Paikhiatna 16 - Zo Bible

Vantung Pan Anlum

¹ Elim panin Israel mihon vannuoi vai a ding uhi; tuale Egypt gam pan a dinkhiet zaw uh a hla nina ni sawm le ni nga ni-in Elim le Sinai kikala om Sin senel gamah Israel-te a tung uhi.

² Senel gamah Israel mihon vannuoi in Moses le Aaron a phunsan uhi.

³ Israel-te in ama gel kungah, “Sabel phungah to-in khamtahin an ka neh lai-un Topa’ khutlumin Egypt leitangah na kisi tazaw uleng izaw; bang ding ahei cile a kikhawm tami mihon buppi kielsisah dinga tami senel gama nei peipi gel ahi hi,” a ci uhi.

⁴ Tua ciengin Topa in Moses kungah, “Note dingin vantung panin anlum guo bangin ka zusah ding a, mite pei-in khumi ni-a a khamkhop ding uh anlum nisielin a luoh ding uhi. Tua bang danin amate in ka thuhil a zui uleh a zui lo uh ka zelah ding hi.

⁵ Tua anlum luoh dinga a kisah ciengun a ni guh ni-in nidanga a luo za uh a zani a luoh ding uhi,” a ci hi.

⁶ Tuaci’n Moses le Aaron in Israel-te zosie kungah, “Nitah ciengin Topa pen Egypt gam pana note ang peipi pa ahi lam na thei ding uhi.

⁷ Topa tunga na phunna uh ama in za zo ahi ziehin zingmawng ciengin Topa’ vanglietna na mu ding uhi. Azieh pen ka tung vua na phunphun uh, ko bang hi mawh ka hi uh ahei?” a ci uhi.

⁸ Moses in, “A tunga na phunphun uh Topa in za zo ahi ziehin Topa in na tung vuah nitah cienga na neh dinguh sa, le zingmawng cienga khamtaha na neh ding uh an ang pieh ciengin kote bang ka hi uh ahei? Na phunphun uh pen kote tunga phun na hi sih vua, Topa tunga phun na hi uhi,” a ci hi.

⁹ Tua ciengin Moses in Aaron kungah, “Israel mihon vannuoi tungah, ‘Ama in na phunna uh za zo a hi ziehin a nai-ah hing neh un,’ ci-in,” a ci hi.

¹⁰ Aaron in Israel mihonte a hopi laitahin gamlah a en vua, amate in mei lahah Topa’ vanglietna a kilang hi.

¹¹ Topa in Moses kungah,

¹² “Israel-te’ phunna ka za zo hi. Amate kungah, ‘Khuomut ciengin sa na ne ding vua, zingmawng ciengin khamtahin an na ne ding uhi; tua ciengin keima Topa na Pasien uh ka hi lam nei thei ding uhi,’ ci-in,” a ci hi.

¹³ Nitah ciengin vamimte lengin giephuol khucip hi; zingmawngin giephuol kimah daicim a daldalin kie hi.

¹⁴ Daicim a kap ciengin senel gam lei maitang tungah a pa dihdeh a phal phala a om, vuakhal tawh a kibang na hoi khat a om hi.

¹⁵ Israel-te in a mu ciengun khatlekhat in, “Tam bang ahiei?” a kici uhi. Azieh pen amate in tua khu bang ahei ci a thei sih uhi. Moses in amate kungah, “Tami pen Pasien in na neh ding vua ang pieh an ahi hi.

¹⁶ Topa’ thupieh tam bang ahi hi: ‘Na milipun tam an na dei zaza uh khawm ciet un. Na puonbuh sung vua mi phaza tawh kizui-in mi khat adingin omer khat ciet na khawm ding uhi,’ ci hi,” ci-in a gen hi.

¹⁷ Tua bang ma-in Israel-te a gamta vua, kimkhat in a tamzaw, kimkhat in a tawmzaw a khawm uhi.

¹⁸ Ahi vangin omer tawh a te ciengun a tampi khawmte-a’ dimval loin themno khat a khawmte-a’ zong cingla tuon lo hi; amate in a milipin a kisap za ciet a khawm uhi.

¹⁹ Moses in amate kungah, “Zingmawng dongin koima in tuate hen sih heh,” a ci hi.

²⁰ Ahi vangin amate in Moses’ thugen a mang sih uhi; mi pawlkhat in zingmawng dongin tuate halkhat a hen vua, tuale than tu-in a ui sieng hi. Amate tungah Moses a lungthah hi.

²¹ Amate in zingmawng sielin a neh khop ding ciet uh a khawm uhi; ahi vangin ni a ham ciengin tuate zungmang sieng hi.

²² Amate in a ni guh ni-in an a zani, omer ni ciet a khawm uhi. Moses kungah mihon makai zosie pei-in a gen ciengun

²³ Moses in amate kungah, “Tam khu Topa’ ei thupieh ahi hi: ‘Zingcieng pen a lipkhap huoi tawlngah ni, Topa dinga Sabbath siengtho ni ahi hi; na em nuom teng uh emin na huon nuom teng uh huon unlen, zingmawng dongin na khamval teng uh koicing un,’ ci hi,” a ci hi.

²⁴ Tuaci’n amate in Moses’ thupieh bangin zingmawng dongin tuate a koicing uhi; tuale tuate pen ui zong ui loin than zong tu lo hi.

²⁵ Moses in, “Tuni pen Topa dinga sabbath ahi ziehin tuni-in tuate ne un; tuni-in gamlahah tuate na mu sih ding uhi.

²⁶ Ni guh sung tuate na khawm ding uhi; ahi vangin a ni sagina sabbath ni-in bangma om lo ding hi,” a ci hi.

²⁷ A ni sagi ni-in an khawm dingin mi pawlkhat a pei vua, bangma a mu mintah sih uhi.

²⁸ Topa in Moses kungah, “Ka thupiehte le ka thuhilte bang tanvei ei niel sawm na hi uh ahei?

²⁹ En un! Topa in na tung vuah sabbath ang pie zo ta hi, tua ahi ziehin ama in ni guh ni-in na tung vuah ni ni khom ding an ang pie hi; a koima po na opna ciet vuah om un; a ni sagi ni-in na opna panun heima pusuoh sih un,” a ci hi.

³⁰ Tuaci’n a ni sagi ni-in mite a toi om uhi.

³¹ Israel innkuon in tua khu manna a ci uhi; tua khu nannan tang tawh kibangin a meel kang a, khuoizu tawh kibawl mopheng tawh kibang hi.

³² Moses in, “Topa’ thupieh tami ahi hi: ‘Egypt leitang panin kang peipi lai-un amate in senel gamah note kang vana an a mu thei nadingun na khang tungtawnun tuate omer dim khat koicing sah un,’ ci hi,” ci-in a gen hi.

³³ Moses in Aaron kungah, “Beel khat la-in tua sungah manna omer dim khat sung inlen, na khang tawntung vua a kikem zing dingin Topa mai-ah tuate koi in,” a ci hi.

³⁴ Topa in Moses a thupiehsa bangin Aaron in thuciemna mai-ah kepcing dingin tuate koi hi.

³⁵ A ten nading uh leitang a tun masang uh, kum sawmli sung Israel-te in manna a ne uhi; Canaan gamgi a tun masangun amate in manna a ne uhi.

³⁶ Omer khat pen ephah khat’ sesawm-suo-sekhat ahi hi.