Paikhiatna 17 - Zo Bible

Suongpi panin Tui

¹ Topa’ thupiehsa bangin Israel mi buppi Sin senel gam panin Israel mi buppi a banbanin khuol a zin uhi. Amate in Rephidim-ah giephuol a sat uhi, ahi vangin khum munah mite dawn ding tui om lo hi.

² Moses tawh mite a kihau vua, “Ka dawn ding uh tui ei pie’n,” a ci uhi. Moses in a kung vuah, “Bang dinga kei nei phin uh ahei? Bang dinga Topa na zelah uh ahei?” a ci hi.

³ Ahi vangin khum munah tui du-in mite a dangta uhi; tuale Moses tungah mite phunin, “Bang dinga dangta-a si dingin Egypt panin kote, ka tate ule ka ganhingte uh ei peitopi na hei,” a ci uhi.

⁴ Tuaci’n Topa tungah Moses kiko a, “Tam mite bang ka law ta diei? Suong tawh ei seplia dinga kisa ahi ta uhi,” a ci hi.

⁵ Topa in Moses kungah, “Israel upate pawlkhat zawpi inlen mite mai-ah pei in; na khut sungah Nile gun na satna ciengkhut tawi inlen pei in,” a ci hi.

⁶ Horeb-a suongpi tung na mai-ah keima ka na ding ding hi. Tua suongpi sat lacin mite dawn thei dingin tua suongpi panin tui ang phul ding hi. Israel upate muna-ah tua bang ma-in Moses a gamta hi.

⁷ Ama in khum mun pen Massah le Meribah ci-in a min phuo hi, bang ding ahei cile Israel-te in, “Eite’ lahah Topa a om amah, a om sih ahei,” ci-in a kihau vua, amate in Topa a zelah uhi.

Amalek-te in Israel Simin Lel.

⁸ Tua ciengin Amalek-te kuonin Rephidim-ah Israel-te tawh a kido uhi.

⁹ Moses in Joshua kungah, “Eite dingin mi pawlkhat teelin Amalek-te do dingin kuon in. Keima in zing ciengin ka khut sungah Pasien’ ciengkhut tawi-in muol dawnah ka ding ding hi,” a ci hi.

¹⁰ Tuaci’n Moses’ gensa ma bangin Joshua gamta a, muoldawn ah Moses, Aaron, le Hur-te a kato laitahun Amalek-te tawh a kido uhi.

¹¹ Moses in a khut a sangkhai laisie Israel-te in a zo vua, a khut a niemkhieh ciengin Amalek-te in a zo uhi.

¹² Ahi vangin Moses a khut a kham hi. Tuaci’n amate in suongtum khat la-in ama’ nei-ah a koi vua, tua suong tungah Moses a tosah uhi. Aaron le Hur-te, khat langkhatah, a khat a lang khatah pangin a khut gel a dom uhi; tuaci’n nitum cieng dongin a khut gel kipden hi.

¹³ Joshua in Amalek le ama’ mite namsau tawh a zo gawp hi.

¹⁴ Tua ciengin Topa in Moses kung ah, “Ciemtena ahi dingin laibu sungah tami thu giel inlen, Joshua’ zahin tua thu sim in: Keima in vansin nei panin Amalek-te kiphawna ka phietmai ding hi,” a ci hi.

¹⁵ Moses in maitam khat lam a, tua khu Topa in keima’ zawna diel ahi hi, ci-in a min phuo hi.

¹⁶ Ama in, “Topa’ zawna diel tunga khut! Topa in a khang khangin Amalek-te a do ding hi,” a ci hi.