Paikhiatna 13 - Zo Bible

¹ Topa in Moses kungah tam bangin gen hi:

² Tacil zosie keima adingin siensuo un; Israel-te lahah mihing hitale ganhing hitale, naubu hong masa pen popo kei-a’ ahi hi.

Tol Kisaw Lo Anlum Pawi

³ Moses in mite kungah, “Na sal tanna Egypt gam panin na pei ni uh ahi tami ni phawh un, azieh pen Topa in a thahat khut tawh khum mun panin note ang peipi hi; tol kisaw anlum kine lo ding hi.

⁴ Abib hla sung, tuni-a peikhie na hi uhi.

⁵ Topa in pieh dinga na pu na pate kunga a na ciemsa bawngnawi le khuoizu luonna leitang, Canaan-te, Hit-te, Amor-te, Hiv-te le Jebus-te’ tenna leitangah ang peipi ciengin tami hla sungin tami na bawl ding uh ahi hi.

⁶ Ni sagi sung tol kisaw lo anlum na ne ding vua, a ni sagi ni-in Topa adingin pawi khat om ding hi.

⁷ Ni sagi sung tol kisaw lo anlum kine ding hi. Na neisate sung vuah tol kisaw anlum kimu lo ding a, na tenna uh mun zosie-a na lah vuah zong tol kici kimukha lo ding hi.

⁸ Khum ni-in na tapate uh kungah, ‘Egypt panin ka peikhiet lai-in Topa in kei adinga ei bawlpieh zieh ahi hi,’ ci-in na gen ding hi.

⁹ Na kam sung vuah Topa’ thuhilna a op thei nadingin note dingin tami khu na khut tung vuah lim khat hi ding a, na talpang tung vuah phawna khat hi ding hi; azieh pen Topa in a thahat khut tawh Egypt leitang panin note ang peipi hi.

¹⁰ A kise hunin kum khat pan kum khat, tami biehna ngaina kip na zui ding uhi.

Tacil Siensuona

¹¹ “Ama in note tung le na pu na pate uh tunga a ciemsa bangin Topa in Canaan leitangah ang peipi hun cieng le na tung vuah tuami gam ang pieh ciengin,

¹² Topa adingin naubu hong masa zosie na tuomkoi ding uhi. Na ganhon uh tacil apa zosie Topa-a’ hi ding hi.

¹³ Ahi vangin laa tacil poma tuuno khat tawh na tanh ding uhi; na tat sih uleh a ngawng na hiatawng ding uhi. Na tapate uh lah panin tacil poma na tanh ding uhi.

¹⁴ Mai lam hunah na tapa in tami bang a cinopna ahiei?’ ci-a ang dawh ciengin ama kungah, ‘Saltanna Egypt panin a thahat khut tawh Topa in ei na peipi hi.

¹⁵ Pharaoh in lungkhauh tahin peisah ding ei na niel ciengin Topa in Egypt gam sunga tacil zosie, mihing tacil le ganhing tacil zosie a thatgam hi. Tua ahi ziehin naubu hong masa apa zosie Topa tungah biehpiehna-in ka pie hi, ahi vangin ka tapate sung pana a pieng tacil zosie ka tankia hi,’ na ci ding hi.

¹⁶ Tua khu na khut tungah lim bang hi ding a, na talpang tungah ciemtena lim bang hi ding hi. Azieh pen Topa in a banhat tawh Egypt gam panin eite ei peipi hi,” a ci hi.

Meii Khuom le Mei khuom

¹⁷ Pharaoh in mite a peisah ciengin Philistia gam lam naizaw tamaleh, Pasien in tua lamah amate peipi lo hi; azieh pen Pasien in, ‘Mite in gal le sa tuoh uleh a lungsim uh kikhelin Egypt gamah kinuale thei kha ding uhi,” ci-in ngaisun hi.

¹⁸ Tuaci’n Pasien in San Tuipi lam manaw-in senel gam lamah mite a kuol peipi hi. Israel-te gal do dinga a kithawisa-in Egypt gam panin a peito uhi.

¹⁹ Joseph in, “Pasien in ang phawh kha valon ding vua, tua zaw ciengin tami mun panin ka gu ka tangte na puo ding uhi,” ci-in Israel-te kungah lipkhaphuoi kiciemna tawh a vaihlah ziehin Moses in Joseph’ gu le tangte a puo hi.

²⁰ Succoth pan amate a ding vua, senel gam mong, Etham-ah giephuol a sat uhi.

²¹ A sun a zanin khuol a zin thei nadingun sunin lam lah ding meii khuom khat tawh, zanin khuovah pie ding mei khuom khat tawh, a mai vuah Topa a pei hi.

²² Suna meii khuompi, le zana mei khuompi in mite mai ama’ opna mun lawi lo hi.