Nehemiah 6 - Zo Bible

Galte’ Dapsawmna Kisusie

¹ Tu-in keima in kulpi ka cien zona thu le a vang khat zong a op nawn lona thu, Sanballat, Tobiah le Arab-te Geshem le ka galdangte zosie kungah a kigen ciengin, (khum hun laitahin tunkot tengah kotkhahte ka bul nai lo vangin)

² Sanballat le Geshem in, “Hing pei inlen Ono zanglei-a khuoneu khatah kimutuo vai,” ci-in ei thuta uhi. Ahi vangin amate pen keima tunga sietna bawl sawm ahi bo uhi.

³ Tuaci’n amate kungah kamtaite ka sawl a, “Nasep golpi ka sep laitah ahi ziehin kang peisuh thei sih hi. Note kunga kang peisuh kalin bang dingin nasep nuasie-in kikhawl ding ahei?” ka ci hi.

⁴ Tua bangin li vei tah ei thuta vua, a masa bang ma-in ka dawngkia hi.

⁵ Tua bangin a ngaveina-ah Sanballat in keima kungah a nasempa hing sawlin ama’ khutah a kihongsa laihlah khat ang tawisah hi.

⁶ A laihlah sungah, “Minamte lahah a kigen- Geshem in zong ei gen thu in- nangma le Jew-te in nei ledo sawm uhi; tua ahi ziehin note in kulpi na cieng uhi; tuale tami thu a kigenna danah nangma zong amau’ kumpi sem nuom dan na hi mel hi.

⁷ Nangma in, ‘Judah gamah kumpi khat om zo ta!’ ci-in nangma tawh kisai thu tangko dingin kamsangte zong na koi zo ta mel hi. Tuale tami kammalte dung zui-in kumpipa kunga thu kipuoh ding ahi ta hi. Tua ahi ziehin hing pei inlen kikumton vai,” ci-in kigiel hi.

⁸ Tua ciengin keima in ama kungah, “Na gen bangin tua thute kibawl lo hi; tuate pen na lungsim sunga na mawh phuotawm ahi bo hi,” ci-in ka gensahkia hi.

⁹ Azieh pen amate zosie in ei galgih nuom vua, “A nasep ban uh hing tuolkhieh va-un, sep loin hing om na va,” ci-in ngaituo uhi. Ahi vangin tu-in Pasien aw, ka khutte hing thahatsah in.

¹⁰ Ni khat, ama’ inn sunga a kulcip Mehetabel’ tapa Delaiah, a tapa Shemaiah kungah ka va haw ta leh ama in, “Pasien’ biehinnpi-a biehbuh sungah kikhawm tonin biehbuh kotte khah vai, azieh pen nangma that dingin amate ang pei ding uhi; nang ang that dingin tuzanin amate ang pei valon ding uhi,” ei ci hi.

¹¹ Ahi vangin keima in, “Mi kei bangte tai va nei ci tamawng amah? A hinna humbit dingin mi kei bangte biehinn sungah lut talawm va nei ci amah? Lut buong lo e!” ka ci hi.

¹² Tua ciengin tuapa pen Pasien sawl na hi vawt loin, Sanballat le Tobiah-te in a thap zieh vua, keima lang khatah tua bang teng ang gen ahi lam ka mukhie hi.

¹³ Amate in ei zausahin tam bangin gamta-in mawna ka bawl thei nading ngimna le, tuaci’n amate in keima ei galgih thei nadingun minsiet puomsiet ei tansah nop zieh vua ama na kiciel ahi bo hi.

¹⁴ Ka Pasien aw, amate in tam thu teng a bawl uh dung zui-in Tobiah le Sanballat, kamsang numei Noadiah le keima ei zausah nuom adang kamsangte na thei gige in,” ka ci hi.

Kulcien Kiman

¹⁵ Tuaci’n Elul hla ni sawmni le ni nga ni-in kulpi bawl kizo a, ni sawmnga le ni ni sawt hi.

¹⁶ Ka galte zosie in tua thu a zah ciengun ka kimvel vua a om minamte zosie a zau vua, zong mai nei a kisa nawn sih uhi; bangzieh ahei cile tami nasep pen ka Pasien uh’ panpina tawh a kimuolsuo ahi lam amate in a thei ta uhi.

¹⁷ Tua banah khum hun lai-in Judah mithupite in Tobiah kungah lai tampi a na hlah vua, Tobiah’ laihlahte zong a na nga uhi.

¹⁸ Bangzieh ahei cile ama pen Arah’ tapa Shecaniah’ mahpa hi a, Berechiah’ tapa Meshullam’ tanu tawh a tapa Jehohanan a kinun ziehin ama tawh Judah gama mi tampite kiciemin a kipawl uhi.

¹⁹ Amate in a silbawl hoite zong ka mai-ah ang gen vua, keima gen teng zong ama kungah a na tut uhi. Tuale Tobiah in ka zau theithei nadingin keima tungah lai tampi ei hlah hi.