Paikhiatna 14 - Zo Bible

San Tuipi Galkaina

¹ Tua ciengin Topa in Moses kungah tam bangin gen hi:

² “Israel-te kinua hei-in Migdol le tuipi kikal, Pi-hahiroth mai, Baal-zephon gei-ah giephuol a sat ding gen in; tuipi gei, tuami gal khatah giephuol na sat ding hi.

³ Pharaoh in Israel-te tawh kisai-in, ‘Tami gam sungah amate vahvai-in senel gam in vuanelh zo ta hi,’ ci ding hi.

⁴ Pharaoh’ lungtang ka khausah ding a, amate a nuadel ding hi. Pharaoh le a galkap zosie tungtawnin minthanna ka nga ding hi; tuale Egypt-te in Topa ka hi lam ei thei ding uhi,” a ci hi. Tua bang ma-in amate gamta uhi.

⁵ Mite taimang sieng zo ta hi, ci-in Egypt kumpipa kungah a kigen ciengin Pharaoh le a uliente’ lungsim kikhelin amate in, “I na ei seppieh Israel-te i peisah pen bangci gamtat mawh ta i hi uh ahei?” a kici uhi.

⁶ Tuaci’n ama in a leeng kithawisahin a galkapte a la hi;

⁷ a deiteel leng zaguh le Egypt leeng zosie a uhte tawh ama a kuonton hi.

⁸ Topa in Egypt kumpi Pharaoh’ lungtang khauhsahin hangsan taha a pei Israel-te a nuadel hi.

⁹ Egypt-te ahi Pharaoh’ sakolte, leengte, a leeng hawl zosie le a galkapte in amate a nuadel uhi; amate in tuipi gei-ah giephuol satin a opna uh ahi Pi-hahiroth khuo gei, Baal-zephon khuo mai-ah a pha uhi.

¹⁰ Pharaoh in amate a neh ciengin Israel-te a kinua hei vua, amate lamah Egypt mite a kuon uhi. A zau seng ziehun Topa tungah Israel-te a kiko uhi.

¹¹ Amate in Moses kungah, “Egypt gama han a op lo ziehin senel gama si dinga nei zawpi amah? Egypt gam pana nei peipina tawh ka tung vua bang teng bawl mawh na hei?

¹² ‘Ei ci opsah lel inlen Egypt-te’ na ei semsah in,’ ci-in Egypt gama na kunga kang gen pen uh tami thu ma hi lo amah? Azieh pen senel gama ka si sangun Egypt-te’ na ka sep uh kote dingin hoizaw ding hi,” a ci uhi.

¹³ Ahi vangin Moses in mite kungah, “Zau sih unlen ding kip un. Tuale en un, tuni-in Topa in note dinga ang sep ding a hutkhietna mu un; azieh pen tuni-a na mu uh Egypt-te na mukia ngai nawn sih ding uhi.

¹⁴ Topa in note dingin gal ang simpieh ding a, tuaci’n na op hit hiet ding beh uh ahi hi,” a ci hi.

¹⁵ Tua ciengin Topa in Moses kungah, “Bang dingin kei tunga hing kiko na hi uh ahei? Israel-te mainawtin a pei ding uh gen in.

¹⁶ Ahi vangin Israel-te in tuipi laikimah tuolgaw a tot thei nadingun na ciengkhut lamto inlen, tuipi tungah na khut zahin khenkhe in.

¹⁷ Tua ciengin Egypt-te’ lungtang ka khausah ding a, amate in ang del ding uhi; tuaci’n keima in Pharaoh le a galkap zosie, a sakol leengte, a leeng hawlte tungtawnin minthanna ka nga ding hi.

¹⁸ Pharaoh le a sakol leengte le a leeng hawlte tungtawnin minthanna ka nga ciengin Egypt-te in Topa ka hi lam ei thei ding uhi,” a ci hi.

¹⁹ Tua ciengin Israel galkapte mai-a a pei Pasien’ vantungmi kikhinin amau’ nua-ah a pei hi; a mai panun meii khuom kikhin a, a nua vuah a om hi.

²⁰ Egypt galkapte le Israel galkapte kikal ah tua meii a pei hi; tuale tua munah meii le khuomiel omton a, tuami in zan khuomiel a tangsah hi; zan tawntungin khatlekhat kinai kha loin a om uhi.

²¹ Tua ciengin Moses in tuipi tungah a khut a zah hi. Topa in zan tawntungin nisuona lam huipi hat tawh tuipi lemutsahin gamgaw a suohsah hi; tuale tua tuipi phal ni-in kikhen hi.

²² Amau’ ziet le vei-ah tuite kawm bangin omin tuipi tunga leigaw lahah Israel-te lam a pei uhi.

²³ Egypt-te ahi Pharaoh’ sakolte zosie , a leengte le a leenghawlte in a nuadel vua, tuipi laikim amau’ nua-ah a pei uhi.

²⁴ Zingmawng khuo va ciengin Topa in mei le meii khuom sung panin Egypt galkapte ensuh a, Egypt galkapte patausah gawp hi.

²⁵ Ama in a amau’ leengkangte a awsah ziehin hamsapi-in a hawl uhi. Egypt-te in, ”Israel-te mai panin taimang ta vai, azieh pen Topa in amate dingin Egypt-te a do hi,” a ci uhi.

A Nuadelte Tui Sungah Kiesuh

²⁶ Tua ciengin Topa in Moses kungah, “Egypt-te tung, a leengte uh tung, le a leeng hawlte uh tungah tami tui ang luonkia nadingin tuipi tungah na khut zah in,” a ci hi.

²⁷ Tuaci’n tuipi tungah Moses in a khut zah a, zingmawng khuo a va ciengin tua tuipi a luon ngai bangin a luongkia hi. Tua tuipi panin Egypt-te a tai ciengun Topa in Egypt-te tuipi lam sena-in nei hi.

²⁸ Tui peikia-in leengte, leeng hawlte le tuipi sunga amate a del Pharaoh’ galkapte a unpi-in tui in hlummang hi; amate khat zong suohta lo hi.

²⁹ Ahi vangin tuipi laikim leigaw tungah Israel-te a pei vua, a ziet a vei vuah kawm bangin tuite a om hi.

³⁰ Khum ni-in Topa in Egypt-te khut sung pan Israel-te tam bangin na hunkhie hi; tuale Israel-te in gunpieu-a si Egypt-te a mu uhi.

³¹ Israel-te in Egypt-te tungah Topa’ bawl nasepna lienpi a mu uhi. Tuaci’n mite in Topa a giing vua, Topa le a nasempa Moses a um uhi.