Obadiah 1 - Zo Bible

A Kiphasah Edom Kisuniem ding

¹ Obadiah’ Mangmuna. Topa Pasien in Edom tawh kisai tam bangin ci hi: Kote in Topa kung pan thupuoh ka za zo ta vua, minamte lahah kamtai khat kisawl zo ta hi: “Tho un! Ama do dingin kuon va vui!” a ci hi.

² Minamte lahah a neu penin kang bawl valon ding hi; nang pen nahpitahin ang kisimmaw ding hi.

³ A pawhkeh suongpi kawm lahah tengin, munsang lahah a teng pa aw, na lungsim kiphatsahna in nang ang solgawp ta hi. Nangma in na lungsim sungah, “Koi in lei-ah ei khiesuh ding ahei?” na ci hi.

⁴ Muvanlai bangin a sangna munah lengto-in, aasite lahah bu na bawl zongin, khum panin kang khiesuh veve ding hi, Topa in ci hi.

Kibuluna le Kithana tawh Edom’ Gitlona Kithuhkia ding

⁵ Zan lai-in na kungah gutate le misuomte hing pei uleh, ang bangci kisuhsiet ta diei! Amate in a deite beh uh ang guhpieh sih ding uh amah? Lengga khawmte na kungah hing pei uleh, a sangh teng a nuasie sam sih ding uh amah?

⁶ Esau bangci kibulu ahi a, a guogil teng a kilonpieh sieng ta khula!

⁷ Na kipawlpi teng in ang solmang vua, gamgi dongin ang notmang uhi; amate in nang ang pawlbawlte zong a thazaw gawp ta uhi; na an a nete in zong ang thang siet ta vua, nang in lah na theitel zo sih hi.

⁸ Khum ni ciengin keima in Edom sung panin mipilte le, Esau’ Muol tung panin theitelna ka sumang ding hi, Topa in a ci hi.

⁹ Teman khuo aw, na galhangte a lungkie ding vua, tuaci’n Esau Muol panin mi zosie kisumai ding hi.

Edom in a Sanggampa Limbawl Lo

¹⁰ Nang in sanggampa Jacob tungah kithana le tatsietna na zah ziehin, zumna in nangma ang khu ding a, khantanin ang kisumang ding hi.

¹¹ Melmahte in a neisate a puohmang ni, a tunkotah gamdang mite a lut ni, Jerusalem luo nadingin ai a kisan ni, nang a gei-a na din ni-in nang zong amate khat tawh a kibang na hi ta hi.

¹² Ahi vangin ama’ vangsiet ni-in, na sanggampa tungah na thangphat ding kilawm lo hi. Amau’ kisiet ni-in Judah mite tungah na kipah ding kilawm lo hi. Amau’ genthei ni-in na kisahthei ding kilawm lo hi.

¹³ Ka mite a tuosiet ni-in a tutkot vuah na lut ding kilawm lo hi; ama’ tuosiet ni-in Judah’ gimna tungah na thangphat ding kilawm lo hi; ama’ tuosiet ni-in a neisate na lahpieh ding kilawm lo hi.

¹⁴ A suohtate khah tan dingin lamsuom tenga na din ding kilawm lo hi; lungkham ni-in a hinglaite na pieh ding kilawm lo hi.

¹⁵ Azieh pen minamte do nading Topa’ ni ang nai ta hi. Na bawl bangin nang tungah ang kibawl ding hi; nasepnate na luzang ma-ah ang tukia ding hi.

¹⁶ Azieh pen ka muol siengtho tunga na dawn bang lienun, na kimvel vua minam zosie in a dawn suoh ding uhi; amate in dawnin a nawmval ding vua, a pieng ngailote tawh kibang ding uhi.

Israel’ a Tawpna Guolzawna

¹⁷ Ahi vangin Zion Muol tungah a suohtate a om ding vua, khum mun pen mun siengtho ahi ding hi; tuale Jacob innkuonte in mi kilahpieh leitang luo ding uhi.

¹⁸ Jacob innkuonte pen mei tawh a kibang ding vua, Joseph innkuonte zong meikuong tawh kibang ding uhi; Esau innkuonte ahi ule butu tawh a kibang ding uhi; amate in tuate halin tuate a katum ding hi. Esau innkuon sungah a suohta om lo ding hi. Bangzieh ahei cile Topa gensa ahi hi.

¹⁹ Negeb gama a tengte in Esau Muol a luo ding vua, Shephelah a tengte in Philistia gam a luo ding uhi; amate in Ephraim gam le Samaria gam luo-in, Benjamin in Gilead gam a luo ding hi.

²⁰ Halah gama a om saltang Israel-te in Phoenicia gam Zarephath dong a luo ding uhi; tuale Sepharad khuo-a om Jerusalem saltangte in Negeb gama khuopite a luo ding uhi.

²¹ Esau’ Muol a uh dingin Zion Muolah hutdamsa mite, a kato ding uhi; tuale khum kumpi gam pen Topa-a’ ahi ding hi.