²⁵ Pasien in Israel-te a en a, tuale Pasien in amate a phawh hi.